Read Khumi Chin SAM 138 Bible Online

SAM 138 - Khumi Chin bible

SAM 138

¹[107] Aw ARENG, kai ly paleung hawi verei, nang ai kawn naimy palo ai; tameuhchi mo y nang ai palo nai khulym thui nai ne.

²Kai ly nang i nang parai nai Achura yhm kachai mang y motha iy, lu meung naimy nang i khaw parai nai tamen naira hawi, ka-ym awm nai molam y, nang i amyn kang palo mang; ati mana nai mo nabaly, nang i amyn hawi adeu naichi ly tahm awm keh, nanai patei pi nai deaungkho y ne.

³Nang ai kaimy palau nai khala y nang ly pathang iy, kai ai atho kangtha pei panawi bo.

⁴Aw ARENG, khaileaung pri y awm nai samrang bawibawichi ly nang i adeu nai leuchi thai u nai deaungkho y nang ai palo u ai.

⁵Nichi ly nang i sa nai leaungsaichi ai py, nang i nang parai nai phum-angchi ai py, khulym hawi palo u ai.

⁶Nang ly tahm asang parai teu i py, tahm anem nai khumichi ai kry nai ne; paleung len amlyh nai khumichi ai ly kamlo mang my pany bo.

⁷Kai ai patang nairachi my ang taki meuh nai neng khala malawn py, nang ly kai ai ama hai bo. Nang ly kai i paleung ka-echi kado theu nai paka iy, sa thai naira hawimy kai ai atleu bo.

⁸Nang ly kai teng y adeu pi nai kamta sa pi ai; aw ARENG, nang i tamen naira ly deungtasarei ne. Nang i sa amteaung nai kalop ai ly amcheang hai kyh ba.