Read Khumi Chin JOBA 4 Bible Online

JOBA 4 - Khumi Chin bible

JOBA 4

¹Joba awi, kai ly nang ai kang thui pi baly, paleung hawi y nai awm na a? Kai ly kaawm pypy jo thai y.

³Nang ly khumi neangneangchi ai thui parip. Atho di naichi ai khaw hai.

⁴Atho di akawm iy atlym vi nai khumi ai, nang ly atho pei nai leu thui naimy khaw hai bo.

⁵Patang naira avum ai nai vai, nang teng y kamki tym nai khala ly nang ly patang naira avum vam y na pa-rei, ngam su naimy awm bo.

⁶Nang ly Tameuh ai chiu naimy ahihawi iy, kamngo thui bira by y na pa-rei, awm nai khumi ne nai deaungkho y, nang i paleung theung y ym iy, athang khai thai nai ka-dawn awm ai avo nai ne.

⁷Nang adawn ali teang cham rai; mani khumi kahawi ly khri pa-rei patang naira avum vai mo, nanai kai ai thui pi cham.

⁸Khumichi ly sa tamang nai li thawn iy, kamngo ti hei u nai kaniu. Vai i neng khala huni khumichi ly hawi y nai hawi sa tamang nai athaichi pakym u ai nai tla bo.

⁹Tameuh ly kado theu nai deaungkho y, ali kamchai kamta nichi ai taphra pawn bo.

¹⁰Khumi hawi y naichi ly khrangsi kamta, hang u reng nai ne. Na i py Tameuh ly nichi i hang nai katyn anawn hai iy, nichi i hochi takheaung pi pawn bo.

¹¹Nichi ly cha ai nai daichi mawi avum y nai, khrangsichi kamta dei u. Nichi i cho chanauchi py, ahei u akyhkyh bo.

¹²Vaichi khala kai teng y amteng hai nai raawi katyn ly kangjaichy ang tym bo. Huni amteng hai nai raawi katyn ly kangjaichy ala nai deaungkho y, kathai hawi hai y.

¹³Khumichi ly i kamhm tup nai khala, mo mang i vui ka-dawnchi molam y athengra na bo.

¹⁴Kai ly athengra i, kaso tahyn theu naimy kaawm bo. Kai i tlum tlang verei py, jei nai paleung hawi anghyn na.

¹⁵Ali theu pryn nai ly kai i meimai y aho pryn nai khala, kai ly khuma aphau na bo.

¹⁶Mo-cha harei angdo nai kai ly niu. Kai ly khen kalingie teu i py, huni mo-cha ly ati amjy mo, nanai kathui thai y. Hunaibaly tynteng y nai theung i, theu nai katyn thai bo.

¹⁷Huni katyn my, “Khumi ly Tameuh i mo y, khumi kahawi lawm pajau na a? Mani khumi ly amy ai sa nai keung i mo y, kamngo by y naimy awm pajau na a?

¹⁸Tameuh ly mymy i kani pri amtaw thau naichi ai malawn py ym y. Mymy ly kani pri amtaw thau naichi ai kamngo niu.

¹⁹Mymy ly khaileaung hawi sa nai, spryh hawi palum iy mipo ai kamta taphra pajau nai, heng nai amjy khumi ai ym ai, nanai nang ly athang khai a?

²⁰Khumi ly khawn mang y heng naimy awm i py, dym tengsa neng y ami py dawndan y naimy dei reng nai ne.

²¹Ni ly my i yhmtheaung katui ngiereichi sum i iy. tau kacheng by y naimy dei nai ne,” napi.