Read Khumi Chin JOBA 42 Bible Online

JOBA 42 - Khumi Chin bible

JOBA 42

¹Hunaibaly Joba ly ARENG teng y hina nai pathang bo.

²Aw ARENG, nang ly ati cheaungkhang sa thai nai keung ne, nanai py, nangmy ngai nai kamta ati cheaungkhang sa pajau, nanai py, kai pany bo.

³Kai ly tau cheng y nai khumi ne iy, ati mana nai y nang i tau cheng nai ai ym thai y nai awm lawh nai ai nangmy deng bo. Kai ly kaimy i pany thai y nai leaungsaichi hawi, kaimy i tau pho pajau y nai lyh ai hawi parai nai saichi satang thui lawh bo.

⁴Nangmy, “Nang ly kaimy thui pi nai thym khala tangai iy, kai i deng nai leuchi pathang ba,” nanai kai teng y leu pei bo.

⁵Vaichi khala kai ly nang i satang ai kano hawi thai khyh nai ne; na i py vai ly nang ai mei hawi kang niu bo.

⁶Hunai deaungkho y kai ly kaimy i katheu chum nai leuchi molam y, kaji naimy spryh hawi maidym theung y ateh iy, uikheih naira nga bo.

⁷ARENG ly Joba teng y hina nai leu pei chum baly Eliphe teng y, “Kai ly nang hawi nang i ahawi leaung nyhrei tlang tleaung y kado theu bo. Nangchi ly kai i satang ai kai i miseaung Joba kamta meitang khyp, katheu u y,

⁸Si katai beaungjeaung saryhrei hawi, beram katai saryhrei Joba teng y vai, syn pi iy, nangmychi i vui apathyp u. Joba ly nangchi i vui chiu ang sa pi ai; kai ly ni i chiu sa nai tangai pi ai i, nangchi ai kamngo hawi kamlau kang chih y leang. Nangchi ly kai i satang ai Joba kamta, kateng khyp thui u y,” napi.

⁹Eliphe, Bilada hawi Zawpha nichi ly mychi ai ARENG my leu pei nai kamta sa u nai deaungkho y, ARENG ly Joba i chiu sa nai tangai pi nai ne.

¹⁰Huna nai Joba ly my i ahawi leaung thomrei i vui chiu sa pi chum nai khala, ARENG ly ni ai nang chawn hai teang i, vaichi khala i tleaung y phy nyhrei, yhmtheaung katuichi pei pi nai ne.

¹¹Joba i amjo amnau, tuicho, amjo neampachychi hawi, ahawi kangngym bawibawichi ly ni i yhm y jeu iy, ni hawi vanrei cha nei pawi sa u bo. Nichi ly ARENG my avum hai nai ngari kamtangchi molam, Joba teng y paleung hawi y nai leu thui u naimy paleung pahawi u chum baly, tangka maidenrei hawi muku kano ha harei pei u bo.

¹²ARENG ly Joba i heng nai deung, angchei i neng khala amtheaung hai nai tleaung y, pa-nyh i neng khala amtheaung hai keh. Joba ly beram 14,000, kula-iu 6,000, si paino 2,000, keaungngo kano kasau 1,000 rei nang nai ne.

¹³Ni ly chapo leaung saryhrei hawi chaniu leaung thomrei py nga i,

¹⁴chaniu kalen ai ly Jemimah, [12]chaniu sala ai ly Kezi, chaniu sawi ai ly Keren hapop[13]nanai amyn pathi bo.

¹⁵Khaileaung pri verei y Joba i chaniuchi kamta, mo-cha hawi nai neampachy leaungrei py by y. Ampo ly nichi ai mychi i amprochi hawi vanrei, yhmtheaungchi paji pi.

¹⁶Hunaibaly Joba ly saneng chungvai atlo vui palyhrei heng rai i, katu, katichi niu chum baly,

¹⁷khri pa-rei miteaung acheang nai khala dei nai ne.