Read Khumi Chin JOBA 34 Bible Online

JOBA 34 - Khumi Chin bible

JOBA 34

¹Tau cheng nai hawi lulip pany thai nai keungchi awi, vai, kai i thui nai leu tangai u.

³Labeaung palai hawi teicha teineichi pateang nai kamta, kano my leu cham reng nai ne.

⁴Kateng lam achimy leu pacheang u sina; hawi naira achimy pany u sina.

⁵Joba ly my teng y kamngo by y, Tameuh ly ni i molam y meitang naimy chih pi y, nanai thui bo.

⁶Ni my, “Kai ly tamang y pui naimy tamang, nanai mana ka-chawi thui lawh thai ai mo? Kai ly dei ai nai pa-rei no nga teu i py, kamngo by y nai khumi ne,” nanai thui bo.

⁷Joba ka-tawm khumi ai nangchi niu vai a? Ni ly Tameuh ai mana khala py, tahm khai nai khumi ny y.

⁸Ni ly khumi hawi y naichi hawi amkawm iy, kamngo sa naichi hawi, ahawi nai ne.

⁹Ni my, “Tameuh i kangai sa nai ly kamran by y,” nanai thui.

¹⁰Aw tau cheng nai khumichi awi, kai i thui nai leu tangai u! Ati cheaungkhang sa thai nai Tameuh ly teng y nai so na a?

¹¹Mymy ly khumichi ai mymychi i sa nai kamlau, hawi nai hawi y nai pei iy, nichi nga ai ataing nai ryrei, avum hai reng nai ne.

¹²Ati cheaungkhang sa thai nai Tameuh ly hawi y nai so y leang. Mymy ly ami ai py teng y naimy tara chih y leang.

¹³Tameuh ly mymy i sa thai naira ai, khumi leaung leaungrei teng i dengdairei nga nai sai a? Khumi leaung leaungrei my, mymy teng y khaileaung pri peang ai nai pei nai sai a?

¹⁴Tameuh my hengra la pi vui lawh teu baly,

¹⁵heng nai khumi bawibawichi ly dei u ai i, spryh lawm u ali teang ai.

¹⁶Nangchi ly cheng naira awm baly, kai i leu tangai u.

¹⁷Nangchi ly leu meitang adyh adawi hai nai Tameuh ai thui tamawn u lawh a? Mymy ly leu meitang adyh adawi nai aly ngai y, nanai athang khai u a?

¹⁸Samrangchi hawi bangtangchi, hawi y nai sa u nai khala, Tameuh ly nichi ai pajeng nai ne.

¹⁹Tameuh ly khumi cheng cheaungkhangchi ai sa nai ne i, samrangchi ai meimai khen patleh y. Khumi kanangchi ai khumi kamawnchi tleaung y meimai khen patleh y leang.

²⁰Khumi ly vum y vaimy dei leu reng; Tameuh my pajeng nai khala, khumichi ly dei u nai ne. Mymy ly atho len nai khumichi ai, rai y naimy tamyh pawn.

²¹Mymy ly khumi i kheukan ngierei, khen patawm jo nai ne.

²²Kamngo sa tamang nai khumi ai, Tameuh my niu pajau y ai nai pa-rei, veng hai nanai kaveng ly by y.

²³Tameuh ly khumichi teng y, mymy i tara chih ai nai neng kani khai takhra pi ai nai aly by y.

²⁴Mymy ly pri peang nai miteaung kehchi ai palau iy, huni i jeng y khai takhra ai nai chih chumchi ai nai aly ngai y.

²⁵Mymy ly nichi i sa nai saichi pany nai deaungkho y, nichi ai vumrei y my pala vui iy tamyh vui bo.

²⁶Kamngo sa tamang nai khumichi ly mymy nithun abang u y iy,

²⁷leu pei naichi tahm khai u y nai deaungkho y, mymy ly nichi ai, khumi mipuichi i mo y pajeng nai ne.

²⁸Huni khumichi i pahyp y naimy ana naira avum nai, khumi kamawnchi ly Tameuh teng i kasabawmra hnei ai nai aeu u nai khala, mymy ly nichi i aeu nai raawi thai.

²⁹Tameuh ly ati sai py ny y naimy awm ai nai dawn lawh teu i py, ami py mymy ai thui tamawn pajau ai ny y. Mymy ly my i meimai hi pi vui lawh ai nabaly, khumichi ly kajeaung kamang lawm u ai.

³⁰Khumi cheng bawibawichi ly samrang hawi y naichi my peang naira i nai, law tleaung ai nai ati sai py, so u thai y leang.

³¹Joba awi, nang ly amy i kamngochi, Tameuh teng y uikheih naimy amti pi iy, mo mang y kamngo so bi y ai nai adeu chum bo a?

³²Nang i tamang naichi pany hai ai nai, Tameuh teng y amti pi bo a? Nang ly sa tamang bi ai ny y leang bo, nanai thui pi chum bo a?

³³Nang ly Tameuh i sa nai ai ei vui nai deaungkho y, nang ly nangmy i ngai nai kamta, Tameuh my ang sa pi ai, nanai athang khai pajau ai a? Hini molam y adawn pasym ai nai khumi ly nang ne, kai ny y. Nang i dawn tau nai kaichi teng y thui pi be.

³⁴Tau cheng naira awm nai khumi ngiereichi ly kai i leu tangai u ai. Kai i leu thai u nai khumi kachengchi my,

³⁵“Joba ly dawn pany y nai y thui nai teu; ni i leuchi ly ati sai py ny y leang,” nanai thui u ai.

³⁶Joba i thui nai leu ngiereichi adawn cham baly, ni ly khumi hawi y nai kamta katheu, nanai nangchi pany u ai.

³⁷Ni ly my i sa tamang nai kamngochira y, tiu naira my tleangra i, achi i mo y Tameuh ai panui pachem hai bo.