Read Khumi Chin SAM 10 Bible Online

SAM 10 - Khumi Chin bible

SAM 10

¹Aw ARENG, nang ly ati mana nai kamlo y awm vui lawh mo? Kaichi patang naira vum nai thym khala, ati mana nai y meimai hi pi vui lawh mo?

²Khumi aso y naichi ly amlyh am-e naimy, khumi kamawnchi ai ana u bo. Mychi i pateung nai deaungchira y man hai ali teang ba.

³Khumi aso y naichi ly mychi i hawi y nai paleung kangaira y amlyh reng. Ngaiphi teng y nai khumi ly ARENG ai pasawi reng nai ne.

⁴Khumi aso y naichi ly ARENG ai dawndan y; ni ly amlyh am-e iy Tameuh by y, nanai dawn jojo.

⁵Khumi aso y naichi ly sa naira tleirei y eaung nai deaungkho y, Tameuh i tara chih naichi ai pany thai y leang. Paleung ka-echi ai py panui hai reng nai ne.

⁶“Kai ly mana khala py sum y ai; mana khala py patang ai ny y,” nanai amy tlairei katheu reng.

⁷Nichi i labeaung ly pasawi nai, tapawp nai, pajei pahyn naichi kawi na. Niu ngai y nai leu hawi chai y nai leu katheu tamangtang bo.

⁸Nichi ly avangchi theung y aheu iy khumi kahawichi ai padei reng. Jeaungmang nai khumichi ai patang hai ai nai khen patawm reng.

⁹Nichi ly amso mawi kei ai nai mawi angawmra y o nai khrangsi kamta abyh reng. Nichi ly khumi kamawnchi ai o iy mychi i deaung hawi patiu nai ryh jo bo.

¹⁰Nichi i pahyp y nai atho hawi nurochi ai atlym hai bo.

¹¹Khumi aso y nai my, “Tameuh ly hini molam y ati sai py dawn y leang! Mymy ly mei pasym veng; kai ai mana khala py niu y leang,” nanai amy tlairei katheu nai ne.

¹²Aw ARENG, ang thau ba; aw Tameuh, huni khumi aso y naichi ai pajeng kyh ba. Ngari kamtang avum naichi ai tami moh kyh ba!

¹³Khumi aso y naichi ly ati mana nai Tameuh ai mei aniu y nai sa iy, “mymy ly kai ai pajeng ai ny y,” nanai amy tlairei katheu pajau lawh mo?

¹⁴Na i py nang ly patang naira avum naichi ai niu takengkei iy, sabawm ai nai avawrei angveirym nai ne. Jeaungmang nai khumichi ly amymy ai nang teng y a-au reng.

¹⁵Khumi aso y naichi hawi khumi hawi y naichi i sa thai naira ai khei pi pawn ba. Nichi ly hawi y nairachi so ali bi y pa-rei kamngo pajeng pi kyh ba.

¹⁶ARENG ly deungtasarei samrang ne; tameuh takhrachi ai chiu nai khumichi ly mychi i pri dengdairei tama u pawn ai.

¹⁷Aw ARENG, nang ly paleung apanem nai khumichi i chiu sa nai tangai pi iy, nichi teng y sorai paleung pei ai.

¹⁸Ana patangra avum nai khumichi hawi nurochi ai, mo mang y pajei bi y ai nai, nang ly nichi i aeu nai raawi tangai pi iy, nichi hawi ai nai molam tara chih pi ai.