Read Khumi Chin SAM 107 Bible Online

SAM 107 - Khumi Chin bible

SAM 107

¹“ARENG ly hawi nai deaungkho y kawn naimy palo u; mymy i tamen naira ly deungtasarei ne!,” nanai

²paleung ka-echi kiu i nai ARENG my atleu bo. Nidym nisi, tosyh tokalawi y awm nai

³pri takhra i dengdairei palau teang naira avum nai khumichi ly palo u sy.

⁴Khumi phyreichi ly lam by y iy khutaha daichi ka-vym y amki u; nichi ly mychi awm ai nai marychi mang y tako nai lam niu u y.

⁵Nichi ly kajeu kanglam, tui kanghai avum naimy paleung phra, atho di u bo.

⁶Nichi ly patang naira avum u nai deaungkho y ARENG ai palau u i, mymy ly nichi ai patang naira i nai atleu bo.

⁷Mymy ly nichi awm ai nai mary mang y lam kataw mang pahawi bo.

⁸Nichi ly ARENG i tamen naira khaw parai nai molam y py, mychi ai sa pi nai lyh ai awm naichi molam y py, kawn nai leu thui naimy palo u ai.

⁹Mymy ly tui ahai naichi ai tui kanghai dam hai; kajeu alam naichi ai, ati mo hawi parai naichi hawi kajeu kawi hai bo.

¹⁰Phyrei khumichi ly kaveng my khiu nai theung y awm u i, sengkry hawi pakheng nai y, patang naira avum u bo.

¹¹Ati mana nai mo nabaly Tameuh i leu pei nai tangai y iy, ati cheaungkhang sa thai nai keung i leu pei naichi ai khai su nai deaungkho y ne.

¹²Nichi ly akawm parai na pa-rei, kalop sa ai nai tla nai deaungkho y atho py khei be bo; atlym teu i py, nichi ai pathau teang ai nai khumi leaungrei py by y.

¹³Nichi ly patang naira avum u nai deaungkho y, ARENG ai palau u i, mymy ly nichi ai patangra i nai atleu bo.

¹⁴Mymy ly nichi ai kaveng my khiu nai theung i patheu iy, nichi ai pakheng nai sengkrychi leu hai pawn bo.

¹⁵Nichi ly ARENG i khaw parai nai tamen nai saho py, mychi ai sa pi nai lyh ai awm nairachi saho py, kawn naimy palo ai.

¹⁶Mymy ly kheupaja katheuchi ai taphra pi pawn iy, tamo atleangrachi ai py, tleu hai piupa pawn nai ne.

¹⁷Phyrei khumichi ly mychi i kamngo molam y no patang u; mymychi i sa tamang nai molam y, ngari kamtang avum u bo.

¹⁸Nichi ly teicha teinei malawn py, niu ai ngai nai paleung by y na bo i, deira pa-kho sahawi y tym u bo.

¹⁹Huna nai khala y nichi ly patang naira tym u nai deaungkho y, ARENG ai palau u i, mymy ly nichi ai patangra i nai atleu pi bo.

²⁰Mymy ly leu pei iy nichi ai no hawi hai chum baly, tapreaung angawm i nai atleu pi bo.

²¹Nichi ly ARENG i khaw parai nai tamen nai saho y py, mychi ai sa pi nai lyh ai awm nairachi saho py, kawn naimy palo u ai.

²²Nichi ly kapathypra hawi mymy ai kawn naimy palo u ai; amo theu naimy khulym thui u iy, mymy i sa nai saichi amteng hai ai.

²³Khumi phyreichi ly suida pangli theung y sampho so iy, ka-sum ka-pai sa naimy, mychi i kajeu apakawi ai nai hau u bo.

²⁴Nichi ly ARENG i sa nai saichi hawi, pangli theung y sa nai lyh ai awm nai saichi niu u nai ne.

²⁵Mymy leu pei nai khala y ali kamchai theu i, tui sampyhchi theu.

²⁶Samphochi ly ali theung y achaw kalau iy, tui theung y tla kathiu bo; huna nai dei lam avum u nai deaungkho y, khumichi ly jei hyn naimy kaso theu u na bo.

²⁷Nichi ly ahm rah pavui naichi kamta, atlym u khikha na; nichi i kawp nai saichi ly ati sai py ny y bo.

²⁸Huna nai khala y nichi ly patang naira avum u nai deaungkho y, ARENG ai palau u i, mymy ly nichi ai patangra i nai atleu pi nai ne.

²⁹Mymy ly ali kamchai ai anawn hai nai deaungkho y, tui sampyhchi py rym ryb bo.

³⁰Huna nai ali anawn nai y, nichi ly amo theu u bo; mymy ly nichi i ngai nai meingtym mang y, chymme naimy tym hai bo.

³¹Nichi ly ARENG i khaw parai nai tamen nai saho y py, mychi i vui sa pi nai lyh ai awm nairachi saho y py, kawn naimy palo u ai.

³²Nichi ly nang i nang parai nai saichi ai, khumichi achu naira y amthang hai ai; lu sa naichi i meetingra y mymy ai palo u ai.

³³ARENG ly tavochi ai tui kang hai pawn bo; tavo micheaungchi ai py tamym typ pawn nai ne.

³⁴Mymy ly khaileaung kahawi ai, teaung ai ngo y nai palawi khaileaung lawm hai bo; ati mana nai mo nabaly hu y awm nai khumichi i hawi y nai molam y ne.

³⁵Mymy ly khutaha daichi ka-vymchi ai tui sampumchi lawm hai iy, jengha nai meingtymchi ai py, tui leaung nai micheaung lawm hai bo.

³⁶Mymy ly huni meingtym y kajeu alam nai khumichi awm ai nai pei pi bo; nichi py mymychi awm ai nai mary sa u nai ne.

³⁷Nichi ly li hlau sa u iy, kreip keungchi py ui u; Nichi ly amti amjangchi neangneang pakym u bo.

³⁸Mymy ly mymy i khumichi ai amtheaung naira pei nai deaungkho y, nichi ly cho chanauchi neangneang nga u; mymy ly nichi i si kanghuchi ai py, peung ai nai kry pi bo.

³⁹Tameuh i khumichi ly ana pumpi nai hawi, ngari kamtangchi avum nai molam y, sum naira hawimy kangji kangai nga u nai khala y,

⁴⁰mymy ly huna nai ana pumpi nai khumichi ai paso i, lam by y nai daichi ka-vymra y amki hai ryry bo.

⁴¹Na i py mymy ly khumi kamawnchi ai ngari kamtangra i nai atleu iy, nichi i yhm dengtheungchi ai, beram kanghuchi kamta peung hai ai.

⁴²Khumi kahawichi ly huna nai niu i, amo theu u nai ne; na i py khumi aso y nai bawibawichi ly labeaung amkyn me veng bo.

⁴³Khumi kachengchi ly huni atitichi ai, paleung theung y pateung me iy, ARENG i khaw parai nai tamen nai satang dawn u pasym sy.