Read Khumi Chin JOBA 32 Bible Online

JOBA 32 - Khumi Chin bible

JOBA 32

¹Joba ly mymy teng y kamngo by y, nanai ym thleng nai deaungkho y, huni ahawi leaung thomreichi ly ni teng y thui u ali teang y leang bo.

²Joba ly mymy ai khumi kahawi nanai thui iy, Tameuh ai hawi y pei nai deaungkho y, nichi sahawi y angdo nai Eliho ly my i kado theu nai am-yh pajau y bo. (Eliho ly Buza kangpreang, Ramah nupai, Barakela i chapo ne.)

³Ni ly Joba i ahawi leaung thomreichi ai py, kado theu hai. Nichi ly leu ei u pajau y nai molam y, Tameuh ly hawi y nai kamta palawn u bo.

⁴Hunichi theung i Eliho ly saneng theang keh nai ne i, nichi bawibawi katheu pajau nai ryrei ajeng.

⁵Joba ai nichi leaung thomrei my leu ei vui pajau y, nanai pany nai khala Eliho ly kado theu iy,

⁶leu katheu amteaung nai ne. Kai ly saneng theang, nangchi ly saneng len; hunai deaungkho y kai i ka-dawn, nangchi teng y kang thui pi vam y.

⁷Nangchi saneng len naichi ly amy i cheng naira phy paji ai nai avo iy, huni ly nangmychi naimy katheu ai nai avo, nanai kai dawn nai ne.

⁸Na i py khumichi ai cheng naira pei nai keung ly ati cheaungkhang sa thai nai Tameuh i phailo ne.

⁹Saneng len naimy ly khumi ai tau cheng naira awm hai nai ny y; kateng lam pany hai ai nai py, kasabawmra pei nai ny y.

¹⁰Hunai deaungkho y kai i thui nai ai vai, nangchi tangai u cham; kai i athang khai nai ka-dawn ly nangchi teng y kang thui pi ai nai ngai parai.

¹¹Nangchi leu katheu u nai thym khala, kai ly paleung sau parai naimy tangai. Tau kacheng abawi nai leusai kapathichi nangchi adawn u nai thym khala py, kai ly ajeng jo nai ne.

¹²Kai ly nangchi i thui nai leusai tangai patumpati nai ne. Na i py nangchi leaungrei py, Joba ai ei u pajau y,

¹³Nangchi ly tau cheng naira hau nai avum bo, nanai mana thui pajau ai mo? Nangchi ly Joba ai leu patheung teang pajau y nai deaungkho y, Tameuh my pathang pi ai nai tla ai.

¹⁴Joba ly nangchi ai ang thui nai ne; kai ai ny y leang. Na i py kai ly nangchi pathang nai kamta, mana khala py pathang ai ny y.

¹⁵Joba awi, nichi ly katheu ai nai leu by y leang bo; nichi ly nang teng y pathang ai nai leu by y leang bo.

¹⁶Kai ly nichi leu katheu y nai thym khala, ajeng veangveang ai nai tla ai a? Nichi ly katheu bi ai nai leu by y bo i, huni meingtym y angdo naimy awm u bo.

¹⁷Kai ly ajeng pajau y leang bo; kaimy i thui ai ngai nai leuchi vai, kang thui pi ai. Kaimy i thui ai awm nai ly, nang teng y kang thui pi ai.

¹⁸Kai ly leu katheu y naimy awm ai nai am-yh pajau y bo. Kaimy i labeaung mang theu nai leuchi ai, paka pajau y bo.

¹⁹Kai ly leu katheu ai nai ngo y lawh teu baly, kreip hang kangtha kawi meng nanai mawipeih adym kamta, kai ly apeupha ai bo.

²⁰Kai ly leu katheu y naimy awm pajau y bo.

²¹Kai ly meimai akhen y naimy katheu ai. Ami ai py palo hawp nai leu katheu ai ny y.

²²Kai ly mana palo hawp nai leu katheu ai mo, nanai malawn py pany y. Kai ly palo haw nai leu katheu lawh teu baly, Tameuh my kai ai vaimy pajeng sy.