Read Khumi Chin SAM 111 Bible Online

SAM 111 - Khumi Chin bible

SAM 111

¹ARENG ai palo! Kai ly ARENG i khumichi achu nai theung y mymy i pahen nai sai ai paleung hawi verei palo ai.

²ARENG i sa nai saichi ly lyh ai hawi parai na! Huni sa nai saichi ai ngai nai khumi bawibawichi ly hunichi pany ai nai hau u nai ne.

³Mymy i sa nai leaungsai ngiereichi ly nang parai nai hawimy kawi na bo; mymy i hawi naira ly deungtasarei ne.

⁴ARENG ly mymy i sa nai lyh ai hawi parai naichi ai, achi my tami y ai nai ang sa pi; mymy ly pahen naira, tamen naira hawimy kawi angym bo.

⁵Mymy ai tahm khai nai khumichi ai pacho panei nai ne; mymy i Leu Maikawm ai mana khala py tami y ai.

⁶Mymy ly khumi takhrachi i prichi ai, mymy i khumichi teng y pei nai hawimy, mymy i sa thai naira patei pi ai.

⁷Mymy i sa nai leaungsai bawibawichi ly ka-ym awm nai hawi, leu meitang py amlau nai ne; mymy i Reita leu pei nai bawibawichi ly ym ai nai hawi parai.

⁸Huni Reita leu pei naichi ly khaw jojo nai ne; hunichi ai ly leu meitang naira py, hawi naira py, sa pi yb nai bo.

⁹Mymy ly mymy i khumichi ai tlamsa naira pei chum baly, nichi hawi deungtasarei Leu Maikawm asa bo. Mymy ly kachai ne iy sa thai naira len parai na a!

¹⁰ARENG ai jei kaji thai nai ka-dawn ly cheng naira i pakeung sangum ne; Reita leu patawm nai khumi bawibawichi teng y meitang naimy leu pacheang pajau ai nai, mymy ly pei bo. Mymy ai ly deungtasarei palo u jojo sy.