Read Khumi Chin SAM 141 Bible Online

SAM 141 - Khumi Chin bible

SAM 141

¹[110] Aw ARENG, kai ly nang ai kang palau bo; vaimy sabawm praw kyh ba! nang ai kang palau nai khala y pathang pi kyh ba.

²Kai i chiu sa nai ly dym mang y kapathypra talam nai kamta kawn pi kyh ba.

³Aw ARENG, kai i labeaung i vui kry ai nai py, kai i labeaungkeh i vui tamcheaung ai py, khai pi kyh ba.

⁴Hawi y naira py, khumi aso y naichi hawi vanrei kamngo sa nairachi py, sa ai ngai nai paleung kai teng y tym hai moh kyh ba. Kai ly huni khumichi i cha nei pawichi sa naira y abawi y ai nai amkyn hai jojo kyh ba.

⁵Khumi kahawi ly kai ai pahen parai naimy pajeng nai hawi parip nai leu thui ai; na i py khumi hawi y naichi i tahm pasang nai ly kai ngai y leang; ati mana nai mo nabaly huni khumichi i kamngo sa nai molam y, kai ly avawrei chiu sa naimy awm nai deaungkho y ne.

⁶Nichi ai peang nai samrangchi ly lengseaung kachawn mang aphi nai avum u nai khala y, khumichi ly kai i thui nai leuchi teng khyp, nanai pany u ai.

⁷Huni samrangchi i hiuchi ly dei lawm na pa-rei khawi piu nai theng kamta, tapreaung angawm peang y ahei phro ai.

⁸Na i py salo kangteng aw ARENG, kai ly nang ai ymra ymra nai ne; kai ly nang teng y abyh ai; kai ai deira i nai amo hai kyh ba!

⁹Kai i vui huni khumichi my pateung pi yb nai deaung ra i py, hawi y sa nai khumichi i deaung tlaha ra i nai py, amo hai kyh ba.

¹⁰Kai ly deaung ra i nai phrumai by y pa-rei lawira ngo sy; khumi aso y naichi ly mychi i pateung nai deaung ra y man u sy.