Read Khumi Chin JOBA 19 Bible Online

JOBA 19 - Khumi Chin bible

JOBA 19

¹Nangchi ly leu khulym hawimy manatan pa-rei, kai i tlang tleaung y ana u ryry ai mo?

³Nangchi ly kai i tlang tleaung y mei aniu y ryry naimy, kangji kangai by y na pa-rei thui preaung u bo.

⁴Kai, sa tamang lawh teu i baly, huni tamangra my nangchi i tlang tleaung y, mana patang naira tym hai lawh sai a?

⁵Nangchi my nangmychi ai kai tleaung y hawi, nanai athang khai iy kai ly kamngo awm nai deaungkho y, hini patang nairachi avum nai ne, nanai dawn u lawh.

⁶Huna naichi sa nai keung ly Tameuh ne, nanai nangchi pany u pajau y nai sai a? Mymy ly kai ai patiu ai nai deaung pateung yb bo.

⁷Kai ly mymy i khrukhra hai nai ai kaei i py ami py tangai pi y; leu meitang adyh adawi ai nai takeng i py, ami py thai y.

⁸Tameuh my lam paka khyp nai deaungkho y, kai tako prei ai nai ngo y. Mymy ly kai i lam veng hai cheng bo.

⁹Kai i yhmtheaung katui ngierei la pi pawn iy kai i tahm py phra hai bo.

¹⁰Mymy ly kai ai atlym hai ai nai cheaungkhangra mang ang sa. Kai i athang khai naira ai tangjyn raurei akyn vui i, kai ai jeirawm iy phra hai bo.

¹¹Tameuh ly khri pa-rei kado theu na i, kai ai ly mymy i hawi y keh nai paleung ka-e kamta ang khai.

¹²Mymy ly kai ai tiu ai nai, mymy i tavaimi pato bo. Nichi ly tui apaichi tai iy, kai i kanih yhm ai taki naimy tiu u.

¹³Tameuh ly kai i amjo amnauchi my, kai ai ang khai su ai nai sa hai. Kai ly kaimy i kamnychi mo y malawn py, apany vai y nai kamta lawm hai bo.

¹⁴Kai ly amjo amnau hawi, ahawi ka-dawi py by y leang bo.

¹⁵Kai i yhm y anga reng nai angvynchi ly kai ai tami u veng bo. Kai i miseaung neampachychi my malawn py, kai ai apany vai y nai khumi hawi, pri takhra khumi kamta palawn u.

¹⁶Kai i miseaung ly kaimy palau nai khala pathang y; kai ai sabawm ai nai, niteng y takeng i py ngo y.

¹⁷Kai i aju ly kai i labeaung akam mui nai kham pajau y. Kai i amjo amnau kypkypchi py, kai i sahawi y awm ai nai ngai u y.

¹⁸Deaungdichi my kai ai niu baly, khumi aniu y nai sa iy panui hai bo.

¹⁹Kai hawi amrawi keh nai ahawi ka-dawichi ly kai ai paso nai ka-dawn hawi khen u. Kai i khrei keh naichi my malawn py, kai ai ka-jo hau u.

²⁰Kai i ngan tlang ly hiu hawi peih awm khyh bo. Kai ly dei y kyh nai khyh bo.

²¹Kai i ahawichi awi! kai ai pahen nai paleung awm u! Tameuh i kiu ly kai ai ang tabeang bo.

²²Nangchi ly Tameuh kamta, ati mana nai kai ai pahyp y naimy ana ai nai ngai u lawh mo? Kai i tlang tleaung y nangchi paleung akawm hai nai ly paleung anyp u y rai a?

²³Vai, kai i thui nai ai record khai iy, kai i leuchi tajiu pi typ nai awm i khyly, kangai parai!

²⁴Ti y baly kai i leuchi khaw hai jo ai nai, lengseaung phei tleaung y thiu iy, tajiu pi typ nai awm i khyly kangai parai.

²⁵Na i py kangkhym y ly angjeu iy, asa hai ai nai keung ly kani pri mang y awm, nanai kai pany bo.

²⁶Kai i ngan tlangchi ly angvawichi deaungkho y, veaung tlawn na teu i py, kai ly hini tlang hawimy Tameuh ai niu ai.

²⁷Kai ly kaimy i mei hawimy, mymy ai kaniu ai. Kai ly ni i tlang tleaung y meimai ahangkam ai ny y. Nangchi my,

²⁸“Ni i tlang tleaung y achi my ati mana ana ai mo?,” nanai thui u nai deaungkho y, kai ly paleung phra atho di vui bo.

²⁹Na i py nangchi ly haisau tamo nga ai nai jei u bo. Tara chih nai keung leaungrei awm, nanai nangchi pany u ai nai Tameuh i kado theu nai ly haisau hawi pajeng reng nai ne.