Read Khumi Chin JOBA 15 Bible Online

JOBA 15 - Khumi Chin bible

JOBA 15

¹Nang ly ati sai py ny y nai leu katheu lawh; Joba awi! nang ly ati sai py ny y nai leu katheu lawh ly!

³Mani khumi kacheng py nang kamta, katheu ai ny y. Hina nai ati sai py ny y nai leuchi ly nangmy ai ama hai ai ny y.

⁴Amychi ngai nai kamta sa pajau ai nabaly, ami py Tameuh ai tahm khai naimy jei kaji ai ny y. Ami py mymy teng y chiu sa u ai ny y leang bo.

⁵Nang i hawi y nai sai ly nangmy i katheu nai leuchira my amteng nai ne. Nang ly leu ali alawi katheu kawp naichi hawimy abyh iy awm bo.

⁶Nang ai kang thui tamawn ai nai ngai y; nangmy i katheu nai leu my, nangmy ai ang thui tamawn nai bo.

⁷Nang ly tapen manme nai khumi a? Mawichi ai Tameuh my sa nai thym khala, nang ly awm a?

⁸Tameuh i sa nai ka-dawnchi nang thai sai a? Nangmy leaungrei tau cheng khyh a?

⁹Nang i pany nai ngiereichi, kaichi py pany teang.

¹⁰Kaimychi i tau cheng nai ly nang i ampo tleaung y saneng len nai khumi, sam pau nai khumichi teng i amtiu nai ne.

¹¹Nang i tlang tleaung y Tameuh my paleung ang pahawi nai ly ati mana nai y akhi vui lawh mo? Kaichi ly mymy i jeng y, nang ai leu kanemchi kang thui pi bo.

¹²Ati mana nai y nang ly paleung kaso theu naimy kado theu iy, kaichi ai khen seaungphai lawh mo?

¹³Tameuh ai ati mana nai kado theu hai iy, hina nai katheu lawh mo?

¹⁴Khumi ly meitang khyp, kamngo by y a? Ami nai Tameuh i mo y khumi kahawi lawm pajau ai mo?

¹⁵Tameuh ly mymy i kani pri amtaw thau naichi ai malawn py, ym y nai ne. Nichi malawn py, mymy i mo y kamngo by y naichi ny y.

¹⁶Khumi ly kamngo ai tui kamta teaung reng; khumi ly meitang khyp, hawi y nai sa reng i, amso ngai ai nai hawi.

¹⁷Joba awi, vai, kai i pany nai kamta, kang thui pi nai tangai ba.

¹⁸Khumi kachengchi ly mychi i amsi pajochi teng i dengdairei, amtiu nai leu meitangchi ai apha y naimy kai ai patiu pi nai ne.

¹⁹Nichi i awm nai pri y, cheng takhra khumichi by y nai deaungkho y, nichi ai Tameuh hawi taprei vui ai nai, khumi leaungrei py by y.

²⁰Khumi takhrachi ai pahyp y naimy ana reng nai, khumi hawi y naichi ly heng nai sala ryrei y patang naira avum ai.

²¹Ni ly ka-jei awm nai raawichi thai naimy, phrumai by y leaung bo, nanai athang awm nai neng khala y, kangviu damrachi my tiu nai avum ai.

²²Khumi ai padei nai keung ly ni ai ajeng rym nai ne i, ni ly kaveng theung i nai law tleaung ai nai athang khaira by y.

²³Langnachi ly ni i veu cha ai nai, ajeng u rym nai ne. Ni ly mymy khym taham kasi avum ai, nanai apany.

²⁴Tavai atiu ai nai angveirym nai samrang kamta, ka-jeira my ni ai tiu ai nai ajeng rym nai ne.

²⁵Hini ly Tameuh ai kiu pahyn nai khumi, ati cheaungkhang sa thai nai keung ai amtang nai khumi i, avum ai nai khym taham kasi ne.

²⁶Huni khumi ly paleung len i tiu bo; paleung tang naimy amy i khupui syn iy, Tameuh ai tiu ai nai angpreng bo.

²⁸Ni ly marychi hawi yhmkeungchi preang pawn iy, khai su nai yhmchira y athum bo. Na i py huni mary, huni yhmchi ly tavai takai molam y phra ai.

²⁹Ni i nang chawn nai ly akan ai ny y; ni i amtym nai mani yhmtheaung katuichi py akan ai ny y. Ni i pa-pui malawn py tama vui ai.

³⁰Ni ly kaveng theung i nai tleaung ai ny y. Changpichi ai mai my kang iy, pauchi ali theung y akheang pawn nai dengkeaung keung hawi atawm ai.

³¹Ni ly hawi y naira ai a-ym iy, ka-khum sa lawh baly ka-mang lai naini amtym ai.

³²Ni ly neng tym y naimy jeirawm vui ai; dengkeaung changpi kamta deirawm naimy, mana khala py sai angpho ai ny y.

³³Ni ly myn y rai khala athai vui taru nai kreip angjyn hawi, pauchi vui pawn nai Olive keungchi hawi atawm ai.

³⁴Tameuh by y nai khumichi ly katu chanauchi sa u ai ny y. Un tangka hawi yhmchi ly mai y kang vui ai.

³⁵Nichi ly amichi ai patang hai ai nai dawn tau naimy, hawi y sa nai khumichi lawm u ai. Nichi i paleung pathym ly avawrei li-tapawp nai hawimy kawi nanai ne.