Read Khumi Chin SAM 104 Bible Online

SAM 104 - Khumi Chin bible

SAM 104

¹Aw Kai i phailo, ARENG ai palo! Aw kai i ARENG Tameuh, nang ly khri pa-rei nang parai! Nang ly sa thai naira phum-angchi hawi amthyp nai ne.

²Nang ly nangmy ai kangvang hawi khiu bo; nang ly kani khusang ai kanih tangbeung kamta kadai iy,

³kani khusangra i tui salo y nangmy i yhm sa. Nang ly tamaichi ai nangmy i ka-ri kamta, ali ai nangmy i pakhichi palawn iy atang bo.

⁴Nang ly ali ai nangmy i savaichi kamta py, amlosadichi ai nangmy i miseaungchi kamta py, teaung nai ne.

⁵Nang ly khaileaung ai mana khala py, asyh vui pajau y na pa-rei langdeng pala iy khaw hai typ bo.

⁶Naibaly huni khaileaung ai suida pangli hawi kanih kamta khiu bo; tui py mawichi ai um nai ne.

⁷Nangmy parip nai khala y tuichi ly angpreng pawn; tuichi ly nang i kani pajyh hai nai katyn thai nai khala, leaung kaliki na bo.

⁸Tuichi ly mawi saleung i dengdairei leaunghawichi mang py, nangmy nichi i vui sa pi yb nai meingtym mang py leaung nai ne.

⁹Khaileaung ai tui my um bi y ai nai, nang ly tuichi lem heu pajau y pa-rei, khujyh kamtleh khai pi bo.

¹⁰Nang ly leaunghawichira y tavo micheaungchi lawm hai i, daichi sala mang tavo tuichi leaung hai bo.

¹¹Huni tavochi ly daichi amso mawichi nei ai nai tui pei nai ne; keaungngo kano kasau karamchi ai py, tui kanghai dam hai bo.

¹²Tengpang sahawi i dengkeaung keungchi salo y tavochi ly tabu sa u iy khulym thui u bo.

¹³Nang ly kani mang dengdairei mawichi salo y kani nai hai nai deaungkho y khaileaung ly nang teng i amtheaung naira angym pa-rei nga.

¹⁴Nang ly daichi amso mawichi cha ai nai achachi py, khumichi teaung ai nai amti amjangchi py, prau hai bo; Hunai deaungkho y khumi ly amti amjangchi pati ai nai nga i,

¹⁵amy ai amo theu hai nai kreip hang py, awm nai sai khesere hai ai nai olive asitui py, tlang atho lawm hai ai nai teicha teinei py, nga pajau nai ne.

¹⁶ARENG my ui nai mymy i dengkeaung keungchi napi nai, Lebanon daichira i saitleang keungchi ly kanitui neangneang nga bo.

¹⁷Hunira y tavochi ly tabuchi sa; obeaung asangchi ly maicha keungchira y tabuchi sa u bo.

¹⁸Sithachi ly mawi ka-sangchira y awm u; sapautavuichi ly lengseaung parachira y aeung u nai ne.

¹⁹Nang ly neng patleh takhra ai nai molam lo ai sa pi; kanito ly my i avah ai nai neng pany.

²⁰Nang ly vum sa pi nai deaungkho y, veng nai thym khala daichi amso mawichi ly theu u bo.

²¹Khrangsi tanglochi ly teicha hau nai thym khala y hang u; nichi ly Tameuh my khai pi nai teichachi hau u.

²²Kani si nai khala y mymychi i khochira y vawi i, aeung u bo.

²³Huna nai khala y khumichi ly mymychi i kalop sa ai nai amsa u iy, kani dym pa-rei kalop sa u nai ne.

²⁴Aw ARENG, nang i sa nai leaungsaichi ly nawi parai na ly! Cheng nai hawimy huni bawibawichi ai sa! Khaileaung ly nang i sa nai heng nai amjychi hawimy kawi na bo.

²⁵Kati pajau y na pa-rei, heng nai amjy katheang kalenchi awm ai nai, kau parai nai suida pangli pui awm.

²⁶Suida pangli theung y samphochi ly alika hawi so u. nang i sa nai tui naka Levithan py, amo theu nai achaw na bo.

²⁷Huni amso tawnbawi bawibawichi ly neng tym baly teicha nga ai nai nang teng y abyh u nai ne.

²⁸Nang ly nichi ai pacho nai deaungkho y, nichi ly cha ai nai nga; nang ly teicha khai pi nai deaungkho y, nichi ly bym pa-rei nga u bo.

²⁹Nang ly nichi teng i nai meimai hi pi veng nai khala y, nichi ly jei hyn u bo; nang ly nichi i hengra la pi veng nai khala y nichi ly dei i, spryh lawm u ali teang nai ne.

³⁰Na i py nang ly nichi ai taho hai nai khala y, nichi ly sa palai teang naira nga bo; nang ly khaileaung pri ai kangtha lawm hai teang nai ne.

³¹ARENG i nang parai nai ly deungtasarei angvang hai sy! ARENG ly mymy i sa naichi molam y amo theu sy!

³²Nang ly khaileaung ai khen nai khala y, khaileaung ly amchyh na; mawichi ai kiu pajeung hawi teaung i, mawichira i nai maikhyh theu bo.

³³Kai ly kaimy deungrei, ARENG ai khulym thui naimy palo ai; kai ly heng nai ryrei, Tameuh ai palo nai khulym thui pi ai.

³⁴Mymy ly kai ai amo theu hai nai deaungkho y, kai i thui nai khulym ly mymy kawn pi sy.

³⁵Khumi kamngochi ly khaileaung i dengdairei, tamyh nai avum u sy; khumi aso y naichi ly tamo u pawn na sy. Aw kai phailo, ARENG ai palo! ARENG ai palo!