Read Khumi Chin JOBA 8 Bible Online

JOBA 8 - Khumi Chin bible

JOBA 8

¹Ali aho nai kamta katheu nai leuchi ly tem bo a?

³Tameuh ly tara chih naira y mana khala py, jawi tamang hai vai y leang. Mymy ly mana khala py, hawi nairachi so y naimy awm vai y leang.

⁴Nang i cho chanauchi ly Tameuh i tlang tleaung y sa tamang nai deaungkho y, mymy ly nichi ai kamngo nai molam y parip nai ne.

⁵Na i py vai, nang ly ati cheaungkhang sa thai nai keung Tameuh teng y ahihawi iy ahui ba.

⁶Nang ly khri pa-rei chai i hawi lawh baly, Tameuh ly ang jeu iy nang ai ang sabawm ai. Kawn vang langseaung pei nai kamta, nang i yhm dengtheungchi ai, palum pi ali teang ai.

⁷Nang i sum veng chum nai yhmtheaung katuichi ly vai, Tameuh my ang pei ai nai yhmtheaung katuichi hawi pata baly, ati sai py thui kra ai naira by y leang.

⁸Jangni khumichi i leu ai tanareichy adawn cham; achi i amsi pajochi amtiu u nai leu meitang ai paleung theung y adawn ba.

⁹Achi ly deung dawi iy, ati leaungsai py pany u y nai ne. Achi ly khaileaung salo y tla nai pa-pui kamta asyh reng.

¹⁰Na i py nang ly jangni i khumichi my, thui parip nai saichi adawn ba. Nichi i thui nai leuchi vai, tangai ba.

¹¹Nichi my, “Japang-eumuichi ly tui by y nai meingtym y prau thai y. Huni keungchi ai aneang kapan by y nai meingtym y, mana khala py niu vai y.

¹²Tui kang veng nai khala, hunichi ly theang ala i, tyn iy teaung ai nai neng tym y rai khala my takhra keungchi tleaung y deirawm veng reng nai ne.

¹³Tameuh by y nai khumichi ly huni japang-eumuichi hawi atawm; Tameuh ai tami vui nai dengdairei, nichi ly athang khai naira by y nai lawm u bo.

¹⁴Nichi ly kalangvui hawi khanglo sanghang yhm ai a-ym nai khumichi ne.

¹⁵Nichi ly khanglo sanghang yhm ai abang hau lawh baly, huni khanglo sanghang yhm ly nichi i abang hau nai khaw pajau na a? Kalangvui ai kho sa iy amkhaw lawh baly, huni kalangvui ly nichi i amkhaw nai khaw hai pajau na a?,” nanai thui u bo.

¹⁶Khumi hawi y naichi ly kanibi theung y sai kadeu ampho iy, akho verei y kawi ve nanai achachi kamta, peung u reng.

¹⁷Huni acha keungchi i tangjynchi ly lengseaungchi ai pi naimy akau cheng iy awm reng.

¹⁸Na i py huni keungchi ai akyn veng nai khala, huni lengseaungchira y acha keungchi prau, nanai ami py pany ai ny y.

¹⁹Khumi hawi y naichi i amo theu nai ly huna nai kamta tama veng ai. Nichi i meingtym py, takhra khumichi my lawm veng ai.

²⁰Na i py Tameuh ly mymy tlang tleaung y ka-ym awm naichi ai, mana khala py khai su ai ny y. Khumi hawi y naichi ai ly mana khala py sabawm ai ny y.

²¹Mymy ly nang ai amo theu parai naimy aeu, panui ai nai neng ang pei ali teang ai.

²²Na i py nang i tlang tleaung y niu ngai y naichi ai kangji nga hai ai. Khumi hawi y naichi i awm nai yhmchi py, tama pawn ai.