Read Khumi Chin SAM 18 Bible Online

SAM 18 - Khumi Chin bible

SAM 18

¹[16] Aw ARENG, kai ly nang ai khri pa-rei tamen! nangmy py kai ai ama hai nai keung ne.

²ARENG ly kai ai ama hai nai keung, kai i khaw parai nai khengsi apai ne. Kai i Tameuh ly kai ai ama hai nai deaungkho y kai ly chymme bo. Mymy ly khupui kamta kai ai ama hai. Kai mang y amtang hai iy kai ai chymme naimy ang khai.

³Kai ly ARENG teng y kahnei nai khala, mymy ly kai ai paleung ka-echi kiu i nai atleu bo. ARENG ai ly palo u!

⁴Deira vuinawnchi ly kai ai ang pi cheng na. Taphra naira tui sampyhchi ly kai i salo y um na bo.

⁵Deira vuinawnchi ly kai ai ang pi cheng na. Deira angawm my ly kai ai patiu ai nai deaung pateung yb bo.

⁶Kai ly patangra avum nai y ARENG ai kapalau; kasabawmra nga ai nai kai i Tameuh ai kapalau nai ne. Mymy ly Achura yhm theung i dengdairei kai i palau nai raawi tangai pi bo.

⁷Naibaly Tameuh i kado theu nai molam y, khaileaung amchyh na pa-rei kalei theu hai. Mawichi ly kheutang mang dengdairei amchyh. Sabawmra nga ai nai kai i aeu nai raawi, mymy ly thai bo.

⁸Mymy i notareang theung i dengdairei maikhyhchi py, labeaung mang dengdairei kang hai thai nai mai kadeu hawi mai-aichi py theu nai ne.

⁹Mymy ly kani katheu paeaung iy satla kathiu bo. Kheu padawi anui y panum biu nai khupanymchi awm.

¹⁰Mymy ly kheruben tleaung y atang naimy, ali kamrawi y satla kathiu bo.

¹¹Mymy ly mymy ai kaveng hawimy khiu bo. Mymy i sahawi y tui my kawi mang i, thokha nanai tamaichi awm.

¹²Mymy i mo y kani amai hawi mai kadeuchi ly amlosadi dengdairei theu i, panum biu nai khupanymchi ai ta-i vui iy tla bo.

¹³ARENG ly kani mang dengdairei kani pajyh hai; salo kangteng keh nai keung i raawi theu bo.[17]

¹⁴Mymy ly thailihochi ko naimy, paleung ka-echi ai ahei hai pawn bo. Amlosadi theu hai naimy nichi ai angpreng hai bo.

¹⁵Aw ARENG, nang ly paleung ka-echi ai kado katheu hang hai nai raawi hawimy parip nai khala, suida pangli paichi khaileaung py, khaileaung i sangum langdengchi py, am-eaung seaungkhrang na bo.

¹⁶ARENG ly kani mang dengdairei kiu jaha iy, kai ai amkhaw i, tui thiu parai nai theung i nai, kai ai atheu kalau bo.

¹⁷Mymy ly kai acham iy pajau y nai, khri pa-rei sa thai naira awm nai paleung ka-echi kiu i nai py, kai ai niu ngai y nai khumi bawibawichi kiu i nai py, kai ai atleu bo.

¹⁸Kai patang naira avum nai khala y, nichi ly kai ai tiu u bo. Na i py ARENG ly kai ai ama hai nai ne.

¹⁹Kai, ka-jeira avum nai khala y mymy ly kai ai sabawm. Kai ai khrei nai deaungkho y atleu nai ne.

²⁰Kai ly kateng sa nai molam y mymy ly kai ai hawi naira ang pei; kai ly kamngo by y nai y amtheaungra ang pei nai ne.

²¹Kai ly ARENG i reita leu tangai bo; kaimy i Tameuh teng i dengdairei hi vui y leang.

²²Kai ly mymy i reita leu ngiereichi ai tangai bo; mymy i leu pei naichi akhi vai y leang.

²³Kai ly kamngo by y nai khumi ne, nanai py, hawi y naira y amkyn nai py, mymy pany nai ne.

²⁴Kai ly kamngo by y nai khumi, nanai pany nai deaungkho y py, kai ly leu meitang teaung nai deaungkho y py, mymy ly kai ai hawi naira pei nai ne.

²⁵Aw ARENG, nang ly ka-ym awm nai khumichi tlang tleaung y ka-ym awm; cheh ai nai by y pa-rei hawi nai khumichi tlang tleaung y, hawi hai reng nai ne.

²⁶Paleung chai nai khumichi teng y chai nai paleung ka-dawn py, khumi hawi y naichi teng y ka-jo ngai nai paleung ka-dawn py, amteng hai bo.

²⁷Mymy ly paleung apanem nai khumichi ai atleu bo. Na i py paleung len amlyh nai khumichi ai ly tahm anem hai vui nai ne.

²⁸Aw ARENG, nang ly kai ai kangvang pei; kai i veng naira ai tama hai vui bo.

²⁹Paleung ka-echi ai tiu ai nai atho py, nichi i tavaimichi ai tiu pajau ai nai sa thai naira py, kai ai ang pei nai ne.

³⁰Hini Tameuh i sa nai kalopchi ly angym parai na a! mymy i leusaichi py ym ai nai hawi parai! Mymy ly mymy teng y abyh nai khumi bawibawichi vui khupui kamta ne.

³¹ARENG naini Tameuh ne; Tameuh naini achi i abyhra ne.

³²Mymy ly kai ai ham hai nai Tameuh, kai i tako ai nai lam chymme hai nai Tameuh ne.

³³Mymy ly kai i kheu ai sisiu i kheu kamta khaw hai bo. Mawichi salo y kai ai chymme pa-rei ang khai.

³⁴Tavai keung y teaung kawp ai nai molam, khri pa-rei ham nai thailiho ko nai patiu pi bo.

³⁵Aw ARENG, nang ly kai ai ama hai iy atleu; nangmy kry palum nai deaungkho y kai ly veangryh veangryh bo. Nang i sa thai naira molam y chymme naimy awm.

³⁶Nang ly kai ai patiu ai nai ngo y pa-rei ama hai bo; kai ly mana khala py sum ai ny y.

³⁷Kai ly paleung ka-echi ai hui iy patiu bo; nichi ai tiu nai pajau y nai ryrei ly anawn y ai.

³⁸Nichi ai kaimy tiu nai khala y, nichi ly ang thau u pajau y bo; kai i kheu keung y atlym u i, neaung kham u nai ne.

³⁹Nang ly kai ai tavai thau pajau ai nai atho pei; paleung ka-echi ai eaung vui ai nai py pei nai ne.

⁴⁰Nang ly kai teng i dengdairei, paleung ka-echi ai angpreng hai pawn bo. Kai py kai ai niu ngai y nai khumichi ai tamyh pawn bo.

⁴¹Nichi ly “Sabawm kyh ba,” nanai aeu u teu i py, nichi ai ami py sabawm pajau y; nichi ly ARENG ai palau u teu i py, mymy ly nichi ai pathang pi y.

⁴²Ali my hm iy ahei pawn nai spryh kamta lawm hai ai nai nichi ai kaimy tamyh pawn bo. Lam salo i aneaung kapanchi kamta, nichi ai kaimy chiu piupa bo.

⁴³Nang ly kai ai tiu nai khumichi my patang hai naira i nai atleu iy, khumi cheng cheaungkhangchi ai py peang hai. Kai ly kaimy pany vai y nai khumichi ai, vai ly peang ai nai kanga bo.

⁴⁴Cheng takhra khumichi ly kai i mo y lu meung u; nichi ly kai i leu pei nai thai nai khala tangai u bo.

⁴⁵Nichi ly sorai paleung by y bo i, mychi i khengsi apaichi theung i dengdairei, kaso theu naimy ang thau u bo.

⁴⁶ARENG ly heng nai ne! Kai ai ama hai nai keung ai ly palo u! Kai ai atleu nai Tameuh ly nang parai nai ne, nanai palo nai aeu u.

⁴⁷Mymy ly kai ai paleung ka-echi ai eaung ai nai pei; khumi cheng cheaungkhangchi ai, kai i kiu anui y tym hai iy,

⁴⁸paleung ka-echi kiu i nai kai ai atleu bo. Aw ARENG, nang ly kai ai paleung ka-echi ai eaung ai nai pei bo. Khrukhra hai nai khumichi i patang hai naira i nai, kai ai ama hai bo.

⁴⁹Hunai deaungkho y kai ly khumi cheaungkhangchi i mo y nang ai kang palo ai.

⁵⁰Tameuh ly mymy i khai pi nai samrang ai eaung hai; mymy i khai takhra pi nai Davida i dengdairei, ni i kangpreangchi teng y khaw parai nai tamen naira deungtasarei patei pi bo.