Read Khumi Chin JOBA 38 Bible Online

JOBA 38 - Khumi Chin bible

JOBA 38

¹Hunaibaly ARENG ly alipui khupui theung mang dengdairei, Joba teng y leu pei nai ne.

²Cheng naira by y iy ati sai py ny y nai leuchi katheu i, kai i tau cheng naira ai ym y nai khumi ly ami mo?

³Vai, nang ly neampacho tatang baly angdo iy, kai i deng nai leuchi pathang ba.

⁴Khaileaung ai kaimy palum angchei nai khala nang awm a? Nang ly khri pa-rei dawn pany thai lawh teu baly, kai ai thui pi cham.

⁵Khaileaung kakau ai ami my sa mo? saju amto vui ai ami my ryh mo? Hini deng nai leuchi nang pathang pajau a?

⁶Khaileaung ai tawi kalau nai yhmtawichi ai ati my amkhaw cheng mo? Khaileaung pri i taki lengseaung ai ami my tahyh mo?

⁷Huni kani khutawimo neng khala, ka-sichi ly khulym raawi kangngeng thui u bo. Kani pri mang ichi py, amo theu parai naimy palo u.

⁸Pangli ly khaileaung i kajeu mang dengdairei theu nai khala, pangli ai paka ai nai katheu pa-khochi ami my kho vui mo?

⁹Pangli ai khupanymchi hawi khiu iy, kaveng hawi bam nai keung ly kai ne.

¹⁰Kai ly pangli i vui khujyh pajyh pi chum baly, huni ai katheu lengteaung atleang veng nai, katheuchi theung y awm hai bo.

¹¹“Nang ly hini ryrei tako ai nai nga khyh, hini bo katlen pajau y! Nang i len parai nai tui sampyhchi ly hinira y anawn ai nai tla,” nanai pangli ai kaimy leu pei yb bo.

¹²Joba awi, nangmy i deung y mana khala khutawi ai mo, nanai leu pei vai a?

¹³Nang ly khutawimo teng y, “Khaileaung ai amkhaw cheng iy, khumi hawi y naichi ai aheura i nai patheu vui,” nanai leu pei vai a?

¹⁴Kanito i kangvang ly mawichi hawi leaunghawichi ai aneaung kapan salo y nip typ nai ka-ma-ra lawi kamta, amkhyn teung nai ateaungchi kamta, amny hai champyn bo.

¹⁵Kanithun kangvang ly khumi hawi y naichi i vui khri pa-rei angvang parai nai deaungkho y, khrukhra nairachi so u vam y.

¹⁶Nang ly pangli thiu parai nai meingtymra y awm nai, tuino khochira y tym vai a? Suida pangli paichi salo y nang aleaung vai a?

¹⁷Ami my mo nang ai vengpam nanai tavau pri y kun nai katheu pa-khochi ang patei vai a?

¹⁸Khaileaung pri ly mana tanrei len na mo, nanai nang pany a? Pany lawh baly kai ai thui pi.

¹⁹Kangvang theu nai meingtym, vengpam nanai i pakeung sangumchi ai nang pany a?

²⁰Kangvang hawi kavengchi ly mani meingtym ryrei tym pajau mo, nanai hawi, hini i vawi nai lam ai nang patei pajau a?

²¹Nang ly hini khaileaung pri ai kaimy so y rai khala my, tapen nai deaungkho y khri pa-rei saneng len na bo i, hunichi pany ai.

²²Nang ly kadam amaichi hawi ji amaichi pateung achu naira y tym vai a?

²³Hunichi ai patang naira tym nai neng hawi, tavai takai atiu nai neng i vui, pateung achu nai ne.

²⁴Nang ly kani si nai meingtym hawi nisi ali aho amteaung nai meingtymchira y tym vai a?

²⁵Kanitui leaung nai leaunghawichy, alipakang ko nai lam ai ami my sa mo?

²⁶Khumi by y nai meingtymchira y, ami my kani nai hai mo?

²⁷Acha keungchi prau hai ai nai, phuirawm nai khaileaung ai ami my tui nga hai mo?

²⁸Kani tui hawi kadam tuichi i ampo awm a?

²⁹Tuikhi hawi kadam akawi i amhm ly ami mo?

³⁰Tui ai lengseaung kamta lawm hai iy, pangli tui prang ai, ami my tuikhi prang lawm hai mo?

³¹Nang ly ka-si niprawnchi ai kachu iy, thangthleng pajau na a? Eulo kangjeaung ka-sichi pakheng thleng nai su vui pajau na a?

³²Nang ly ka-si taukichi ai neng tleirei theu hai pajau na a? Ka-sideung, ka-si saleng ai lam patei pajau a?

³³Kani khusangra y kari awm yb nai nang pany a? huni awm kari ai khaileaung hawi py, amtawn abi hai pajau na a?

³⁴Nang ly aeu naimy khupanymchi ai leu pei iy, khri pa-rei kani nai hai pajau a?

³⁵Nang ly amlosadi theu ai nai leu pei lawh teu baly, amlosadi kangvangchi my, “Kaichi ly nang i leu tangai ai nai angveirym nai ne,’ nanai thui u na a?

³⁶Naing tavo tui leaung ai nai neng ly tuisakreu tavo[9]ai ami my thui pi mo? Kani nai ai nai neng ly a-talui teng y ami my thui pi mo?

³⁷Khupanymchi ai kati ai nai spryh ai khaileaung akawi lawm hai ai nai,

³⁸kanitui ai kani mang i tui laawmchira i dengdairei, adiheu ai nai ami sa thai mo?

³⁹Nang ly khrangsichi i vui teicha hau pi thai a? Khrangsi chochi ly tapiuchira y aeung iy, awm nai khala y,

⁴⁰daichi mawi khochira y oh nai khala, nang ly nichi i teicha ka-lam dam hai pajau na a?

⁴¹O-achi ly teicha alam naimy akheang nai khala, nichi i chochi ly kai teng y hang naimy teicha hnei u nai khala, nichi ai pacho panei nai keung ly ami mo?