Read Khumi Chin JOBA 33 Bible Online

JOBA 33 - Khumi Chin bible

JOBA 33

¹Joba awi, kai i thui ai awm nai ngiereichi ai vai, hawihai palai tangai ba.

²Kai ly kaimy i paleung theung y awm nai kamta, kang thui pi keng ai.

³Kai i leuchi ly paleung pathym kahawi hawi, kang thui pi nai leu ne. kai ly leu meitang katheu ai.

⁴Tameuh i phailo ly achi ai sa iy, hengra py pei nai ne.

⁵Nang pathang pajau lawh baly, kai teng y pathang ba; leu tlau teang ai nai leaungsaichi py adawn yp ba.

⁶Nang hawi kai ly Tameuh i mo y takhra y leang; ani ai ly spryh hawi sa nai ne.

⁷Hunai deaungkho y nang ly kai ai jei ai nai lam by y. Kai ly nang i tlang tleaung y kamjau kamteang sa ai nai khumi ny y leang.

⁸Nang i thui nai leu ly kai thai chum bo; nangmy,

⁹“Kai ly hawi y naira ati sai py kaso y, kai ly kamngo awm nai khumi ny y leang.

¹⁰Na i py Tameuh ly kai i tlang tleaung y kamsi hau iy, paleung ka-e kamta ang thui nai ne.

¹¹Mymy ly kai i kheu ai sengkry hawi pakheng bo; kai i kheukan ngiereichi ai ang khen patawm jo nai ne,” nanai thui.

¹²Na i py Joba awi, nang i thui nai ly tamang bo; Tameuh ly khumi tleaung y len keh nai ne.

¹³Tameuh ly khumi i hnei takeng naichi ai, mana khala py tangai pi y, nanai nang ly ati mana nai y, mymy ai thui tamawn lawh mo?

¹⁴Tameuh ly leu pei aninau teu i py, ami py mymy i leu ai tahm khai u y nai ne.

¹⁵Tameuh ly vum y khumichi i nai thym khala amteng hai naichi hawimy leu pei.

¹⁶Mymy ly my i leu pei naichi ai thai hai pi bo; nichi ly mymy i pany hai nai leu thai i, jei hyn u bo.

¹⁷Nichi ly kamngo satamang nai anawn hai ai nai hawi, amlyh am-e nai by y ai nai Tameuh ly nichi teng y leu pei nai ne.

¹⁸Mymy ly nichi ai myh kang hai ai ny y; deira i malawn py atleu nai ne.

¹⁹Tameuh ly khumi ai nosora i nai py, tlang patang naira avum hai naira i nai py, thui parip nai ne.

²⁰Noso nai khumi ly labeaung phra i, cha amlyn parai nai, cha kahawi nei kahawichi ai malawn py, paleung myn nai ne.

²¹Ni i ngan tlang ly jei i, hiuchi py amteng na bo;

²²Ni ly tavau pri y chei ai nai kasa bo.

²³Na i py khumichi ai amy i sa ai nai kalopchi pany ai nai Tameuh my pato nai, kani pri amtaw thau nai sang neangneang awm; nichi theung y leaungrei ly ni ai sabawm ai nai amtengtan amteng pi lym ai.

²⁴Huni kani pri amtawi thau naimy ly pahen i, “Ni ai patleaung pi! Ni ly tavau pri y satla ai nai ny y. Ni ai atleu ai nai vang ly hi y awm,” nanai thui ai.

²⁵Huna nai khala ni i ngan tlang ly ka-veang thym i ngan tlang lawm ali teang ai.

²⁶Tameuh ly huni khumi i chiu sa nai pathang pi ai; ni ly Tameuh ai amo theu parai naimy chiu ai; Tameuh ly ni ai angchei i kuchira y tym hai ali teang ai.

²⁷Ni ly mipuichi mo y, “Kai ly kamngo sa tamang lawh bo; hawi naira kaso y teu i py, Tameuh ly kai ai atleu.

²⁸Mymy ly kai ai tavau pri y chei hai y bo; naibaly kai ly vai, kaheng jo rai,” nanai thui ai.

²⁹Tameuh ly hina nai kamta sa aninau nai ne.

³⁰Mymy ly khumi i hengra ai atleu iy, ni ai amo theu naimy heng ai nai pei bo.

³¹Joba awi, vai, kai i thui nai leu tangai ba; awm pypy iy, kai ai leu katheu ai nai pei ba.

³²Na i py nang i thui ai naichi awm lawh teu baly, kai tangai kyh si; kai ly nang i leu kateng ne, nanai amo theu naimy leu pajeaung ai nai ngai.

³³Na i py nang i thui ai nai leu by y lawh baly, awm pypy iy kai i thui nai leu tangai ba; tau cheng naira nga ai nai lam, nang ai kaimy patiu pi ai.