Read Khumi Chin SAM 22 Bible Online

SAM 22 - Khumi Chin bible

SAM 22

¹[21] Kai i Tameuh, aw kai i Tameuh, ati mana nai kai ai khai su lawh mo? Sabawmra nga ai nai kai ly aeu bo; na i py vai khrairei sabawm y rai.

²Kai i Tameuh, kanithun khala y nang ai kang palau; na i py nang ly pathang y. Kai ly vum y kang palau bo; na i py kai ly paleung awmnem naira ngo y.

³Na i py nang ly Israela chengchi my areng atehra salo y tahm pasang nai leaungrei awm khyh nai, chai parai nai keung ne.

⁴Kaichi i amsi pajochi ly nang ai ym u nai ne. Huna nai nichi my ym u nai deaungkho y, nang ly nichi ai atleu bo.

⁵Nichi ly nang teng y aeu naimy hnei takeng nai deaungkho y, ka-jeira i nai lawira nga u bo. Nichi ly nang ai ym u nai molam y, hawi naira nga u nai ne.

⁶Na i py kai ly khumi ny y, thaideaung teu; khumi lutengchi my thui tamawn nai, khumi mei aniu y naira lawm bo.

⁷Kai ai niu nai khumi lutengchi my ang panui hai bo. Nichi ly palai pathu hai iy, lu heang u nai ne.

⁸Nichi my, “Nang ly ARENG ai ym lo-oh! Ati mana nai y nang ai atleu y lawh mo? ARENG ly nang ai tamen nabaly, ati mana nai mymy ly nang ai atleu y lawh mo?,” nanai thui u.

⁹Kai ai patang naira avum hai y naimy, amhm taku theung i dengdairei tapen hai nai keung ly nang ne. Deaungdi chymplei nai khala py, nang ly kai ai chymme naimy khai bo.

¹⁰Kai ly tapen khyp khala i dengdairei nang ai ym bo; huni neng dengdairei nang ly kai i Tameuh ne.

¹¹Kai hawi palo naira y awm vui moh kyh ba! Kai ly patang naira avum ai bo. Sabawm ai nai keung leaungrei py by y.

¹²Kai i paleung ka-echi ly Bashan meingtym i ka-jei awm parai nai si kataichi kamta, kai ai ang taki na bo.

¹³Khrangsichi kamta labeaung ang iy, hang naimy kai ai kei ai nai sa bo.

¹⁴Kai i atho ly khaileaung y beu nai tui kamta phuirawm veng bo. Kai i hiu bawibawichi ly athlengthlai pawn bo. Taku theung i paleung pakawi ly tlawn vui nai phajeaungdeng kamta lawm bo.

¹⁵Kai i tao[22] ly spryh kamta phuirawm i, kai i palai py dangkang y akau vui bo. Nang ly kai ai dei hai ai nai spryhra y khai su bo.

¹⁶Khumi hawi y naichi ly kai ai katanmeuh bo. Nichi ly kasui kanghuchi kamta kai i sahawi y ahihawi iy, kai i kiu kheuchi ai kei piupa bo.

¹⁷Kai i hiu bawibawi ly amteng seaungkhrang na. Paleung ka-echi ly kai ai amo theu naimy khen u ripati bo.

¹⁸Nichi ly kai i ateaungchi ai mychi tengtawi amji u. Kai i baichu kangjiu ai tambe va u bo.

¹⁹Aw ARENG, kai hawi palo naira y awm vui moh kyh ba! Jeu kaliki iy atleu kyh ba.

²⁰Haisau bo ka-jeira i nai kai ai atleu kyh ba. Hini uichi ka-jeira i nai kai ai atleu kyh ba.

²¹Hini khrangsichi labeaung i nai kai ai atleu kyh ba. Hini si parai nai si kataichi taki i nai kai ai atleu kyh ba.

²²Nang i sa nai leaungsaichi ai, kai i amjo amnauchi teng y amti pi ai. Nichi i achu naira y kai ly nang ai palo ai.

²³ARENG i miseaungchi awi, mymy ai ly palo u! Jakob i kangpreangchi awi, mymy ai tahm khai u! Israela chengchi awi, mymy ai ly chiu u!

²⁴Mymy ly khumi kamawnchi ai khai su y leang; nichi i ngari patang naichi ai py dawndan pi y nai by y. Mymy ly nichi teng i nai meimai hi pi vui y leang. Sabawm ai nai nichi i aeu hnei takeng nai pathang pi bo.

²⁵Kai ly nang i pahen nai saho y nang ai chiu nai khumi mipuichi mo y nang ai palo ai. Kai ly kaimy i adeu nai kamta, apathyp ai.

²⁶Khumi kamawnchi ly kajeu kawi pa-rei cha ai nai nga u ai. Tameuh teng y ahihawi nai khumichi ly mymy ai palo u ai. Nichi ly deungtasarei hawi naira nga u ai!

²⁷Khumi cheng cheaungkhangchi ly ARENG ai pany u jo ai. Khaileaung pri meingtym tleirei i khumi cheng bawibawichi ly paleung amtlau iy, nang ai chiu u ai.

²⁸ARENG ly samrang ne; khumi cheng cheaungkhangchi ai peang bo.

²⁹Paleung len nai khumi bawibawichi ly nang teng y lu meung u ai. Dei nai amjy khumi bawibawichi ly nang i mo y lu meung u ai.

³⁰Mo mang i deng kangthauchi ly nang i amtaw thau u ai. Vai i deung kangthauchi ly mo mang i deng kangthauchi teng y, Areng i satang amti pi ai.

³¹“Areng ly mymy i khumichi ai atleu pi bo,” nanai mo mang y tapen nai khumichi teng y thui pi ai.