Read Khumi Chin SAM 106 Bible Online

SAM 106 - Khumi Chin bible

SAM 106

¹ARENG ai ly palo u! ARENG ly hawi nai deaungkho y kawn nai leu thui u; mymy i tamen nai ly deungtasarei ne.

²Mymy i sa nai lyh ai hawi parai nai bawibawichi ai, ami thui pajau ai mo? Mymy i nang parai nai bawibawichi ai ami palo pajau ai mo?

³Ka-dyh ka-dawi sa iy kateng sa jojo nai khumichi ly taham hawi u nai ne.

⁴Aw ARENG, nangmy i khumichi ai sabawm nai khala y, kai ai py pany ba; nichi ai atleu nai khala y kai ai py atleu rau ba.

⁵Kai ai nang i khumichi nang chawn nai niu ai nai pei ba; nang i pri khumichi amo theu naira y py, nang i peang nai khumichi amo theu amlyh naira y py, kai ai tabawi kyh ba.

⁶Kaichi ly amsi pajochi kamta, kamngo sa u; khumi aso y nai kasa u bo.

⁷Kaichi i amsi pajochi ly Aikupta pri y Tameuh my sa nai lyh ai hawi parai nai ai pany thai y; nichi teng y avawvawrei, tamen nai sai patei pi nai ly tami u veng bo. Naibaly pangli kamsen sahawi y ati cheaungkhang sa thai nai keung ai tiu u nai ne.

⁸Na i py mymy ly mymy i sa thai naira khri pa-rei len parai nai patei pi ai nai adeu yb nai kamta nichi ai atleu bo.

⁹Mymy ly pangli kamsen ai leu pei baly, huni ly tui kang vui nai ne; naibaly mymy i khumichi ai tui kang nai pangli tako prei ai nai pahawi bo.

¹⁰Mymy ly nichi ai niu ngai y nai khumichi kiu i nai atleu nai ne; mychi i paleung ka-echi kiu i nai atleu pi bo.

¹¹Mychi i paleung ka-echi ly tui y anum i, dei u bo; leaungrei py kangheng tleaung y.

¹²Huna nai khala y mymy i khumichi ly mymy i adeu nai leu ym u i, mymy ai palo nai khulym thui u nai ne.

¹³Na i py nichi ly mymy i sa nai saichi ai vaimy tami veng ryp chum baly, mymy i lam patei naichi ajeng y naimy sa u vui bo.

¹⁴Nichi ly daichi ka-vym theung y ngai phi teng y nai ka-dawnchi tym i, Tameuh ai cham u nai ne.

¹⁵Hunai deaungkho y mymy ly nichi i hnei nai pei pi teu i py, nichi teng y ka-jei awm parai nai no michi tym hai bo.

¹⁶Daichi ka-vym theung y nichi ly Mosi ai py, ARENG i chai parai nai miseaung Aron ai py, takho u bo.

¹⁷Huna nai khala y khaileaung ly ako thla i, Dathan ai py, Abiram hawi yhm dengtheungchi ai py, pajawn vui nai ne.

¹⁸Maikadeu ly nichi nithun abang nai khumi hawi y naichi tlang tleaung y tla iy kang be bo.

¹⁹Nichi ly Sinai mawi sahawi y muku hawi sicho myn sa u iy chiu u nai ne.

²⁰Nichi ly Tameuh i nang parai nai sai ai acha cha nai tawnbawi myn hawi katheung vui bo.

²¹Aikupta pri y lyh ai hawi nai leaungsaichi hawi, mymychi ai atleu pi nai Tameuh ai tami u bo.

²²Huni pri y mymy i sa nai saichi ly lyh ai hawi parai na a! Pangli kamsen sahawi y leaungsaichi ly lyh ai hawi parai na ly!

²³Tameuh ly mymy i khumichi ai tamyh vui ai, nanai leu pei nai khala y, mymy i vawi takhra nai miseaung Mosi my paka nai deaungkho y, mymy i kado theu nai ly rym i, nichi ai tamyh y nai ne.

²⁴Hunaibaly nichi ly apu parai nai pri y kun ai nai akhi u lawh; ati mana nai mo nabaly nichi ly Tameuh i adeu nai leu ai ym u y nai deaungkho y ne.

²⁵Nichi ly mychi i Taichi theung y awm u naimy tangam u; ARENG i leu tangai u y.

²⁶Hunai deaungkho y mymy ly nichi ai daichi ka-vym theung y dei hai ai, nanai py,

²⁷nichi i katu chanauchi ai Tameuh by y nai khumichi theung y ahei hai iy, pri takhra y dei hai ai, nanai py, leu pei kheng bo.

²⁸Naibaly Tameuh i khumichi ly Bala tameuh ai peor meingtym y chiu iy, tameuh kadeichi teng y apathyp nai mawichi cha ai nai amkawm u bo.

²⁹Nichi ly hina nai sa nai molam y, ARENG ai kado patheu u i, nichi teng y ka-jei awm nai no michi tym hai ai.

³⁰Na i py Phineha ly ang thau iy kamngo awm naichi ai pajeng i, no kanghawi ly anawn bo.

³¹Phineha i sa nai sai ai vaini khrairei, khumichi my pany u jo nai ne; vai mo mang y py pany u jojo ai.

³²Nichi ly Meriba micheaung peang y, ARENG ai kado theu hai bo; nichi molam y Mosi ly rai naira avum.

³³Nichi ly Mosi ai khri pa-rei paleung no-ei hai nai deaungkho y, ni ly thui ngai y nai leu katheu lawh nai ne.

³⁴Nichi ly Kanan chengchi ai tamyh pawn ai nai ARENG my leu pei teu i py, hunai kamta so u y naimy,

³⁵huni khumichi hawi apom u iy, nichi i reita tanynchi teaung u bo.

³⁶Tameuh i khumichi ly mynchi ai chiu lawh nai deaungkho y tama u nai ne.

³⁷Nichi ly mychi i cho chanauchi ai tawnbawi kamta palawn iy, Kanan pri i mynchi teng y apathyp u bo.

³⁸Nichi ly kamngo by y nai mychi i cho chanauchi kypkyp ai tleh iy, Kanan pri mynchi teng y talam u i, mychi i pri y chai hai y bo.

³⁹Huna nai kamta tleh u nai deaungkho y, mymychi ai py chai hai y nai ne. Huna nai sa u nai molam y, Tameuh i tlang tleaung y py ka-ym by y bo.

⁴⁰Hunai deaungkho y ARENG ly mymy i khumichi ai kado theu hai; nichi ai paso nai ne.

⁴¹Mymy ly nichi ai cheng takhra khumichi teng y khai su nai deaungkho y, paleung ka-echi my nichi ai peang bo.

⁴²Nichi ly paleung ka-echi my ana patang hai naira avum i, nichi i anui y awm ai nai tla bo.

⁴³ARENG ly mymy i khumichi ai avawvawrei atleu pi teu i py, nichi ly mymy ai tiu u rara nai deaungkho y, kamngora y anum u veangveang nai ne.

⁴⁴Na i py nichi aeu u nai khala y ARENG ly thai i, nichi i ngari kamtang py pahen pi bo.

⁴⁵Mymy ly nichi hawi ai nai molam y Leu Maikawm pany pi bo; ati mana nai mo nabaly mymy i tamen naira len parai nai deaungkho y, kado theu nai ly rym nai ne.

⁴⁶Mymy ly nichi ai ana patang hai nai khumichi i paleung theung y pahen thai nai ka-dawn pakun pi bo.

⁴⁷Aw kai i ARENG Tameuh, kai ai atleu kyh ba; nang i amyn kachai ai palo u pajau ai nai py, nang teng y kawn nai leu thui u pajau ai nai py, kaichi ai khumi cheng cheaungkhangchi theung i dengdairei, palau teang kyh ba.

⁴⁸Israela chengchi i ARENG Tameuh ai ly palo u! mymy ai ly vai i dengdai deungtasa khrairei palo u! Khumi bawibawichi ly “Amen,” nanai thui u sy! ARENG ai palo u!