Read Khumi Chin JOBA 9 Bible Online

JOBA 9 - Khumi Chin bible

JOBA 9

¹Nang i thui nai leu ly teng, nanai kai pany. Na i py khumi ly mana nai y Tameuh hawi ka-awi sa iy, kamjau nga ai mo?

³Khumi ly ati mana nai y mymy hawi a-ei pajau ai mo? Khumi ly mymy i deng nai leusai sangrei theung y harei py pathang pajau y leang.

⁴Tameuh i cheng naira hawi sa thai naira ly len parai nai deaungkho y, ami py mymy ai tiu pajau ai ny y.

⁵Mymy ly mawichi ai vaimy asyh hai tamangtang bo. kado theu iy taphra pawn bo.

⁶Tameuh ly kalei theu hai iy, khaileaung amchyh hai. Mymy ly khaileaung i sangum langdeng yhmtawichi ai ahyn hai bo.

⁷Tameuh ly kani si hai y ai nai hawi, ka-si taukichi avang hai y ai nai sa thai naira awm.

⁸Kani khusang kadai iy, pangli naka i anam keungleung y chiu nai khala, Tameuh ly ami i kasabawmra py aly ngai y.

⁹Ka-si deung, eupui eulo ka-jeaung, ka-si niprawn hawi tokalawi mang y awm nai ka-si bawibawichi ai, Tameuh ly kani khusangra bang hau nai ne.

¹⁰Achi ly mymy i sa nai, nang parai nairachi ai pany thai y. Mymy i rengrang ka-ma-rachi ly kati pajau y.

¹¹Tameuh ly kai i sahawi mang tako prei teu i py, kai ly mymy ai niu pajau y.

¹²Mymy ly my i aly ngai nai ai la vui nai ne; mymy ai ami py paka pajau y. Ami my, “Nang ly ati sa nai mo?” nanai deng u vam y.

¹³Tameuh i kado theu nai ly rym y; mymy ly amy ai tiu nai pangli naka rahabi[6]ai sabawm nai paleung ka-echi ai tamyh pawn nai ne.

¹⁴Hunai deaungkho y kai ly Tameuh teng y takeng ai nai, ati mana nai leu hau iy nga pajau ai mo?

¹⁵Kai teng y kamngo by y i py, kai ai tara chih nai keung napi nai Tameuh teng y ahui ai naini awm khyh.

¹⁶Mymy ly kai ai huna nai kamta, ahui ai nai pei teu i py, kai i ahui nai tangai pi ai, nanai kai ym y.

¹⁷Mymy ly atyhtyh naimy kai ai tamokalem no nga hai ai nai, ali kamchai pato bo.

¹⁸Mymy ly kai ai taho ai nai py pei y na; Kai i heng nai ai no-ei hai bo.

¹⁹Kai ly khrukhra hai ai nai atho sa ai avo na a? Tameuh i tlang tleaung y khrukhra hai na a? Mymy ai tara jeung y tym hai ai a? Hu y chei ai nai mymy ai ami my leu pei ai mo?

²⁰Kai ly kamngo by y iy ka-ym awm nai ne teu i py, kai i leuchi ly kamngo awm nai katyn theu lawh nai ne. Kaimy i labeaung malawn py, kai i tlang tleaung y kamngo pajeng ali teaung bo.

²¹Kai ly kamngo by y nai khumi ne; na i py kai ly ati sai py dawndan y leang bo. Heng nai sai ai kapaleih na. Ati sai py aly len y leang bo. Kamngo awm nai py ne sy, kamngo by y nai py ne sy, achi ai Tameuh my taphra pawn ai.

²³Kamngo by y nai khumi leaungrei, vaimy dei leu nai khala, Tameuh ly panui nai ne.

²⁴Tameuh ly khaileaung pri ai, khumi hawi y naichi i kiu tleaung y au bo. Tara chih nai keungchi i, cheng nai mei ai paju hai bo. Hinichi ai Tameuh so y baly ami sa ai mo?

²⁵Kai i neng kani ly kheih kasa veng bo; kanirei py kai ai hawi naira pei y.

²⁶Kai i heng nai sai py, khri pa-rei rang nai sampho kamta, jeungcho ai ahmtlau my hni nai kamta py, neng kheih kasa nai ne.

²⁷Kai ly panuiyhm naimy, kai i avum nai no patang nai katami vui ai nai atho sa nai khala, kai i avum nai no patang naira ly no ali teang i, kai i paleung adi adiu hai bo. Tameuh ly kai ai kamngo awm nai khumi ne, nanai dawn nai py kapany bo.

²⁹Huna nai kamta Tameuh ly kai ai kamngo awm nai khumi, nanai dawn veng nai deaungkho y, kai ly ati mana nai y paleung bi paleung mawn atyhtyh naimy awm ai mo?

³⁰Mani mo saibeung hawi py, kamngochi chai pyn hai ai nai pasiu thai y leang.

³¹Tameuh ly kai ai chainem y nai angawm theung y aphi su. Kai i ateaung my malawn py, kai ai ang paso bo.

³²Tameuh ly khumi ne lawh teu khyly, kai ly mymy ai kaei pajau ai bo. Achi i a-ei nairachi chih pi ai nai, tara jeung y tym hai pajau nai ne.

³³Na i py achi sala y kun ai nai khumi, Tameuh hawi kai ai tara chih ai nai leaungrei py by y.

³⁴Aw Tameuh! kai i tlang tleaung y pajeng nai ly anawn kyh ba. Nang i ka-jei awm parai nai patangra py, pei moh kyh ba.

³⁵Kai teng y ly jei hyn ai by y nai deaungkho y, jei y naimy hnei takeng ai.