Read Khumi Chin SAM 147 Bible Online

SAM 147 - Khumi Chin bible

SAM 147

¹ARENG ai ly palo! Achi i Tameuh ai palo nai khulym thui nai ly khri pa-rei hawi parai; mymy ai palo nai ly teng parai i, amlau keh nai ne.

²ARENG ly Jerusalem mary ai sa palum teang iy, pri takhra y awm u nai Israela chengchi ai palau ali teang bo.

³Mymy ly paleung phra naichi ai paleung awm hai nem iy, nichi i tamokalemchi ai bam pi typ nai ne.

⁴Mymy ly ka-si taukichi ai kati patyp iy, ka-si ha hareichi ai amyn pathi bo.

⁵Achi i Areng ly nang parai iy sa thai naira angym nai ne; mymy i cheng naira ai saju angka pata ai nai ngo y.

⁶Mymy ly tahm anem nai khumichi ai tahm pasang iy, khumi aso y naichi ai ly khaileaung y tym pa-rei atlym hai bo.

⁷Palo nai khulymchi thui iy ARENG ai palo u; taro beu nai katyn hawi, achi i Tameuh ai palo u.

⁸Mymy ly kani mang y khupanymchi hawi khiu; khaileaung y kani nai hai iy, mawichira y achachi prau hai bo.

⁹Mymy ly amso tawnbawichi ai teicha teinei pei pi; o-a chochi hang nai khala y pacho panei bo.

¹⁰Mymy ly atho awm parai nai keaungngochi ai py, sorai paleung awm nai tavaimichi ai py, aly ngai nai ny y leang.

¹¹Na i py mymy ai jei naimy tahm khai naichi, khaw parai nai tamen naira ai ym nai khumichi ai aly ngai nai ne.

¹²Aw Jerusalem mary, ARENG ai palo! Aw Zion mary, nang i Tameuh ai ly palo!

¹³Mymy ly nang i mary apai katheu ai khaw hai iy, nang i mary khumichi ai amtheaung naira pei bo.

¹⁴Mymy ly nang i mary apai katheu ai chymme pa-rei khai iy, nang ai hawi keh nai chohpui chamaw hawi paleung tuinem hai ai.

¹⁵Mymy ly khaileaung ai leu pei; huni leu pei nai kamta tym ryp bo.

¹⁶Mymy ly beram mui kamta thokhe nanai ji amaichi tla hai iy, maiphudei kamta kadam amaichi tla hai bo.

¹⁷Mymy ly kani amaichi ai lengseaungdeichi kamta tla hai bo; mymy i pato nai kasavai ly ami py kham pajau y na!

¹⁸Hunaibaly mymy ly leu pei nai deaungkho y, tuikhichi ly tlawn veng na; ali ai aho hai nai deaungkho y, tui ly leaung na bo.

¹⁹Mymy ly mymy i leu ai mymy i khumichi teng y py, reita leaungsai hawi reita leu pei naichi ai Israela teng y py, pei pi nai ne.

²⁰Mymy ly cheng takhrachi i vui, hina nai kamta so pi y leang; nichi ly mymy i reita leu ai pany u y. ARENG ai palo u!