Read Khumi Chin SAM 31 Bible Online

SAM 31 - Khumi Chin bible

SAM 31

¹[32] Aw ARENG, kai ly nang teng y abyh ai nai ahihawi bo. Kai ai mana khala py sum hai moh kyh ba. Nang ly leu meitang adyh adawi nai Tameuh ne. Kai ai atleu kyh ba; kai ly kang hnei kang takeng nai ne!

²Kai i hnei takeng nai tangai pi kyh ba! vaimy kai ai atleu kyh ba! Kai ai ama hai ai nai, kai i abyhra lengseaung ne. Ang sabawm ai nai kai i lengseaung yhm ne.

³Nang ly kai i lengseaung hawi lengseaung yhm ne. Ka-deu awm nai kamta, kai ai lam patei kyh ba.

⁴Kai i vui pateung yb nai deaungra i nai lawi hai kyh ba, Nang ly kai i abyhra ne.

⁵Kai ly kaimy ai nang i kiu y kang-au bo. Aw ARENG, nang ly kai ai atleu ai; nang ly ka-ym awm nai Tameuh ne.

⁶Nang ly teng y nai tameuhchi ai chiu nai khumichi ai ly niu ngai y; Na i py kai ly nang ai kang ym nai ne.

⁷Nang i khaw parai nai tamen nai saho y, kai ly amo theu ai. Nang ly kai i patang nai niu. Kai i kamtang pany pi bo.

⁸Nang ly kai ai paleung ka-echi kiu theung y tym hai y naimy, kaimy ngaingai chei pajau ai nai pei bo.

⁹Kai ly patang naira avum nai deaungkho y, aw ARENG, kai ai pahen kyh ba. Kai ly khri pa-rei kavo nai deaungkho y, kai i mei ly pachau na bo. Kai i hiuchi malawn py raw be bo.

¹⁰Kai ly paleung si tangam nai deaungkho y, paha na bo. Kavo nai deaungkho y kai i heng nai deung py dawi ai bo. Kai ly kaimy i avum nai ngari kamtang deaungkho y, atho bai na bo. Kai i hiuchi malawn py raw be bo.

¹¹Paleung ka-e bawibawichi ly kai ai panui hai. Yhm deaungpa my mei aniu y nai ang sa u kehkeh bo. Kai hawi apany nai ahawichi ly kai ai jei u nai ne. Kai hawi lam y avum nai khala y, angpreng u pawn bo.

¹²Kai dei veng nai kamta, khumi bawibawichi ly kai ai tami u pawn bo. Kai ly aphi su nai laawm ka-kawi kamta lawm bo.

¹³Paleung ka-echi i kamsyh y arum nai leu kai ly thai bo. Kai i sahawi y ka-jei hawi parai naichi kawi na. Paleung ka-echi ly kai ai padei ai nai tau u bo.

¹⁴Na i py aw ARENG, kai ly nang ai kang ym; Nang ly kai i Tameuh ne.

¹⁵Kai i neng kanichi ly nang i kiu tleaung y awm; kai ai paleung ka-echi hawi ana pumpi nai khumichi kiu i nai atleu kyh ba.

¹⁶Nang i miseaung kai ai pahen nai paleung hawi khen ba. Nang i khaw parai nai tamen naira hawi vanrei, kai ai atleu kyh ba.

¹⁷Aw ARENG, kai ly nang teng y chiu sa hnei takeng nai ne. Kai ai kangji ngo hai moh kyh ba. Khumi hawi y naichi ly kangji kangai ngo u sy. Nichi ly tavau pri y syhp, ti u sy.

¹⁸Paleung len amlyh naimy khumi kahawichi ai thui preaung reng nai khumi katapawpchi i labeaung ai tamyh vui ba.

¹⁹Nang ai jei naimy tahm khai nai khumichi i vui pateung pi yb nai hawi nairachi ly khri pa-rei lyh ai hawi parai na ly! Nang ly hawi, nanai py, nang teng y abyh nai khumichi ai ama hai, nanai py, khumi bawibawichi my pany u bo.

²⁰Khumichi i dawn paviu naira i nai law tleaung hai ai nai nang teng y abyh nai khumichi ai, nang ly nangmy teng y chymme naimy heu vui ba. Paleung ka-echi i khumi aniu y nai sa naichira i nai law tleaung hai ai nai nichi ai chymme nai meingtymra y heu me ba.

²¹ARENG ai ly palo u! Kai ai taki naimy tiu u nai khala, nangmy patei pi nai tamen naira ly khrikhri pa-rei lyh ai hawi parai na!

²²Nang ly kai ai nangmy mo i dengdairei patheu veng bo, nanai y kai ly jei naimy paleung mawn parai nai ne. Na i py nang teng y kasabawmra nga ai nai aeu nai khala, nang ly kai i aeu nai raawi thai bo.

²³Mymy ai ka-ym awm nai khumi bawibawichi awi, ARENG ai tamen u. Ka-ym awm nai khumichi ai ARENG ly ama hai bo. Na i py paleung len amlyh nai khumichi ai ly amlau nai kamngo pajeng pi ai.

²⁴ARENG ai ajeng nai khumi bawibawichi awi, paleung khaw parai naira awm iy, vam nai paleung awm u.