Read Khumi Chin JOBA 18 Bible Online

JOBA 18 - Khumi Chin bible

JOBA 18

¹Joba awi, nang i leu ly mana khala tem ai mo? Nang ly awm pypy iy tangai baly, kaichi leu katheu ai rai.

³Ati mana nai kaichi ai si, painochi kamta, pany pacha y nai khumichi, nanai palawn lawh mo?

⁴Nang i kado theu nai ly nangmy ai phra naira tym hai nai ne. Nang i kado theu nai molam y, khaileaung pri ly khumi angso savai tlang nai lawm vui na a? Nang i paleung awmnem naira nga pajau ai nai, Tameuh ly mawichi ai kasyh pi vui na a?

⁵Khumi hawi y nai i maisi ly dei vui ai, huni maisi dengdairei mai kadeu ly mo mang y mana khala py angvang ali teang ai ny y.

⁶Ni i kanih yhm theung i maisi yhm ly dei vui ai.

⁷Ni i kheuchi ly vaichi khala, khaw parai naimy tako pajau teu i py, vai i neng y ly atlym khikha bo. Ni ly my i tau kamnai y my athei bo.

⁸Ni ly paleupy theung y adang lawh nai deaungkho y, ni i kheuchi ly paleupy my man bo.

⁹Ni i kheu patuichi ly deaungra y man nai y, ajiu thai y.

¹⁰Ni i vui khaileaung y niu y pa-rei, deaung khai pi. Ni i tako nai lam y deaung pateung pi bo.

¹¹Ka-jei awm nai patang nairachi ly ni ai takimeuh naimy ajeng iy, ni i tako naira tleirei y hui bo.

¹²Ni ly nang chawn nai khumi ne i py, vai i neng y ly avaw i, alam nai ne. Khri pa-rei ka-jeira ly ni i sahawi y angdo naimy ajeng yb bo.

¹³Khri pa-rei hawi y parai nai angvawichi ly ni i ngan tlang verei kawibiu iy, kiu kheuchi veaung hai bo.

¹⁴Ni i tlamsa naimy awm nai kanih yhm theung i dengdairei ni ai patheu vui iy, dei areng hawi avum ai nai ryh jo bo.

¹⁵Vai ly ni i kanih yhm theung y kan deichi hei iy, no michi padei pawn chum baly, khumi takhrachi my athum u vui ai.

¹⁶Ni i tangjynchi hawi changpichi ly jei iy, deirawm vui ai.

¹⁷Ni i satangchi ly amy i pri hawi pri takhra y tama vui iy, ni ai ami py ma u ai ny y leang bo.

¹⁸Ni ly khaileaung pri i dengdairei, patheu vui nai avum ai. Kangvang i nai kaveng mang y patheu vui nai avum ai.

¹⁹Ni teng y amjo amnau kypkyp by y leang bo.

²⁰Nisi mang dengdai nidym mang y khrairei, ni i khym taham kasi satang thai nai khumi bawibawichi ly jei naimy kaso theu u ai.

²¹Hini ly hawi y sa naichi i awm nai sai, Tameuh ai maidenchy py tahm khai y naichi i khym taham ne.