Read Khumi Chin SAM 135 Bible Online

SAM 135 - Khumi Chin bible

SAM 135

¹ARENG ai palo u! ARENG i miseaung, ARENG i yhm napi nai

²achi i Tameuh i Achura yhm theung y angdo nai khumichi awi, mymy i amyn palo u.

³ARENG ly hawi nai deaungkho y mymy ai palo u; mymy ly pahen nai deaungkho y, mymy i amyn palo nai khulym thui u.

⁴Mymy ly Jakob ai mymy i vui hawi Israela chengchi ai, mymy i peang nai lawn ai nai py vawi takhra bo.

⁵Achi i ARENG ly nang parai, nanai kai ly pany; mymy ly tameuhchi bawibawi tleaung y py, nang parai keh nai ne.

⁶Mymy ly kani hawi khaileaung tleaung y py, pangli hawi pangli thiu parai nai theung y py, mymy i ngai nai kamta, ati cheaungkhangchi ai sa nai ne.

⁷Mymy ly khaileaung katem mang dengdairei khupanymchi sau hai i, alipui khupui aho ai nai i vui y, amlosadichi sa pi nai ne; ali ai py mymy i yhm theung i nai patheu bo.

⁸Aikupta pri y awm nai khumichi i chapo chalu ngiereichi hawi, tawnbawichi i cho chalu ngiereichi ai padei pi pawn bo.

⁹Huni pri y awm nai samrang Pharao hawi, ni i miteaung keh bawibawichi ai pajeng ai nai molam y, mymy ly rengrang ka-ma-rachi hawi, lyh ai hawi naichi sa pi nai ne.

¹⁰Mymy ly pri neangneangchi ai phra hai iy, sa thai naira awm nai samrangchi ai padei pawm bo.

¹¹Amori samrang Sihon, Bashan samrang Oka hawi, Kanan pri i samrang bawibawichi ai padei pawn nai ne.

¹²Mymy ly nichi i pri ai mymy i khumichi teng y pei pi; huni prichi ai Israela chengchi teng y pei pi nai ne.

¹³Aw ARENG, nang ly Tameuh ne, nanai khumichi ly avawrei thai u ai; nang i amyn ly deung kangthau khrairei amthang jojo ai.

¹⁴ARENG ly mymy i khumichi ai ama hai ai; mymy i miseaungchi ai pahen ai.

¹⁵Khumi cheng cheaungkhangchi i chiu nai mynchi ly muku tangka hawi sa naichi ne; hunichi ly khumi i kiu hawi sa naichi ne.

¹⁶Huni mynchi ly labeaung awm i py, leu katheu thai y; meichi awm i py niu pajau y.

¹⁷Nichi ly kanochi awm i py thai y; taho py taho thai y leang.

¹⁸Mynchi ai sa naichi hawi huni mynchi ai ym nai khumi bawibawichi ly mychi i sa nai mynchi kamta lawn u na sy!

¹⁹Aw Israela chengchi awi, ARENG ai ly palo u; Tameuh i pathyp pi nai keungchi awi, mymy ai ly palo u!

²⁰Levi theaungchi awi, ARENG ai palo u; mymy ai chiu nai khumi bawibawichi awi, mymy ai ly palo u!

²¹Zion mawi salo y py, mymy awm nai Jerusalem mary theung y py, mymy ai palo u. ARENG ai palo u!