Read Khumi Chin JOBA 21 Bible Online

JOBA 21 - Khumi Chin bible

JOBA 21

¹Kai i leu tangai u; kai paleung awmnem ai nai hina nai ryrei nga ai avo nai kang hnei nai ne.

³Kai ai leu katheu ai nai pei u kyh; kai katheu chum nai khala, nangchi panui hai pajau.

⁴Kai hawi ajo nai ly khumi hawi ny y leang; kai paleung sau pajau y nai molam y, kai teng y leaungsai kakhaw awm.

⁵Ati mana kado theu y ai mo? kai ai khen u chum; kai i mo-cha ly nangchi kiu hawi labeaung tamym vui ai nai pa-rei, kaso theu hai ai.

⁶Kai ly kaimy i avum nai saichi adawn cham nai khala, paleung phra athosi i, kaso theu na bo.

⁷Tameuh ly ati mana nai khumi hawi y naichi ai heng sau hai iy nang chawn hai lawh mo?

⁸Nichi ly katu chanauchi nga u naimy, mychi i mei keung y tleaungri acheang nai niu nai pa-rei, heng sau u bo.

⁹Tameuh ly ni i yhm dengtheungchi tlang tleaung y patang naira tym hai y. Nichi ly jei hyn nai avum u y.

¹⁰Nichi i si, painochi ly peungryh peungryh nai ne. Rai y naimy chochi tapen

¹¹Nichi i cho chanauchi ly beram chochi kamta, angpreng amau u.

¹²Taro hawi byhlyh katynchi kamlym y lam u.

¹³Nichi ly tlamsa naimy tlang tem pa-rei awm iy, no patang naira avum y naimy awmnem i, dei u bo.

¹⁴Khumi hawi y naichi my Tameuh teng y, mychi my tlairei awm ai nai hnei u. Mychi ai mymy ly mana heng ai nai ngai hai mo, nanai pany ai nai ngai u y.

¹⁵Nichi ly Tameuh ai chiu ai nai ngai u y. Mymy teng y chiu sa hnei takeng nai ly ati sai py ny y, nanai dawn u bo.

¹⁶Nichi ly mychi i haiho hawi eaung naira nga nai ne, nanai thui u. Na i py hina nai thui nai ly kai ngai y.

¹⁷Khumi hawi y naichi i maisi yhm, mai dei sai a? Nichi ly mana khala patang naira avum vai mo? Tameuh ly kado theu iy, khumi hawi y naichi ai pajeng nai ne.

¹⁸Ali my hm nai chohphi, ali lengli my pakheang nai choh ali kamta, nichi teng y mana khala tym ai mo?

¹⁹Tameuh ly ampo i molam y chapo ai pajeng bo, nanai nangchi thui u lawh; huna nai ly avo y. Tameuh ly kamngo sa naichi ai naini kamngo vang pajeng sy. Nichi ai hina nai kamngo pajeng ai ataing nai ly mychi i sa tamang nai molam y ne, nanai pany u sy.

²⁰Kamngo sa nai khumichi ly ataing khyp nai kamngo pajengra avum u na sy. Ati cheaungkhang sa thai nai Tameuh i, kado katheu pajeng nai avum u ai.

²¹Khumi ly tlang tem chum nai khala, my i cho chanauchi i vui paleung mawn a?

²²Khumi ly kani mang ichi ai tara chih nai Tameuh ai parip pajau na a?

²³Khumi phyreichi ly dei ai nai kani tym nai ryrei, no-na by y naimy awm u; nichi ly amo theu iy paleung kabi by y nai veung tlang hawi naimy dei u nai ne.

²⁵Khumi phyreichi ly pipi amo theu y i, khri pa-rei paleung mawn naimy awm iy dei u bo.

²⁶Na i py khumi luteng ly dei iy khaileaung y a-up chum baly, thaideaungchi my tabawm nai avum u bo.

²⁷Nangchi paleung angai y nai katauchi kai pany.

²⁸Nangchi my, “Huni kyh keh nai khumi hawi y nai i yhm ly vai, ma y awm mo?,” nanai deng u.

²⁹Nangchi ly khuleaung chei nai khumichi hawi, leu arum u vai y nai sai a? Nichi my syn teang nai satangchi thai u y a?

³⁰Tameuh my kado theu i kamngo pajeng nai kani y, khumi hawi y nai ly awmnem naira nga jojo nai ne.

³¹Khumi hawi y nai ai thui tamawn nai khumi, kamngo hawi kamlau parip ai nai khumi leaungrei py by y.

³²Ni ai tapreaungra tamcheaung khai iy, tai yb nai angawm y pavum nai khala,

³³khumi sang neangneangchi ly ni i veu pavum u. Khaileaungbuchi ly ni i veu salo y taphum hawihai bo.

³⁴Na i py nangchi ly kai ai ati sai py ny y nai leuchi hawi paleung pahawi u lawh ly! Nangchi patheung u teang nai leuchi ly ka-chawi leu ne!