Read Khumi Chin JOBA 6 Bible Online

JOBA 6 - Khumi Chin bible

JOBA 6

¹Kai i ngari kamtangchi hawi paleung si paleung mawn naichi ai neh cham ai nabaly,

³hunichi ly suida panglira i spryhchi tleaung y malawn py ji keh ai. Hunai deaungkho y kai i thui ngaulau nai ly nang i vui lyh ai naira ne y.

⁴Ati cheaungkhang sa thai nai Tameuh ly kai ai thailiho chyn hawi ko nai deaungkho y chyn kamtlau ly kai i ngan tlang theung y num be bo. Tameuh ly khri pa-rei jei ai hawi parai nai patangrachi, kai i tlang tleaung y tym hai ai nai khai yb bo.

⁵Keaungngo kano kasau ly achachi cha ai nai nga baly, paleung tuinem naimy awm. Si py acha kajei cha ai nai nga baly awm u tliu bo.

⁶Na i py ami nai ly palawi abawi y iy, amlyn y nai teicha teinei cha pajau ai mo? Akadui kanai kangleung ly ati hawi amlyn ai mo?

⁷Kai ly hina nai teicha teinei cha ai nai paleung ano y. Kai i cha nai teicha teineichi ly kai ai amleu ano hai bo.

⁸Tameuh ly kai i hnei naichi ai, ati mana nai y pei y lawh mo? Kai i chiu sa hnei takeng nai ai, ati mana nai pathang pi y lawh mo?

⁹Mymy ly kai ai padei ai nai sa hai lawh ly!

¹⁰Hina nai kamta, mymy sa ai na lawh teu baly, kai ly patang naira khri pa-rei avum teu i py, amo theu naimy achaw ai. Tameuh ly chai parai nai ne, nanai kapany bo. Kai ly mymy i leu pei naichi, mana khala py akhi vai y.

¹¹Kai ly heng veangveang ai nai atho by y bo. Kai ly athang khai naira by y pui naimy, ati mana nai kaheng veangveang ai mo?

¹²Kai ly lengseaung lawh sai a? Kai i tlang ly kheupaja lawh sai a?

¹³Kai teng y kaimy ai atleu pajau nai atho by y leang; Kai ly paleung padora by y nai ne,

¹⁴Vai i kamta patang naira tym nai neng khala, kai ly Tameuh ai khai su nai py ne sy, khai su y nai py ne sy, ka-ym awm nai ahawichi ai aly ngai nai ne.

¹⁵Na i py kai i ahawichi awi, nangchi ly kani nai y baly tui kang reng nai tavo micheaung kamta, kai ai li-tapawp u bo.

¹⁶Tuikhi hawi kadam tuichi ly tavo micheaung kawi na teu i py,

¹⁷kani bi nai khala tama pawn nai deaungkho y, tavo jeungrei tui by y naimy, phui rawm veng nai ne.

¹⁸Hunai deaungkho y khuleaung chei nai khumichi ly tui hau nai tarawi y lam tamang i, tui takang nai daichi ka-vym theung y dei u nai ne.

¹⁹Seba mary hawi Tema marychi mang i jeu nai, khuleaung chei nai khumichi ly tui hau i py,

²⁰tui kang nai tavo micheaungchi naini avum nai deaungkho y, athang khai naira by y bo.

²¹Nangchi ly huni tavo micheaungchi hawi atawm. Kai ly patang naira avum nai khala, nangchi ly jei hyn iy anaw u pawn bo.

²²Kai ly nangchi teng i saisairei py, kang hnei vai y, khumi leaung leaungrei ai, kai i vui un langseaung pei ai nai kai ai paleung ka-e, ti y baly ana patheng nai khumi leaungleaungrei teng i nai

²³atleu ai nai nangchi teng y kang thui pi vai sai a?

²⁴Kai ai nangchi my thui parip u; kai i angym y nai saichi thui pi u. Kai ly nangchi i thui pi nai hawihai palai tangai ai.

²⁵Ka-ym awm nai leu ly sa thai naira awm; na i py nangchi ly ati sai py ny y nai leuchi katheu u bo.

²⁶Nangchi my, kai i thui nai leuchi ly ali cheichei teu, nanai athang khai u lawh; huna nai athang khai baly, kai paleung phra naimy katheu nai leuchi ai, ati mana nai nangchi ei u teang lawh mo?

²⁷Nangchi ly nuro nukai chochi ai malawn py, miseaung palawn u ai nai tambe va iy, la ai nai khumichi ne. Amychi nang chawn ai nai molam y ahawi kamrawichi ai malawn py, ka-jo ka-van sa ai nai khumi ne u lawh ly!

²⁸Kai i meimai khen u cham; kai ly ka-chawi thui ai nai khumi lawh sai a?

²⁹Nangchi ly anawn ai nabaly, anawn ai nai avo bo. Avo akheang y nai leu thui u moh jau. Kai i tlang tleaung y kamngo pajeng ai nai so u reng moh. Kai teng y kamngo by y leang.

³⁰Na i py kai ly ka-chawi thui nai ne. Kai ly teng nai, teng y nai khawilang thai y, nanai nangchi athang khai u bo.