Read Khumi Chin JOBA 29 Bible Online

JOBA 29 - Khumi Chin bible

JOBA 29

¹Joba my thui bi nai leu ly hini ne.

²Kai i awm nai sai ly Tameuh my kai ai ang kry nai thym khala i kamta, awm ali teang ai nai kangai parai.

³Huni neng khala Tameuh ly kai hawi vanrei awm nai ne. Kaveng theung y tako nai thym khala py, kai ai kangvang ang pei.

⁴Huni neng kanichi ly kai i nang chawn ai nai neng kani ne. Tameuh ly kai hawi amrawi i, kai i yhm y ama hai iy ang kry nai ne.

⁵Huni neng khala ati cheaungkhang sa thai nai Tameuh ly kai hawi vanrei awm nai deaungkho y, kai ai chapo chanauchi my ang awm hai mang nai ne.

⁶Kai i sichi, mi-ichi teng i kanu hang neangneang nga; kai i Olive keungchi ly lengseaung nawi nai meingtymra y malawn py, prau nai ne.

⁷Mary i miteaung kehchi leu ka-rumra y kai chei nai tleirei,

⁸khumi ka-cheangchi ly kai ai niu baly lam aheng u bo. Miteaung acheang naichi ly ang thau iy tahm khai u.

⁹Mipuichi ai lu sa naichi ly leu katheu nai anawn u vui bo.

¹⁰Aly len keh nai khumichi malawn py awm u sup bo.

¹¹Kai ai nui vai nai khumi, kai i satang pany reng nai khumi bawibawichi ly kai i sa nai saichi palo u.

¹²Khumi kamawnchi, jeaungmang nai nuro nukai chochi vo hang nai khala, kai ly kasabawm nai ne.

¹³Khrikhri pa-rei paleung mawn nai khumichi my kai ai palo u. Kai ly neampachy lumaichi ai awmnem naira pei pi bo.

¹⁴Kai ly hawi naira hawi, adyh adawi naira y atyp jojo.

¹⁵Kai ly mei kamjuchi i mei kamta, kheu kangbaichi i kheu kamta lawm bo.

¹⁶Kai ly khumi kamawnchi i ampo kamta ne; Patang naira avum nai apany vai y nai khumichi i, atitira y abawi pi nai ne.

¹⁷Khumi hawi y naichi i nuh khei vui iy, nichi i kiu y ana naira avum nai khumichi ai atleu pi bo.

¹⁸Kai ly heng sau naimy awm ai nanai py, amy i yhm y paleung savairu naimy dei ai nanai py, athang khai jojo nai ne.

¹⁹Kai ly tangjynchi tui avawrei nga iy, changpichi py kadam tui sui nanai pa-rei nga nai dengkeaung keung hawi atawm.

²⁰Khumi luteng ly kai ai palo u nai ne. Kai i atho ly mana khala py bai y.

²¹Kaimy tau pei nai khala, khumichi ly awmsup naimy kai i thui nai ai hawihai tangai u bo.

²²Kai thui chum nai khala, nichi my thui panawi bi ai nai sairei py by y. Kai i leuchi ly kani tuichi kamta, nichi teng y num jo bo.

²³Li hlau sa naichi ly kanipui tym en nai kanitui kadeaung nai kamta, khumi bawibawichi ly kai i leu ajeng naimy awm u nai ne.

²⁴Nichi paleung phra atho di nai khala, nichi ai kaimy panui pi yhm bo. Kai i amo theu nai meimai niu nai khala, nichi atho nga u.

²⁵Kai ly nichi i vui ka-vo sa pi iy, leu pacheang pi bo. Amy i tavaimichi ai lu sa lam patei pi nai samrang kamta, kai ly nichi ai lu sa iy lam patei pi bo. Nichi paleung phra atho di nai khala, kai ly nichi ai paleung pahawi pi nai ne.