Read Khumi Chin JOBA 23 Bible Online

JOBA 23 - Khumi Chin bible

JOBA 23

¹Kai ly vai khrairei Tameuh ai tiu naimy katangam bo; tangam y nai awm pajau y.

³Mymy ai mani meingtym y avum pajau ai mo? Mymy i awm nai meingtym y mana chei ai mo, nanai kapany ai nai ngai parai.

⁴Kai ly kaimy i kalop, mymy teng y amti pi ai. Kai mang i pany hai ai awm nai ngiereichi amti pi ai.

⁵Kai i tlang tleaung y mymy ly ati leu pei ai mo, ati mana pathang pi ai mo, nanai kai pany ai nai ngai.

⁶Tameuh ly sa thai naira len parai nai teaung iy, kai hawi ajo athui ai a? Huna nai sa ai ny y; mymy ly kai i hnei takeng nai pathang pi ai.

⁷Kai ly khumi kahawi ne nai deaungkho y, Tameuh teng y sa nai leaungsai amti pi pajau. Huna nai khala mymy ly kai teng y kamngo by y, nanai satang thai hai pi ai.

⁸Kai ly nisi mang y Tameuh ai kahau, na i py huni meingtym y mymy ly by y. Nidym mang y hau nai khala py, mymy ai avum y.

⁹Tameuh ly tosyh ngan tokalawi ngan mang y, kalopchi sa naimy awm; na i py mymy ai kai avum y.

¹⁰Na i py Tameuh ly kai i kheukanchi niu nai ne. Mymy ly kai ai cham lawh baly, kai teng y kamngo by y, nanai pany ai.

¹¹Kai ly mymy i vawi patyp nai lam y, ka-ym awm naimy katako nai ne. Mana khala py langvawi lamtang amphri vai y.

¹²Kai ly Tameuh my leu pei nai kamta, kasa jojo nai ne. Mymy i ngai nai kamta tako nai ne; kaimy i kangai tako y leang.

¹³Mymy ly mana khala py, paleung ka-dawn takhra vui y. Ami py mymy ai ka-keng ka-awi so pajau y. Mymy i sa ai ngai nai paka pajau y

¹⁴Mymy ly kai i vui khai pi nai katauchi sa pi takengkei ai; huni dawn tau nai ly nawi parai nai katauchi theung i harei ne.

¹⁵Hunai deaungkho y kai ly mymy i mo y jei hyn naimy kaawm.

¹⁶Ati cheaungkhang sa thai nai Tameuh ly kai i atho di hai vui bo. Veng nai deaungkho y kai i meichi ly niu pajau y teu i py kai ai jei hyn hai nai ly veng naira ny y, Tameuh ne.