Read Khumi Chin SAM 119 Bible Online

SAM 119 - Khumi Chin bible

SAM 119

¹ARENG i Reita leu ai sa patawm iy, kamngo by y pa-rei heng nai khumi ly taham hawi.

²Mymy i thui parip naichi ai sa patawm iy, leu pei naichi ai paleung hawi verei tangai nai khumichi ly taham hawi.

³Huni khumichi ly kamngo so u y naimy, ARENG i reita lam y tako u reng nai ne.

⁴Aw ARENG, nang ly nangmy i Reita leuchi ai kaichi teng y pei iy, hunichi ai sai py takhawi y pa-rei, sa patawm ai nai leu pei bo.

⁵Kai ly nang i leu pei naichi ai sau py takhawi y pa-rei, sa patawm ai nai khri pa-rei ngai parai nai ne.

⁶Kai ly nang i leu pei nai bawibawichi ai dawn ryh patyh lawh baly, kangji kangai nga ai ny y.

⁷Kai ly nang i leu meitang naimy tara chih naichi ai tangai iy, chai parai nai paleung hawi nang ai palo ai.

⁸Kai ly nang i reita leu pei naichi sa patawm ai; kai ai mana khala py khai su moh ba.

⁹Thawndeang deaungdichi ly chai pyn pa-rei mana heng pajau ai mo? Nang i reita leu pei naichi tangai baly. chai parai naimy awm pajau nai ne.

¹⁰Kai ly paleung hawi verei, nang i miseaung lawm ai nai atho sa ai; kai ly nang i reita leu pei naichira i nai amphri vui moh sy.

¹¹Kai ly nang i tlang tleaung y kamngo so y ai nai, kaimy i paleung theung y nang i reita leu ai kapateung me bo.

¹²Aw ARENG, kai ly nang ai kang palo bo; kai ai nang i reita leuchi patiu pi kyh ba.

¹³Kai ly nang i pei nai reita leu bawibawichi ai tao pajeng parai naimy kathui ai.

¹⁴Kai ly yhmtheaung katuichi tleaung y, nang i leu pei naichi ai ngai keh.

¹⁵Kai ly nang i reita leaungsaichi ai dawn pasym naimy, nang i lam patei naichi ai dawn patyp jojo ai.

¹⁶Kai ly nang i reita tanynchi ai ngai; kai ly nang i leu pei naichi tami ai ny y.

¹⁷Nang i miseaung kai ai hawi so pi kyh ba; hunaibaly kai ly heng nai ryrei, nang i thui pi naichi tangai pajau ai.

¹⁸Nang i reita theung i lyh ai hawi naichi niu thai ai nai kai i mei angvang hai kyh ba.

¹⁹Kai ly hini khaileaung pri y tanarei chy awm khyh nai ne; nang i reita leu pei naichi ai, kai teng i nai heu pi veng moh kyh ba.

²⁰Kai ly nang i tara chih pi nai saichi ai neng tleirei, paleung theung y kadeaung naimy awm bo.

²¹Nang ly paleung len amlyh nai khumichi ai parip patyp nai ne; nang i reita leu pei naichi tangai y nai khumichi ly taham si u bo.

²²Kai ly nang i reita leu pei naichi sa patawm nai ne i, kai ai huni khumichi my mei aniu y nai hawi tahm khai y naichira i nai lawi hai kyh ba.

²³Peang nai keungchi ly kai ai ka-awi sa ai nai arum u bo; nang i miseaung kai ly nang i reita leaungsaichi dawn pasym ai.

²⁴Nang i thui parip nai saichi ly kai ai amo theu hai bo; hunichi ly kai ai lam patei nai ne.

²⁵Kai ly sum i, spryhra y atlym nai deaungkho y, nang i adeu nai kamta heng ai nai pei kyh ba.

²⁶Kai ly kaimy i sa nai kamngochi ahui teang bo i, nang ly kai i takeng nai tangai pi kyh ba; nang i reita lamchi kai ai patiu pi kyh ba.

²⁷Nang i reita leu pei naichi pany thai ai nai kai ai sabawm kyh ba; kaichi ly nang i lyh ai hawi nai patiu pi naichi[100]dawn pasym ai.

²⁸Kai ly paleung si naira avum naimy awm bo; nang i leu adeu nai kamta, kai ai atho pei kyh ba.

²⁹Kai ly lam tamang naira y tako y ai nai sabawm kyh ba; nang i pahen naira molam y, kai ai reita leu pei naichi patiu kyh ba.

³⁰Kai ly nang i leu tangai ai nai dawn yb bo; nang i sa pi nai reitachi ai py tangai patyp bo.

³¹Aw ARENG, kai ly nang i leu pei naichi tangai bo mang; kai ai kangji ngo hai mo kyh ba.

³²Nang ly kai ai cheng naira am-eaung hai ra nai ne i, kai ly leu pei naichi paleung ngai parai naimy tangai ai.

³³Aw ARENG, kai ai nang i reita theung i, thui pachai nai pany ai nai patiu pi kyh ba; kai ly hunichi avawrei tangai ai.

³⁴Nang i reita kai ai thui pi kyh ba; huni ai kai ly tangai ai; paleung hawi verei atyp ai.

³⁵Kai ly nang i reita leu pei naichi tangai nai deaungkho y, huni reita leu pei naichi atyp pajau ai nai sabawm kyh ba.

³⁶Yhmtheaung katui nang chawn ai ngai nai paleung ka-dawn tleaung y, nang i reitachi tangai ai ngai nai paleung ka-dawn kai ai pei kyh ba.

³⁷Hawi y naichi tangai y ai nai kai ai amkyn hai ly nang i adeu nai kamta, kai ai hawi so pi kyh ba.

³⁸Nang ai jei naimy tahm khai nai khumichi teng y leu adeu naichi ly nang i miseaung kai ai pei kyh ba.

³⁹Kai i jei hyn nai khumi aniu y naichi teng i nai, kai ai atleu kyh ba; nang i tara chih nai saichi ly lyh ai hawi parai na a!

⁴⁰Kai ly nang i reita leu pei naichi tangai ai nai khri pa-rei ngai; nang ly leu meitang ne nai deaungkho y, kai ai heng ai nai pei kyh ba.

⁴¹Aw ARENG, nang ly kai ai mana tanrei tamen mo, nanai patei ba; nang i leu adeu nai kamta, kai ai atleu kyh ba.

⁴²Huna nai khala kai ai khumi aniu y naichi ai, vawitheung tha pajau ai; ati mana nai mo nabaly kai ly nang i leu ai ym nai deaungkho y ne.

⁴³Kai ly nang i tara chih nai saichi ai ajeng nai ne i, neng tleirei ka-ym awm nai leu thui pajau ai nai kai ai sabawm ba.

⁴⁴Kai ly nang i leu pei naichi tangai jojo ai; deungtasa khrairei tangai ai.

⁴⁵Kaimy ngai ngai tlamsa naimy kaawm ai; ati mana nai mo nabaly nang i leu pei naichi ai atho sa naimy tangai nai deaungkho y.

⁴⁶Kai ly nang i thui parip nai saichi ai, samrangchi i mo y pany hai ai; kai ly kangji kangai nga ai ny y.

⁴⁷Kai ly nang i reitachi ai ngai parai nai deaungkho y, hunichi tangai naira y amo theu naira awm nai ne.

⁴⁸Kai ly nang i reita leu pei naichi tahm khai bo; kai ly nang i reita leaungsaichi ai adawn pasym ai.

⁴⁹Nang i miseaung kai teng y adeu nai ly pany pi jo kyh ba; huni leu ka-deu ly kai ai athang khai naira pei nai ne.

⁵⁰Nang i adeu nai ly kai ai heng hai nai ne i, ngari kamtang avum nai khala malawn py, kai ly paleung awmnem naira nga bo.

⁵¹Paleung len amlyh nai khumichi ly kai ai avawrei panui hai teu i py, kai ly nang i reita lam i nai hi vui y leang.

⁵²Jangni deung i nangmy pei nai tara chih nai saichi ai kapany jo; aw ARENG, hunichi ly kai ai paleung awm hai nem bo.

⁵³Khumi aso y naichi my nang i reita ai khai su nai niu nai khala y, kai ly kado theu nai ne.

⁵⁴Kai ly hini khaileaung pri y kani tanarei chy heng nai thym khala, nang i reita leaungsaichi ai khulym adi iy thui nai ne.

⁵⁵Aw ARENG, vum y kai ly nang ai tami y naimy nang i reita ai adawn pasym nai ne.

⁵⁶Nang i reitachi tangai nai ly kai ai amo theu hai bo.

⁵⁷Aw ARENG, kai ly nang ai naini kadeaung nai ne; nang i reita leu pei naichi tangai ai nai adeu bo.

⁵⁸Nang i leu adeu nai kamta, kai ai pahen ai nai paleung hawi tlang verei, kang takeng nai ne.

⁵⁹Kai ly kaimy i amhi amtlau nai dawn pasym teang bo; nang i thui parip nai saichi kamta, katangai ai nai adeu nai ne.

⁶⁰Kai ly nang i reita leu pei naichi ai, vaimy tangai praw ryp ai.

⁶¹Khumi hawi y naichi ly kai i vui deaung pateung u; na i py kai ly nang i reita leu pei naichi tami y ai.

⁶²Kai ly vum anenghyh y anglaw iy, nang i meitang naimy tara chih nai saichi molam y, nang ai palo ai.

⁶³Kai ly nang i kalop sa pi nai khumi bawibawichi hawi, reita leu tangai nai khumi bawibawichi i ahawi ne.

⁶⁴Aw ARENG, khaileaung pri ly nang i khawi parai nai tamen naira hawimy kawi angym bo; kai ai nang i reita leu pei naichi patiu pi kyh ba.

⁶⁵Aw ARENG, nang ly ka-ym awm nai ne i, nang i miseaung kai ai hawi hai ba.

⁶⁶Kai ly nang i reita leu pei naichi ym nai deaungkho y, kai ai cheng naira hawi pany thai naira pei kyh ba.

⁶⁷Nang ly kai ai pajeng y rai khala kai ly lam tamang lawh teu i py, vai ly nang i leu tangai bo mang.

⁶⁸Nang ly khri pa-rei hawi iy pahen na ly! kai ai reita leaungsai patiu pi kyh ba.

⁶⁹Paleung len amlyh nai khumichi ly kai i satang ka-chawi naimy thui u bo; kai ly reitachi ai paleung hawi verei tangai nai ne.

⁷⁰Huni khumichi ly pany thai naichi ny y; na i py kai ly nang i reitara y amo theu bo.

⁷¹Pajeng naira avum nai ly kai i vui hawi khyp; ati mana nai mo nabaly huna nai avum nai molam y kai ly reita leaungsaichi ai pany thai nai ne.

⁷²Nang i pei nai reita leuchi ly kai i vui khaileaung pri i muku tangka bawibawi tleaung y vang teng keh nai ne.

⁷³Nang ly kai ai sa iy chymme naimy khai bo; nang i reita leuchi pany thai ai nai, kai ai cheng naira pei kyh ba.

⁷⁴Kai ly nang i adeu nai leu ym nai deaungkho y, nang ai jei naimy tahm khai nai khumichi ly kai ai niu iy amo theu u ai.

⁷⁵Aw ARENG, nang i tara chih nai saichi ly adyh adawi nai ne, nanai py, meitang khyp naimy kai ai pajeng, nanai py kai ly pany bo.

⁷⁶Nang i adeu nai kamta nang i khaw parai nai tamen naira ly nang i miseaung kai ai paleung awmnemra pei sy.

⁷⁷Kai ly nang i reita leu ai paleung apei nai ne i, kai ai pahen kyh ba; hunaibaly kai ly heng ai.

⁷⁸Paleung len amlyh nai khumichi ly kai ai ka-chawi naimy seu u nai molam y kangji ngo u sy; kai i vui ly nang i patiu pi naichi adawn pasym ai.

⁷⁹Nang ai jei naimy tahm khai nai khumi, nang i thui parip nai saichi pany nai khumichi ly kai teng y jeu u sy.

⁸⁰Kai ly nang i reita leu pei naichi ai sai py takhawi y naimy tangai nai deaungkho y, sum naira hawi kangji kangai ngo hai mo kyh ba.

⁸¹Aw ARENG, kai ly nangmy atleu ai, nanai ajeng i atho khei be bo; kai ly nang i leu ai ym nai ne.

⁸²“Kai ai mana khala sabawm ai mo?,” nanai kang deng nai khala y, nang i adeu nai ai ajeng nai ly kai i meichi khohai na bo.

⁸³Kai ly aphi su nai mawi peih adym kamta, teaung ai nai ngo y bo; na i py nang i leu pei naichi tami y leang.

⁸⁴Kai ly mana tanrei neng ajeng ai mo? kai ai ana nai khumichi ai, mana khala pajeng ai mo?

⁸⁵Nang i reita leu tangai y nai paleung len amlyh nai khumichi ly kai ai patiu ai nai angawmchi tai u nai ne.

⁸⁶Reita leu pei nai ngiereichi ly ym ai nai hawi parai; khumichi ly ka-chawi thui naimy kai ai ana u bo, kai ai sabawm kyh ba!

⁸⁷Nichi i kai ai padei ai nai atho sa nai ly eaung vi na bo; na i py kai ly nang i leu pei naichi ai dawn y naimy awm y leang.

⁸⁸Kai ly nang i reita leu pei naichi ai tangai pajau ai nai, nang i khaw parai nai tamen naira deaungkho y kai ai pahen kyh ba.

⁸⁹Aw ARENG, nang i reita leu ly kani pri mang y deungtasarei awm jo nai ne.

⁹⁰Nang i ka-ym awm nai py deungtasarei awm jojo; khaileaung pri ly nangmy meingtym sa pi nai kamta awm bo.

⁹¹Ati cheaungkhangchi ly nang i miseaungchi ne nai deaungkho y, nang i leu pei nai kamta, vaini khrairei awm jo nai ne.

⁹²Nang i reita leu ly kai i vui amo theu naira lawm y lawh baly, kai ly kaimy i avum nai ngari kamtang molam y dei ai nai ne.

⁹³Nang ly reita leuchi saho y kai ai heng hai nai deaungkho y, kai ly hunichi ai mana khala py dawn y nai awm ai ny y.

⁹⁴Nang ly kai ai peang; hunai deaungkho y atleu kyh ba; kai ly nang i reita leu ai atho sa naimy tangai bo.

⁹⁵Khumi hawi y naichi ly kai ai padei ai nai ajeng u teu i py, kai ly reita leu pei naichi adawn pasym jojo ai.

⁹⁶Nang i reita leu ly kau parai; na i py reita leu ny y baly ati sai py angym nai by y, nanai kai ly pany nai ne.

⁹⁷Kai ly nang i reita leu ai khri pa-rei paleung apei nai ne! huni reita leu ai kai ly kani khengrei adawn pasym bo.

⁹⁸Nang i reita leu ly kai hawi vanrei awm jo nai ne; huni reita leu saho y kai ly paleung ka-echi tleaung y cheng keh.

⁹⁹Kai ly nang i thui parip nai saichi ai adawn pasym jo nai deaungkho y, kai i sara bawibawichi tleaung y pany nai ne.

¹⁰⁰Nang i reita leuchi tangai nai deaungkho y, saneng len naichi tleaung y cheng naira awm keh.

¹⁰¹Nang i thui nai leu kamta tangai nai ne i, amhi amtlau nai sai hawi y nai bawibawichi khai su bo.

¹⁰²Kai ai thui parip nai keung ly nang ne nai deaungkho y, kai ly nang i leu pei naichira i nai hi vui y leang.

¹⁰³Nang i thui parip nai saichi ly kai i palai kadeaung y khri pa-rei tui na; khawi hang tleaung y malawn py tui nai ne.!

¹⁰⁴Kai ly reita leuchi theung i cheng naira nga nai deaungkho y, amhi amtlau nai sai hawi y nai ngiereichi ai, kaniu ngai y bo.

¹⁰⁵Nang i leu ly kai i kheu keung y maisi yhm ne i, kai i tako nai lam y angvang hai bo.

¹⁰⁶Nang i meitang naimy tara chih naichi tangai ai, nanai kai ly amy i vaineng abeu nai khaw hai ai.

¹⁰⁷Aw ARENG, kai ly khri pa-rei patang naira avum bo; nangmy i adeu nai kamta, kai ai heng ai nai pei kyh ba.

¹⁰⁸Aw ARENG, kai i kawn nai leu thui naimy chiu sa nai ly kawn pi iy, nang i leu pei naichi py kai ai patiu pi kyh ba.

¹⁰⁹Kai ly kani tleirei dei naira avum nai ne; na i py nang i reita leu ai tami y leang.

¹¹⁰Khumi aso y naichi ly kai i vui deaung pateung pi u bo; na i py kai ly nang i reita leaungsaichi ai khai su y leang.

¹¹¹Nang i reita leuchi ly kai i vui deungtasarei ne i, kai ai amo theu hai nai ne.

¹¹²Kai ly dei pa-rei reita leuchi tangai ai nai leu pacheang yb bo.

¹¹³Kai ly nang i tlang tleaung y paleung adi adiu awm naichi ai kaniu ngai y; nang i reita leu ai ly paleung apei nai ne.

¹¹⁴Nang ly kai i ama hai naira hawi abyhra ne; kai ly nang i adeu nai leu ajeng naimy awm bo.

¹¹⁵Nangchi kamngo sa nai khumichi awi, kai teng i nai theu u pawn; kai ly kai i Tameuh my pei nai reitachi tangai ai.

¹¹⁶Nangmy adeu nai kamta kai ai atho pei kyh ba; hunaibaly kai ly heng ai; kai i athang khai naira phra hai moh kyh jemjem ba.

¹¹⁷Tlamsa naira nga hai ai nai kai ai dawmkhawn pi kyh ba; kai ly nang i reita leaungsaichi ai tangai jojo ai.

¹¹⁸Nang ly reita leuchi tangai y nai khumi bawibawichi ai khai su bo; huni khumichi i tapawp nai ka-dawnchi ly tyhtyh teu bo.

¹¹⁹Nang i mo y khumi aso y nai bawibawichi ly anyn angso kamta ne; hunai deaungkho y kai ly nang i thui parip naichi paleung apei nai ne.

¹²⁰Nang ai jei nai deaungkho y kai ly khuma phau na bo; nang i tara chih nai saichi molam y kai ly jei na bo.

¹²¹Kai ly kateng kataw kasa nai ne; kai ai paleung ka-echi i kiu y khai su moh kyh ba!

¹²²Nang i miseaung ai sabawm ai, nanai adeu nai leu pei kyh ba. paleung len am-e nai khumichi ai, kai ai ana ai nai pei moh ba.

¹²³Nang i sabawm ai nai hawi, atleu ai adeu nai ajeng nai ly kai i mei khohai na bo.

¹²⁴Nang i khaw parai nai tamen naira ly kai ai sabawm iy, reita leaungsaichi patiu pi kyh ba.

¹²⁵Kai ly nang i miseaung ne nai deaungkho y patiu pi naichi pany thai ai nai, kai ai cheng naira pei kyh ba.

¹²⁶Aw ARENG, khumichi ly nang i reita ai tangai u y nai deaungkho y, nangmy pajeng ai nai neng tym nai ne.

¹²⁷Kai ly nang i reita leu pei naichi ai muku tleaung y py, muku tangcheng tleaung y malawn py ngai keh nai ne.

¹²⁸Hunai deaungkho y kai ly nang i leu patiu pi nai ngiereichi ai tangai iy, lam teng y nai ngiereichi ai niu ngai y bo.

¹²⁹Nang i thui parip nai saichi ly lyh ai nai hawi parai; hunichi ai kai ly paleung hawi verei tangai nai ne.

¹³⁰Nang i leu ai thui pi pachai nai ly kangvang pei iy cheng y naichi ai cheng naira nga hai bo.

¹³¹Kai ly nang i leu pei naichi ai ngai nai kadeaung i, akawm nai y labeaung anghau nai, tao jeng na bo.

¹³²Nang ai tamen nai khumichi ai pahen nai kamta, kai ai khen iy pahen teang kyh ba.

¹³³Nang i adeu nai kamta, kai atlym y ai nai kry kyh ba; kamngo my ly kai ai peang moh sy.

¹³⁴Kai ly nang i reita leaungsaichi tangai pajau ai nai kai ai ana nai khumichi teng i nai atleu kyh ba.

¹³⁵Nang i kangvang ly kai i tlang tleaung y angvang hai iy, kai ai reita leu pei naichi patiu pi kyh ba.

¹³⁶Khumichi ly nang i reita leu ai tangai u y nai deaungkho y, kai i mei katuichi ly tavo tui kamta leaung na bo.

¹³⁷Aw ARENG, nang ly adyh adawi nai keung ne; reita leuchi py adyh adawi nai ne.

¹³⁸Nang i pei nai reita leaungsaichi ly khri pa-rei adyh adawi nai ne i, teng parai.

¹³⁹Kai i paleung ka-echi ly nang i leu ai tahm khai u y nai deaungkho y, kai i kado theu nai ly mai kadeu kamta angveaung na bo.

¹⁴⁰Nang i adeu nai ly khri pa-rei ka-ym awm nai ne! kai ly huni adeu nai leu ai paleung apei nai ne!

¹⁴¹Kai ly tahm by y nai khumi ne i, ami my py khumi aniu y bo; na i py reita leaungsaichi ai tami y leang.

¹⁴²Nang i neaung hawi nai ly deungtasarei ne; nang i reita leu ly teng jojo.

¹⁴³Kai ly paleung bi, paleung mawn naira avum; na i py reita leuchi my, kai ai amo theu naira ang pei bo.

¹⁴⁴Nang i thui parip naichi ly teng jojo; kai ai cheng naira pei kyh ba; hunaibaly kai ly heng ai.

¹⁴⁵Kai ly paleung hawi verei chiu kasa bo; aw ARENG, kai ai pathang pi kyh ba; kai ly nang i leu pei naichi tangai ai!

¹⁴⁶Kai ly nang ai kang palau bo; kai ai atleu kyh ba; kai ly nang i reita leu pei naichi tangai bo.

¹⁴⁷Kai ly sabawm naira nga ai nai kani si y rai khala, nang ai kang palau bo. kai ly nang i adeu naichi ai kadeaung bo.

¹⁴⁸Kai ly nang i parip naichi dawn pasym ai nai, vumtorei i y naimy aseaung jo nai ne.

¹⁴⁹Aw ARENG, nang i tamen naira khaw parai nai deaungkho y, kai i chiu sa nai tangai pi kyh ba; pahen parai naimy kai i hengra tamo hai moh kyh!

¹⁵⁰Kai ai pahyp y naimy ana nai khumichi ly sa hawi y ang tym dudu bo; nichi ly nang i reita leu mang y abang u y nai khumichi ne.

¹⁵¹Na i py aw ARENG, nang ly kai i sa hawi y awm bo; nang i leu pei nai ngiereichi ly teng parai nai ne.

¹⁵²Kai ly deaungdi khala i dengdairei, nang i thui parip nai saichi ai kapany yb bo; hunichi ai nang ly khaw hai jojo nai ne.

¹⁵³Kai i patang nai saichi khen pi cham ly atleu kyh ba; ati mana nai mo nabaly kai ly nang i reita leu dawn y naimy awm ai ny y.

¹⁵⁴Kai i molam y kai mang y awm hai iy, kai ai tlamsa naira pei kyh ba; nangmy i adeu nai kamta kai ai atleu kyh ba.

¹⁵⁵Khumi aso y naichi ly nang i reita leu pei naichi tangai u y nai deaungkho y, nang ly nichi ai atleu pi ai ny y.

¹⁵⁶Na i py aw ARENG, nang i pahen naira ly len parai na i, pahen parai naimy kai ai atleu kyh ba.

¹⁵⁷Kai ai ka-jo hau naichi hawi ana naichi ly nawi parai; na i py kai ly reita leu pei naichi tangai ai nai phra vai y leang.

¹⁵⁸Kai ly leu atangai y nai khumichi ai niu nai khala y, khri pa-rei paso parai; ati mana nai mo nabaly nichi ly nang i leu pei naichi so patawm u y nai ne.

¹⁵⁹Aw ARENG, kai ly nang i reita leu pei naichi ai mana tanrei paleung apei mo, nanai pany pi kyh ba. nang i tamen nai ly takhra vai y nai deaungkho y, kai ai atleu kyh ba.

¹⁶⁰Nang i reita sangum ly leu meitang ne; nang i leu meitang naimy tara chih nai bawibawi ly deungtasarei awm jo nai ne.

¹⁶¹Sa thai naira awm nai khumichi ly kai ai atyhtyh naimy ana u bo; na i py kai ly nang i reita leu ai tahm khai nai ne.

¹⁶²Nang i leu adeu naichi molam y, kai ly khri pa-rei amo theu; ateaung alang neangneang niu nai khumi kamta, amo theu nai ne.

¹⁶³Kai ly ka-chawi thui nai ngiereichi ai niu ngai y i, kapaso; na i py nang i reita leu ai paleung apei nai ne.

¹⁶⁴Kai ly nang i leu meitang naimy tara chih nai saichi molam y, kanirei y tlen saryhrei, nang teng y kawn nai leu kathui bo.

¹⁶⁵Nang i reita leu pei nai ai paleung apei nai khumichi ly khri pa-rei paleung awmnem naira nga u nai ne; mani my py nichi ai atlym hai pajau y leang.

¹⁶⁶Aw ARENG, kai ly nangmy atleu pi ai, nanai ajeng naimy nang i reita leuchi tangai nai ne.

¹⁶⁷Kai ly nang i thui parip pi naichi tangai bo; kai ly hunichi ai paleung apei nai ne.

¹⁶⁸Kai ly nang i leu pei naichi hawi reita leuchi tangai bo; nang ly kai i sa nai ngiereichi ai niu nai ne.

¹⁶⁹Aw ARENG, sabawmra nga ai nai kai i aeu nai raawi ly nang teng y tym sy! Nangmy i adeu nai kamta, kai ai pany thai naira pei kyh ba.

¹⁷⁰Kai i chiu sa nai tangai pi iy, nangmy i adeu nai kamta, kai ai atleu kyh ba.

¹⁷¹Nang ly kai ai reita leu patiu pi nai deaungkho y, kai ly nang ai kang palo jojo ai.

¹⁷²Nang i patiu pi naichi ly ka-dyh ka-dawi ne nai deaungkho y, kai ly nang i pei nai leu ai khulym thui ai.

¹⁷³Kai ly leu pei naichi ai kry nai deaungkho y, kai ai sabawm ai nai angveirym jo kyh ba.

¹⁷⁴Aw ARENG, kai ly nang i atleu naira nga ai nai kadeaung jojo! Nang i reita ly kai ai amo theu hai bo.

¹⁷⁵Nang ai palo pajau thai ai nai, kai ai heng ai nai pei kyh ba; nang i patiu pi nai saichi ly kai ai sabawm sy.

¹⁷⁶Kai ly tama nai beram kamta lam tamang bo; hunai deaungkho y jeu ly nang i miseaung kai ai hau kyh ba; kai ly nang i reita leu pei naichi ai tami y leang.