Read Khumi Chin SAM 118 Bible Online

SAM 118 - Khumi Chin bible

SAM 118

¹ARENG ly hawi nai ne i, tamen naira ly deungtasarei awm nai deaungkho y, mymy ai kawn nai palo u.

²“Nang i tamen naira ly deungtasarei ne,” nanai Israela chengchi thui u sy.

³“Nang i tamen naira ly deungtasarei ne,” nanai Tameuh i pathyp pi nai keungchi thui u na sy.

⁴“Nang i tamen naira ly deungtasarei ne,” nanai nang ai chiu nai khumi bawibawichi my thui u sy.

⁵Kai ly khri pa-rei patang naira avum nai deaungkho y, ARENG teng y chiu kasa; mymy py pathang i, kai ai lawi naira nga hai bo.

⁶ARENG ly kai hawi vanrei awm nai ne i, kai ly jei ai ny y; khumi ly kai ai ati sa hai pajau ai mo?

⁷Kai ai sabawm nai keung ly ARENG ne nai deaungkho y, kai ly paleung ka-echi sum nai kaniu ai.

⁸Khumi ai ym nai tleaung y ly ARENG ai ym nai ly hawi keh.

⁹Lu sa nai khumi ai ym nai tleaung y ly ARENG ai ym nai ly hawi keh.

¹⁰Kai i tengpang sahawi y paleung ka-echi awm teu i py, kai ly ARENG i sa thai naira hawimy, nichi ai katamyh pawn nai ne!

¹¹Nichi ly cheaungkhangra mang kai ai ang taki na teu i py, kai ly ARENG i sa thai naira hawimy, nichi ai katamyh pawn nai ne!

¹²Nichi ly khawichi kamta kai ai ang tabawm u teu i py, aleng phreung ai mai my kang nai kamta, tama pawn veng ryp bo; kai ly ARENG i sa thai naira hawimy, nichi ai katamyh pawn nai ne.

¹³Kai ly khri pa-rei ang tiu nai avum iy sum teu i py, ARENG ly kai ai sabawm bo.

¹⁴ARENG ly kai ai sa thai naira haiho len hai nai ne; mymy ly kai ai atleu bo.

¹⁵“ARENG ly khri pa-rei sa thai naira hawimy lyh ai awm naichi sa! Sa thai naira len parai nai saho y, kaichi ly eaung naira nga bo!,” nanai

¹⁶Tameuh i khumichi ly Taichi theung mang dengdairei amo theu parai naimy eaung nai raawi hawi aeu nai ly tangai u.

¹⁷Kai ly dei y naimy heng i, ARENG i sa nai saichi thui pi ai.

¹⁸Mymy ly kai ai khri pa-rei pajeng teu i py, dei nai areng kiu y au y leang.

¹⁹Kai i vui Achura yhm katheuchi paeaung pi u; kai ly kun iy ARENG ai palo ai

²⁰Hini katheu ly ARENG i katheu ne i, khumi kahawichi naini kun ai nga khyh nai ne.

²¹Aw ARENG, nang ly kai i hnei nai thai i, kai ai eaung naira pei nai deaungkho y, kai ly nang ai palo nai ne.

²²Yhm sa nai khumichi my khai su nai lengseaung ly aly len keh nai taki i lengseaung lawm bo.

²³Hini ly ARENG i sa nai kalop ne; achi i mei ka-niu y lyh ai awm parai na a!

²⁴Hini kani ly ARENG i eaung nai kani ne i, achi ly amo theu parai naimy pawi so u sina!

²⁵Aw ARENG, kaichi ai atleu kyh ba, kaichi ai atleu kyh ba! Aw ARENG, kaichi ai eaung ai nai pei kyh ba!

²⁶ARENG i amyn y jeu nai keung ai ly Tameuh my amtheaung naira pei sy! Kaichi ly ARENG i yhm mang dengdairei, nang ai amtheaung naira pei ai.

²⁷ARENG ly Tameuh ne; mymy ly achi ai hawi ang sa pi bo. Nangchi ly lymlo changpichi syn ly pawi sa amteaung iy, maicham kamki tapai u.

²⁸Nang ly kaichi i Tameuh ne i, kaichi ly nang ai kawn naimy palo ai; kaichi ly nang i nang parai nai saichi amthang hai ai.

²⁹ARENG ai kawn naimy palo u; ati mana nai mo nabaly mymy ly hawi i, tamen naira py deungtasarei ne.