Read Khumi Chin SAM 109 Bible Online

SAM 109 - Khumi Chin bible

SAM 109

¹[98] Aw Tameuh, kai ly nang ai kang palo bo; sabawm y naimy awm vui moh ba!

²Khumi aso y naichi hawi tapawp nai khumichi ly kai ai tiu u bo; nichi ly kai i satang ka-chawi naimy thui u nai ne.

³Nichi ly kai ai atyhtyh naimy tiu iy, kai i hawi y nai satangchi ai amthang hai u bo.

⁴Kai ly nichi ai tamen nai sai patei naimy, nichi i vui chiu sa pi i py, nichi ly kai ai ka-jo hau u bo.

⁵Nichi ly kai i hawi sa naichi ai hawi y naira mang y, kai i tamen naira ai niu ngai y naira mang y, vawitheung tha u lawh nai ne.

⁶Kai i paleung ka-echi ai tara chih ai nai, un cha nai tara chih keung ai, khai takhra pi kyh ba; ni i paleung ka-e leaungrei my, ni ai seu hai ba.

⁷Ni ai chih iy kamngo nai sai amteng hai sy; ni i chiu sa nai malawn py, kamngo lawm sy!

⁸Ni i heng nai ly kra y naimy tem vui iy, ni i kalop ai khumi takhra leaungrei my amtym vui sy!

⁹Ni i cho chanauchi ly nuro chochi lawm u iy, ni i aju ly lumai lawm sy!

¹⁰Ni i chanauchi ly yhm hlau amny y nai, cheaung nai khumichi lawm u iy, mychi awm nai yhm kaphrachira i nai, patheu pawn nai avum u sy!

¹¹Kalai keungchi ly ni i yhmtheaung awm nai ngiereichi ai la pi pawn iy, cheng takhrachi ly ni i kalop sa naira i ko nai atitichi py. lo pi pawn sy.

¹²Mana khala py ni ai pahen ai nai khumi, ni i nuro chochi ai kry pi ai nai, khumi leaungrei py awm moh sy.

¹³Ni i kangpreang ly myh bebe sy; ni i amyn ly mo mang kangpreangchi teng y malawn py tamo veng sy.

¹⁴Ni i amsi pajochi i hawi y sa nai saichi, ARENG ly pany jo sy; ni i amhm i sa nai kamngo ai py pahen pi moh.

¹⁵ARENG ly nichi i kamngochi ai pany jo sy; na i py nichi i amyn ly khaileaung pri i nai tamo veng kalei sy!

¹⁶Huni khumi ly mana khala py, pahen ai nai ka-dawn by y; ni ly khumi kamawnchi, kamawn katichi hawi jeaungmang naichi ai pahyp y naimy ana iy padei nai ne.

¹⁷Ni ly amsawi si nai ne i, mymy ly amsawi lawi kalei sy! Ni ly ami ai amtheaung naira pei ai nai ngai y i, ami py ni ai amtheaung hai moh sy!

¹⁸Ni ly amsawi ai leu lam palawn i, ni i vui nina lawm bo; ni i amsawichi ly tui kamta, ni i ngan theung y py, asitui kamta ni i hiu theung y py, num bebe sy!

¹⁹Huni amsawi saichi ly ateaung kamta ni ai khiu iy, khobai kamta ly kawm thleng jojo sy!

²⁰Aw ARENG, kai i hawi y nai satangchi ai hei nai keung, kai i paleung ka-echi ai hina nai kamta pajeng pi kyh ba.

²¹Na i py aw ARENG, kai i Tameuh, nangmy i adeu nai kamta, kai ai sabawm kyh ba; nang i tamen nai saho y kai ai atleu kyh ba.

²²Kai ly kamawn kati cho ne; paleung pakawi theung y no-ei naimy awm bo.

²³Kai ly dym mang i ka-khui kamta tama ai nai kasa bo; mipo kamta ali my hm iy, akheang vui nai ne.

²⁴Kai ly teicha teinei avaw nai molam y, kai i kheukhuchi ly atho di bo; kai i tlang ly hiu hawi peih awm khyh bo.

²⁵Khumichi ly kai ai niu nai khala y, panui hai u bo; nichi ly lu heang u naimy, tahm khai u y nai ne.

²⁶Aw kai i ARENG Tameuh, kai ai sabawm kyh ba! nang i khaw parai nai tamen naira molam y, kai ai atleu kyh ba!

²⁷Kai ai atleu nai keung ly nang ne, nanai paleung ka-echi ai pany hai ba.

²⁸Nichi my kai ai pasawi u teu i py, nang ly amtheaung naira pei ai; kai ai ana nai khumichi ly sum u na sy; nang i miseaung kai ly amo theu sy.

²⁹Kai i paleung ka-echi ly tahm awm u moh sy; nichi ly angji ngailai nai hawimy, mychi ai kanih kamta khiu na sy.

³⁰Kai ly tao pajeng parai naimy, ARENG teng y kawn nai palo ai; mipuichi theung y nang ai palo ai.

³¹Ati mana nai mo nabaly nang ly khumi kamawnchi ai ama hai iy, ni ai dei ai nai pa-rei pasum u nai khumichi kiu i, atleu pi nai deaungkho y ne.