Read Khumi Chin JOBA 22 Bible Online

JOBA 22 - Khumi Chin bible

JOBA 22

¹Cheng keh nai ne teu i py, mani khumi ly Tameuh i vui teaung ai nai nga pajau ai a?

³Nang i atiti kahawi sa naichi ly Tameuh i vui kamran awm na a? Nang i hawi nai sai my ly mymy ai kasabawmra pei lawh sai a?

⁴Nang ly Tameuh ai jei kaji naimy tahm khai nai deaungkho y, mymy ly nang ai parip iy, nang ai tara chih ai ny y.

⁵Nang ly khri pa-rei kamngo sa nai deaungkho y hawi, nang i sa tamang naichi khri pa-rei, nawi nai deaungkho y ny y a?

⁶Nang ly nangmy i amjo amnau teng i, nga ai awm nai kalai molam y, ni i baichu leng vui iy, ni ai tlang ka-keu awm hai bo.

⁷Nang ly akawm nai khumichi ai nei ai nai tui pei y; kajeu alam nai khumichi ai py, teicha teinei pacho y.

⁸Nang ly khaileaung meingtym awm nai ngierei peang vui ai nai nangmy i sa thai nai haiho hawi, tahm awm parai nai ai teaung nai ne.

⁹Nang ly lumai cheaungtichi ai sabawm ai nai akhi nai khyh chang y i, nuro nukai chochi ai py tiu, lawm iy, pahyp y naimy ana bo.

¹⁰Hunai deaungkho y nang ly nangmy i tengpang sahawi y deaungchi awm i, vaimy jei hyn na bo.

¹¹Kani veng nai deaungkho y, nang ly ati sai py niu pajau y. Lem nanai tavo tui my ly nang ai um vui bo.

¹²Tameuh ly kani pri mang y awm nai ny y a? Mymy ly kani khusang asang parai naira y awm nai ka-si taukichi ai malawn py, meung iy khen nai ny y lawh a?

¹³Na i py nangmy, “Tameuh ly ati ai pany nai mo? Mymy ly khupanymchi my deng khyp nai deaungkho y, achi ai ati mana tara chih thai ai mo?,” nanai thui lawh.

¹⁴Kani khusang tleaung y aleaung nai thym khala, mymy ly khupanymchi tho nai deaungkho y, nang ai khen nai niu ai ny y, nanai nang ly athang khai.

¹⁵Nang ly kamngo sa nai khumichi avawrei aleaung nai lam y tako ai nai adawn yb nai bo a?

¹⁶Huni khumichi ly dei kani tym y rai khala my, tui len naira y amjau u pawn ai.

¹⁷Nichi ly Tameuh ai khai su naichi ne i, mychi ai Tameuh my ati sai py so pajau y leang, nanai ym naichi ne.

¹⁸Na i py nichi ai nang chawn hai nai keung ly Tameuh ne. Khumi hawi y naichi i dawn tau nai sai kai dawn pajau y.

¹⁹Khumi hawi y naichi kamngo pajengra avum nai niu u nai khala, khumi kahawichi ly amo theu iy, kamngo by y nai khumichi ly panui u bo.

²⁰Khumi hawi y naichi i peang nai vawnsai ngiereichi ly chau pawn bo. Huna nai chau bawi y naichi ly mai y kang veng nai ne.

²¹Joba awi, vai, Tameuh hawi ka-ly so ba. Mymy ai paleung ka-e kamta, palawn moh jau ba. Huna khala naini, mymy ly nang ai amtheaung hai ai.

²²Mymy i parip nai leu tangai ly leu pei nai ai paleung theung y dawn cheng ba.

²³Nang ly paleung apanem naimy Tameuh teng y ahihawi ali teang iy, nangmy yhm dengtheung i hawi y nai ngierei ai pachai nai tla.

²⁴Nang i muku ai spryhra y khai su ba; nang i muku tangcheng ai, tui by y nai micheaungra y aphi vui ba.

²⁵Ati cheaungkhang sa thai nai Tameuh ai nang i muku, nang i tangka pai pui pateung nai lawm hai ba.

²⁶Hunaibaly nang ly Tameuh ai ym jojo iy, nangmy i amo theu nai sangum ly mymy ne, nanai pany ba.

²⁷Mymy ly nang i chiu sa nai khala, ang tangai pi ai. Nang ly mymy i adeu yb nai kamta, ka-ymra lawm pajau ai.

²⁸Nang ly dawn tau nai kamta eaung ai. Nang i heng nai deung ly kangvang angvang phang na ai.

²⁹Tameuh ly paleung len nai khumichi ai tahm anem hai iy, tahm apanem nai khumichi ai atleu ai.

³⁰Nang ly kamngo by y iy, kateng sa lawh teu baly, mymy ly nang ai atleu ai.