Read Khumi Chin JOBA 16 Bible Online

JOBA 16 - Khumi Chin bible

JOBA 16

¹Hina nai leuchi ai vaichi khala kathui reng nai ne. Nangchi i paleung pahawi nai ly pahyp y naimy ana naira naini lawm bo.

³Nangchi ly avawrei hina nai thui ai nai ngai u a? Avawrei leu kamjau katheu ai nai ngai u lawh a?

⁴Kai ly nangchi hawi meingtym angtheung ai nai nga lawh teu i khyly, nangchi katheu u nai kamta ly kai py katheu pajau nai ne. Kai ly khumi kacheng kamta, kaimy i lu heng naimy nangchi ai leu angdeungra anum hai pajau.

⁵Kai ly nangchi ai tau kang pei iy, kang khaw hai pajau; Nangchi awmnemra nga u ai nai avawrei katheu pajau nai ne.

⁶Na i py vai, ati mana mo, nanai kang thui pi teu i py, kamran by y. Kaawm pypy teu i py, kai i no patang naira dam ai ny y.

⁷Aw Tameuh, nang ly kai ai patang hai bo; kai i yhm dengtheungchi ai tama hai pawn bo.

⁸Nang ly kai ai patiu vui bo; nang ly kai i paleung ka-e lawm bo. Kai teng y hiu hawi peih naini awm khyh bo. Hini molam y thui ai nabaly, khumichi my kai i tlang tleaung y kamngo awm, nanai thui u nai ne.

⁹Tameuh ly kado theu nai deaungkho y, kai i kiu kheuchi ai leng pawn veng bo. Mymy ly niu ngai y nai paleung hawi, kai ai khen kalingie nai ne.

¹⁰Khumichi ly kai ai cheh; taki kaleuteu iy kai i tangbeng ai tabeang u.

¹¹Tameuh ly kai ai khumi hawi y naichi i kiu y au bo.

¹²Kai ly awmnem naimy kaawm; Na i py Tameuh ly kai i kaneaung taau iy, ang khyh ang pakhau piu bo. Tameuh ly kai i tlang tleaung y acham ai nai amthiura palawn iy,

¹³khuteng taki palyh dengdairei, thailiho hawi ang ko; Huni thailiho chynchi ly kai ai prileu na pa-rei, tamo nga hai bo. Na i py mymy ly kai ai pahen y leang rai.

¹⁴Mymy ly kai i tlang tleaung y, avaw avawrei tamo nga hai. Niu ngai y nai paleung hawi, kado theu thi phui nanai tavaimi sorai kamta, mymy ly kai ai ang tiu bo

¹⁵Kai ly paisiu kanih amchiu iy, vo tangam bo; sum naimy khaileaung spryh theung y ateh ai nai tla bo.

¹⁶Kai ly meimai paleang na naimy meichi bau iy, mei tengchi panum na pa-rei, kavo ai nai tla bo.

¹⁷Na i py mani khrukhra nairachi py, kai so y leang. Tameuh teng y py paleung kahawi naimy chiu kasa nai ne.

¹⁸Khaileaung awi, kai i tlang tleaung y tym nai, teng y nairachi tamym vui moh! Adyh adawi naira nga ai nai kai i aeu nai raawi py anawn hai vui moh!

¹⁹Kai mang y asa hai naimy angdo hai kalingie iy, pany hai nai keung ly kani pri mang y awm.

²⁰Ahawi kamrawichi ly kai ai cheh u; Kai ly Tameuh i mo y meikatui tla naimy kaawm bo.

²¹Amy i ahawi ka-dawi i vui y awm hai nai khumi kamta, kai i vui Tameuh teng y ama hai ai nai khumi awm hai i khyly, kangai parai.

²²Kai i heng ai nai sanengchi ly vai, maidenreichy awm khyh nai deaungkho y, kai ly vawi lam by y nai meingtym mang y, khuleaung amsa nai ne.