Read Khumi Chin JOBA 36 Bible Online

JOBA 36 - Khumi Chin bible

JOBA 36

¹Tameuh i jeng y kai i thui nai leu ai kham tanga naimy maidenreichy tangai pi bi rai.

³Kai i cheng naira ly kau parai; kai ai sa nai keung Tameuh ly meitang ne, nanai kai i cheng naira teaung iy thui pi ai.

⁴Kai i thui nai leuchira y, teng y nai leu abawi y; meitang khyp, khumi kacheng leaungrei ly nang i mo y ang tym bo.

⁵Tameuh ly khrikhri pa-rei sa thai naira len parai na ly! Mymy ly ami ai py cheh y; mymy i pany y nai ati sai py by y.

⁶Mymy ly kamngo sa nai khumichi ai, heng sau ai nai pei y; khumi kamawnchi ai kateng chih pi nai ne.

⁷Mymy ly khumi kahawichi ai kry. Nichi ai samrangchi kamta peang hai iy, tahm pasang jojo.

⁸Na i py khumichi ly mychi i sa tamang nai molam y, sengkry hawi pakheng nai avum iy, ngari kamtang avum u nai khala,

⁹Tameuh ly nichi i kamngochi hawi, amlyh am-e nai pany hai bo.

¹⁰Mymy ly nichi teng y mymy i pany hai nai tangai iy, kamngo asyn hai bo.

¹¹Nichi ly leu tangai iy Tameuh i kalop sa u lawh teu baly, heng nai sala ryrei nang chawn iy, tlamsa naimy awm u nai ne.

¹²Na i py nichi leu tangai u y lawh baly, cheng naira by y naimy dei iy, tavau pri y ang vum u ai nai tla.

¹³Tameuh by y nai khumichi ly kado theu kari theu u jo nai ne; kamngo pajeng naira avum nai khala malawn py, mymy teng y kasabawmra hnei u y.

¹⁴Nichi ly saneng nau khala malawn py, tahm anem naichi lawm iy atho bai naimy dei u nai ne.

¹⁵Na i py Tameuh ly khumichi ai no patang nai hawi parip iy, ngari kamtang hawi nichi i mei angvang hai bo.

¹⁶Tameuh ly nang ai patangra i nai atleu iy, chymme naimy awm ai nai pei i, nang i sabawi salo y cha kahawi, nei kahawi neangneangchi ang khai pi chawp nai ne.

¹⁷Na i py vai, nang ly nangmy nga ai ataing nai, kamngo pajengra avum naimy awm bo.

¹⁸Un langseaungchi my parawi paryp naira avum y ai nai adawn patyp ba. Yhmtheaung katuichi molam, teng y nai lam mang y tako vui lawh moh.

¹⁹Kasabawmra nga ai nai vo naimy hnei nai ly nang i vui kamran awm ai ny y; Nang chawn nai haiho ngierei ly nang ai vai, atleu pajau y leang.

²⁰Khumi cheng bawibawichi myh kang vui ai nai, vum aneng ai kadeaung moh.

²¹Hawi y nai asyn vui ai nai dawn patyp ba; huna nai asyn vui ai nai, Tameuh ly nang ai ngari kamtang avum hai nai ne.

²²Mymy i sa thai naira ly mana tanrei len na mo, nanai pany jo ba; Tameuh ly cheaungkhangchi i, len keh nai sara ne.

²³Ami py Tameuh ai pacheang pajau y; mymy ly hawi y naira sa, nanai neng hai pajau y.

²⁴Tameuh i sa nai saichi molam y, mymy i tahm awm nai ai khumichi my avawrei palo u.

²⁵Mymy i sa nai saichi ai khumi luteng my niu u; na i py achi ly kamlo mang my niu pajau nai ne.

²⁶Achi ly Tameuh i nang parai nai sai pany bawi pajau y; saneng py kati pajau y.

²⁷Khaileaung salo i tui la iy, kani amaichi lawm hai nai keung ly Tameuh ne.

²⁸Mymy ly khumichi chawn-pa ai nai khupanym mang my kani nai hai bo.

²⁹Mymy i awm nai kani mang y khupanymchi akheang nai hawi kani pajyh nai ly ami py pany pajau y; kani mang y awm nai Tameuh ly pany nai ne.

³⁰Mymy ly kani mang y amlosadi theu hai; na i py pangli thiu parai nai meingtymchi ra y vengpam nai ne.

³¹Hina nai kamta mymy ly khumichi ai pacho. Nichi ai teicha teinei neangneang pei pi.

³²Mymy ly alipakang ai kiu hawi syn iy, patyp naira y chawm hai khyp bo.

³³Kani pajyh nai katyn ly alipui khupui nai hai ai, nanai thai hai. Hunai deaungkho y si, painochi ly alipui khupui nai ai, nanai pany nai ne.