Read Khumi Chin SAM 25 Bible Online

SAM 25 - Khumi Chin bible

SAM 25

¹[26] Aw ARENG, kai ly nang teng y chiu kang sa.

²Kai i Tameuh, kai ly nang ai kang ym bo. Tavai sum iy kangji nga naira i nai kai ai atleu ba. Kai ly sum nai deaungkho y, paleung ka-echi ai paleung amo theu ai nai pei moh.

³Nang ai ym nai khumichi ly sum naira avum u y ai. Nang ai tiu ai nai panga y naichi naini sum u ai.

⁴Aw ARENG, nang i reita lamchi kai ai patiu pi kyh ba. Hunichi ly kai ai pany hai pi kyh ba.

⁵Nang ly kai ai atleu nai Tameuh ne nai deaungkho y, nang i leu meitang kamta sa iy teaung thai ai nai kai ai patiu pi kyh ba. Kai ly nang ai ym jojo nai ne.

⁶Aw ARENG, jangni i dengdairei nangmy patei pi nai pahen naira hawi khaw parai nai tamen nairachi pany pi jo kyh ba.

⁷Hawi thym hawisai thym khala y kai i sa tamang nai kamngochi hawi, kateng so y naichi ai pahen kyh ba. Nang ly khaw parai nai tamen naira awm iy, neaung hawi nai sai molam y, kai ai pany jo kyh ba.

⁸ARENG ly neaung hawi nai deaungkho y, kamngo sa tamang nai khumichi ai, tako ai avo nai lam patei pi bo.

⁹Paleung apanem nai khumichi ai lam kateng mang y pahawi iy, nang i kangai patiu pi kyh ba.

¹⁰Leu Maikawm hawi Reita leu pei naichi atyp nai khumi bawibawichi ai nang ly tamen naira hawi py, ka-ym awm naira hawi py, lam patei nai ne.

¹¹Aw ARENG, kai i kamngochi ly nawi parai. Hunai deaungkho y nangmy i adeu nai khaw hai iy, kai i kamngochi pahen pi kyh ba.

¹²ARENG ai jei kaji naimy tahm khai nai khumichi ly mychi tako ai nai lam Tameuh teng i dengdairei amtiu u ai.

¹³Nichi ly nang chawn u jojo ai i, nichi i cho chanauchi py pri amtym u ai.

¹⁴ARENG ly mymy i leu tangai nai khumichi hawi amkawm nai ne. Nichi i vui mymy i Leu Maikawm ai khaw hai bo.

¹⁵Kai ly kasabawmra nga ai nai ARENG ai neng tleirei angdeang bo. Mymy ly kai ai ka-jeira i nai atleu bo.

¹⁶Aw ARENG, kai ly bengtlairei khyh nai y atho di nai ne. Hunai deaungkho y kai mang y motha iy pahen kyh ba.

¹⁷Kai i paleung bi naira bawibawi rym hai iy, kai ai ngari kamtang bawibawira i nai atleu kyh ba.

¹⁸Kai i avum nai rai nairachi hawi patang nairachi pany pi iy, kai i kamngochi pahen pi kyh ba.

¹⁹Kai teng y mana tanrei paleung ka-echi nawi na mo, nanai khen pi kyh ba. Nichi ly kai ai mana tanrei niu ngai y na mo, nanai pany pi kyh ba.

²⁰Kai ai amo hai ly atleu kyh ba. Kai ly nang teng y abyh ai nai ahihawi bo. Hunai deaungkho y kai ai kangji ngo hai moh kyh ba.

²¹Kai ly nang ai ym nai ne i, kai i ka-ym awm nai ly kai ai kry hai sy.

²²Aw Tameuh, nang i khumi Israelachi ai ngari kamtang bawibawira i nai atleu pi kyh ba.