Read Khumi Chin JOBA 41 Bible Online

JOBA 41 - Khumi Chin bible

JOBA 41

¹Nang ly tuireng nam [11] ai sakawi hawi patiu pajau na a? ti y baly ni i palai angto y na pa-rei, vuinawn hawi thang pajau na a?

²Nang ly ni ai nodo pheu pajau na a? ti y baly ni i tengtabyh ai tamo leangkhawn hawi vawn vui pajau na a?

³Ni ly mymy ai patleaung ai nai, nang teng y takeng na a? Mymy ai pahen ai nai ahui na a?

⁴Ni ly nang hawi leu sumneang asa iy, deungrei nang i miseaung achei ai nai adeu na a?

⁵Nang ly khawn nai tavo ai tamau nai kamta, ni ai tamau ai a? Nang i miseaung neampachychi i vui amau hai naira kamta, thang thleng ai a?

⁶Ngo jo nai keungchi my ni ai van ai nai, vang aprai u ai a? Ka-sum ka-pai sa nai keungchi ly ni ai jo ai nai tawp piupa u ai a?

⁷Nang ly ni i peih ai nga-pichi hawi thun piupa ai a? Ni i lu ai sakawi amtaw hawi, prida na pa-rei thun pajau na a?

⁸Ni ai tlenrei teaungdei baly, vai tlenrei teaungdei bi ai nai vam ai ny y; ni hawi acham nai ai mana khala py, tami pajau ai ny y.

⁹Tuireng nam ai niu nai ngierei ly jei naimy, khaileaung y atlym nai ne.

¹⁰Huni heng nai amjy pui ly paleung phui nai khala, khri pa-rei jei ai nai hawi parai; ni i mo y ami py angdo vam ai ny y.

¹¹Tamokalem ngo hai y naimy, ni hawi atiu acham pajau nai khumi awm na a? Khaileaung pri verei y, hina nai sa pajau nai khumi leaungrei py by y.

¹²Tuireng nam i kheuchi hawi, ni i mana tanrei atho ham iy len na mo, nanai satang kang thui pi ai.

¹³Ni i ngan peih ai ami py lei pajau y; tamo baichu hawi atawm nai ni i ngan peih sambeu ai, ami py thunmei pajau y.

¹⁴Ami nai ly ni i labeaung taai pajau ai mo? Huni labeaung theung y amjyn hyh nai hochi ly ka-jei hawi parai.

¹⁵Ni i anam keungleungra y lengseaung kamta tang i, ha harei hawi abiri naimy pajyn hyh nai, khupui hawi atawm nai ahlichi awm.

¹⁶Huni ahlichi ly ha harei hawi khri pa-rei abiri nai deaungkho y, ali malawn py kun thai y.

¹⁷Hunichi ly mana mo i py, takheaung pajau y pa-rei khaw parai naimy amtawn cheng nai ne.

¹⁸Ni i pasei nai khala kangvang ko na iy, ni i meichi ly theu angchei nai kanito kamta angvang phang na.

¹⁹Ni i labeaung mang mai kadeu theu iy, mai kalichi achen na bo.

²⁰Alai laawm anui y mai amtawi nai acha keungchi i maikhyh kamta, ni i notareang mang maikhyh theu nai ne.

²¹Ni i taho nai ali ly maisaei ai mai amtawi hai iy, ni i labeaung mang maikadeu theu.

²²Ni i kaneaung ly khri pa-rei atho awm nai deaungkho y, ni ai niu nai ngiereichi ly jei hyn u bo.

²³Ni i ngan peih ly naudyp nai harei py by y i, tamo kamta tang iy khaw parai.

²⁴Ni i paleung pakawi ly lengseaung pui kamta amchyh y i, lengseaung sum kamta tang iy khaw parai.

²⁵Ni i ang thau nai khala, atho awm parai naichi malawn py, jei phi nai deaungkho y, mynkym u na bo.

²⁶Ni ai tamokalem nga hai pajau nai haisau, nanai by y; mani mo nga-pi, thailiho chyn, ti y baly tivi py ni ai no ngo hai pajau y.

²⁷Ni ly tamo beang ai chohphi kamta, kheupaja ai dengkeaung karaw kamta dawn nai ne.

²⁸Thailiho chyn hawi ko iy, ni ly angpreng y; lijai hawi ko nai lengseaung akawichi ly ni i vui chohphichi kamta lawm.

²⁹Ni ly samtleang ai chohphi kamta dawn nai ne. Khumichi my nga-pi hawi thun nai khala, ni ly panui hai lawh.

³⁰Ni i kajeu po-lora i ahlichi ly laawm ka-kawi kamsuichi atawm nai deaungkho y, ni i ambeu nai tarawi y ava nai khala, aneaung kapanra y, lithawn lawichi kamta lawm bo.

³¹Ni ly pangli ai lilu piu i, tiubi laawm kamta kado thlauthlo hai naimy, asitui laawm kamta phawn theu hai bo.

³²Ni ly my i tako nai lam ai tlisyh nanai lam lawm hai i, panglira y tuiphawn kangleungchi kaleung pun hai na bo.

³³Khaileaung salo y ni ai, mani daichi mawi hawi py, pata ai nai ngo y. Ni ly ka-jei ka-hyh by y nai heng nai amjychi lawm bo.

³⁴Atho len keh nai daichi mawichi ai malawn py, tahm khai y; Ni ly daichi mawi cheaungkhangchi i samrang ne.