Read Khumi Chin SAM 102 Bible Online

SAM 102 - Khumi Chin bible

SAM 102

¹[95] Aw ARENG, kai i chiu sa nai tangai pi kyh ba; sabawm ai nai kai i aeu nai raawi tangai pi kyh ba!

²Kai patang naira avum nai thym khala y, meimai hi pi veng mo kyh ba! Kaimy palau nai khala, tangai pi iy pathang pi kaliki kyh ba!

³Kai i heng nai deung ly maikhyh kamta tama vui ai i, kai i tlang py mai kamta kang naimy awm ai.

⁴Kai ly acha keung kamta pakhau piupa nai avum iy, jeirawm naimy awm ai; kai ly teicha cha ai nai paleung by y na bo.

⁵Kai ly tao pajeng parai naimy tangam bo; kai teng y hiu hawi peih naini awm khyh bo.

⁶Kai ly daichi ka-vym theung i tavo kamta py, phra seaungkhrang nai yhm y awm nai beaungku kamta py lawm bo.

⁷Kai ly i amhm y na bo; kai ly yhm amphu salo y amairei chym khyh nai tavo hawi atawm nai ne.

⁸Paleung ka-echi ly kai ai kani khengrei, khumi aniu y nai sa u bo; nichi ly kai ai pata iy, pasawi patau u bo.

⁹Nang i kado theu nai sai len parai nai molam y, kai ly maidym ai teicha teinei palawn iy, cha ai nai tla bo; kreip hang ai py kaimy i meikatui hawi katlen iy, nei ai nai tla bo. Nang ly kai ai tahm pasang chum baly aphi su nai ne.

¹¹Kai i heng nai deung ly dym ka-khui kamta ne; kai ly acha kamta jeirawm veng bo.

¹²Na i py aw ARENG, nang ly deungtasarei samrang ne; nang i amyn ly deungtasarei awm jojo ai.

¹³Nang ly ang thau iy Zion mary ai pahen ai; huni mary ai pahen ai nai nang ly tym bo; vai i neng ly avo khyp nai neng ne.

¹⁴Nang i miseaungchi ly Zion mary phra veng teu i py, huni mary ai khrei nai awm u asai rai; Zion mary phra seaungkhrang veng teu i py, huni mary ai pahen u asai nai ne.

¹⁵Khumi bawibawichi ly ARENG ai jei kaji naimy awm u ai; khaileaung pri i samrang bawibawichi ly nang i sa thai naira ai jei kaji naimy tahm khai u ai.

¹⁶ARENG my Zion mary palum teang nai khala ly mymy i nang parai nai sai amteng hai ai.

¹⁷Mymy ly mymy i khai su nai khumichi i hnei takeng nai thai iy, nichi i hnei takeng nai tangai pi ai.

¹⁸ARENG i sa nai saichi ai deung kangthauchi i vui tajiu pi u typ; hunai khala naini nichi ly nang ai palo u ai.

¹⁹Theaungtla nai khumichi i tangam nai raawi tangai ai nai py, dei ai nai pa-rei tara chih naira avum nai khumichi ai lawi naira pei ai nai py,

²⁰ARENG ly salo ka-sang meingtym kachai mang dengdairei khen kathiu bo; mymy ly kani pri mang dengdairei meung iy, khaileaung y khen patawm nai ne.

²¹Hunai deaungkho y pri tleirei i khumi cheng cheaungkhangchi ly angym u iy ARENG ai chiu u nai khala y,

²²Zion mary salo y nang i amyn amthang hai ai; Jerusalem mary y nang i nang parai nai palo u ai.

²³Kai deaungdichy khala i dengdairei, ARENG ly kai ai atho di hai iy, kai i heng nai deung py dawi hai bo.

²⁴Aw Tameuh, kai miteaung cheang y naimy, kai ai lo vui moh kyh ba. Aw ARENG, nang ly heng jojo nai keung ne.

²⁵Nang ly jangni y khaileaung palum chum baly, nang i kiu hawi kani khusang ai sa bo.

²⁶Huni bawibawichi ly tama pawn teu i py, nang ly awm jojo ai nai ne; huni bawibawichi ly ateaung kamta tangym pawm ai. Nang ly ateaung atha nai kamta atha nai deaungkho y, hunichi ly tama pawn ai.

²⁷Na i py nang ly mana khala py huna jojo; nang i heng nai deung ly mana khala py tem vai ai ny y.

²⁸Kaichi i katu chanauchi ly tlamsa naimy awm u ai; nichi i cheng theaungchi py, nang teng y abyh ai i, chymme naimy awm u jo ai.