Read Khumi Chin JOBA 28 Bible Online

JOBA 28 - Khumi Chin bible

JOBA 28

¹Tangka tai nai tangka angawmchi, muku patlawn nai meingtymchi awm.

²Khumichi ly khaileaung tai i, tamo nga u. Lengseaung ai patlawn i, kheupaja nga.

³Khumichi ly veng keh nai meingtymchira y chei iy hau u bo. Khaileaung anuichira y hau u; Vengpam naira y lengseaungchi tai u.

⁴Khumi i yhm by y nai meingtymchi hawi, khumi tym y nai meingtymchira y khumichi ly vang kateng theu nai angawmchi tapeu u bo. Khumi angso hawi palo nai huni meingtymchira y vuinawnchi mang abang iy kalop sa u nai ne.

⁵Khaileaung ly amti amjangchi theu hai; na i py huni khaileaung theung y ly mai my kang nai kamta deihpiu nai ne.

⁶Khaileaung theung y awm nai lengseaungchira y nila awm; spryhra y muku awm.

⁷Vang kateng theu nai angawmchira y chei nai lamchi ly mani amhmtlau py niu y; huni lamchi salo mang ly mani mo langna py akheang y.

⁸Khumi tym y nai huni lamchira y mani mo khrangsi, mani mo mawi kasi py aleaung ali y.

⁹Khumi ly khri pa-rei tang nai lengseaungchi ai malawn py tai u. Mawichi ai langdengra tym pa-rei panawi u.

¹⁰Nichi ly lengseaung mawichi ai tai takip nai thym khala, vang kateng lengseaungchi avum u bo.

¹¹Nichi ly tavo tuichi leaung amteaung nai sangum langdeng tym pa-rei tai u iy, a-up naichi patheaung u.

¹²Na i py tau cheng naira ly mani meingtym y avum pajau ai mo? Mani meingtym y cheng naira nga pajau ai mo?

¹³Tau cheng naira ly khumichi theung y hau i, niu pajau y. Tau cheng naira i vang teng nai ly ami py pany pajau y.

¹⁴Suida pangli thiu parai nairachi my achi teng y tau cheng naira by y, nanai pany hai bo.

¹⁵Tau cheng naira ai ly muku tangka hawi van pajau y.

¹⁶Muku tangcheng, vang kateng lengseaungchi hawi tau cheng naira ly vang pahyh pajau y.

¹⁷Tau cheng naira ly muku, kaseaung cheaungra muku khau, ti y baly uithawn lengseaung tleaung y vang teng keh.

¹⁸Tau cheng naira ly koral lengseaung, khawisaleng lengseaung, ti y baly amia hawi katheung ai nai ngo y.

¹⁹Hawi keh nai Topazi lengseaung hawi muku tangcheng ly tau cheng naira hawi vang pahyh ai nai ngo y.

²⁰Hunaibaly tau cheng naira i sangum langdeng ly ma mang y mo? Kaichi ly cheng naira ma mang y nga pajau ai mo?

²¹Mani heng nai amjychi py niu pajau y; akheang nai tavochi malawn py niu pajau y.

²²Ngari areng hawi dei areng malawn py, thai vai nai ryrei awm khyh, nanai paawi u nai ne.

²³Tameuh leaungrei naini huni lam hawi tau cheng naira awm nai meingtym pany khyh nai ne.

²⁴Ati mana nai mo nabaly mymy ly khaileaung katemchi hawi, kani anui y awm nai ngiereichi ai, niuse nai deaungkho y ne.

²⁵Tameuh ly ali ai sa thai naira pei iy, pangli i kakau pajyh pi nai khala py,

²⁶Kani nai ai nai meingtym hawi amlosadi khupanymchi am-eng ai nai sa pi nai khala py,

²⁷tau cheng naira ai niu i, huni i vang teng nai sai chih pi chum baly tau cheng naira ai paleung kangai khaw hai bo.

²⁸Tameuh my khumichi teng y, “Tau cheng naira awm ai nai ARENG ai jei naimy tahm khai ai nai tla. Tau cheng naira nga ai nai, hawi y nai asyn vui ai nai tla,” nanai leu pei bo.