Read Khumi Chin SAM 103 Bible Online

SAM 103 - Khumi Chin bible

SAM 103

¹[96] Aw kai i phailo, ARENG ai palo! kai i tlang paleung phailochi awi, mymy i amyn kachai ai palo u!

²Aw kai i phailo, ARENG ai palo! mymy i pahen nai saichi tami veng moh.

³Mymy ly kai i kamngo bawibawichi palawi pi iy, kai i no-na bawibawichi py, hawi ang sa pi nai ne.

⁴Mymy ly kai ai deira i nai atleu iy, tamen naira, pahen nairachi hawimy amtheaung hai bo.

⁵Mymy ly kai ai amtheaung hai nai deaungkho y, amhm pui kamta atho ham naimy awm bo.

⁶ARENG ly ana patang naira avum naichi mang y asa hai iy, tara chih pi nai deaungkho y, nichi i nga ai avo naichi pei pi nai ne.

⁷Mymy ly Mosi teng y mymy i dawn pasym yb naichi thui pi iy, lyh ai awm nai saichi, Israela chengchi ai niu hai bo.

⁸ARENG ly tamen nai hawi pahen nai keung ne iy, paleung sau neaung hawi nai deaungkho y, khaw parai nai tamen naira hawimy kawi angym nai ne.

⁹Mymy ly sa tamang nai y avawrei jo preng y; mymy ly kado theu jojo y leang.

¹⁰Mymy ly achi ai kamngo pajeng ai nai ataing khyp teu i py, pajeng naira tym hai y leang; achi teng y kamngochi hawi tamang naichi awm nai kamta, pajeng pi y leang.

¹¹Khaileaung salo y awm nai kani khusang ly asang nai kamta, mymy ai jei naimy tahm khai naichi i vui khai pi nai tamen naira ly len parai.

¹²Nisi kangtem ly nidym kangtem hawi palo nai kamta, mymy ly achi i kamngochi ai py, achi hawi palo hai veng bo.

¹³Ampo ly chanauchi ai pahen nai kamta, ARENG ly mymy ai jei naimy tahm khai naichi ai pahen nai ne.

¹⁴Mymy ly achi i tlang ai ati hawi sa nai mo, nanai pany; achi ly spryh ne, nanai mymy ly pany.

¹⁵Achi i heng nai ly acha kamta ne. achi ly daichi kaseaung kamta, keung cheang iy pau angdai nai ne;

¹⁶naibaly ali aho nai khala, pau ly vui ryp nai deaungkho y, huni ai niu ali bi y leang bo.

¹⁷Na i py ARENG ai jei naimy tahm khai naichi i vui y, mymy i tamen nai ly deungtasarei khaw jo nai ne.

¹⁸Mymy i Leu Maikawm ai kry iy, Reita leu pei naichi ai ka-ym awm naimy sa patawm naichi i tlang tleaung y, mymy i pahen naira ly katu chanau khrairei tym nai ne.

¹⁹ARENG ly mymy i areng atehra ai kani mang y khai bo; mymy ly khusang deaungdu ai peang nai ne.

²⁰Sa thai naira haiho len parai iy, mymy i leu pei naichi sa patawm nai, mymy i leu tangai nai kani pri amtaw thauchi awi, ARENG ai palo u!

²¹Mymy i ngai nai kamta sa pi nai miseaung, kani pri amtaw thau bawibawichi awi, ARENG ai palo u!

²²ARENG i sa nai hawi peang naira theung y awm nai heng nai amjy bawibawichi awi, mymy ai palo u. Aw kai i phailo, ARENG ai palo!