Read Khumi Chin SAM 34 Bible Online

SAM 34 - Khumi Chin bible

SAM 34

¹[34] Kai ly ARENG ai palo jojo ai. Mymy ai neng tleirei palo ai.

²Kai ly mymy i sa nai leaungsaichi molam y mymy ai palo ai; Ana naira avum nai khumi bawibawichi ly thai iy, amo theu u sy.

³ARENG i nang parai nai ai, kai hawi vanrei aeu u; achi ly mymy i amyn vanrei palo u sina.

⁴Kai ly ARENG teng y chiu sa nai khala, mymy ly tangai pi bo. Jei ai hawi parai naichira i nai kai ai atleu bo.

⁵Ana naira avum nai khumichi ly mymy ai angdeang iy amo theu bo. Nichi ly mana khala py, paleung phra u ai ny y.

⁶Jeaungmang nai khumichi ly mymy ai palau u nai khala, mymy pathang pi iy, nichi ai ngari kamtangchira i nai atleu bo.

⁷ARENG ai jei kaji nai khumichi ai, mymy i kani pri amtaw thau my kry iy, ka-jeira i nai atleu bo.

⁸ARENG ly mana tanrei hawi na mo, ai nangmy naimy hau ba. Mymy teng y chymme naimy awm ai nga nai khumi ly taham hawi.

⁹Mymy i khumi bawibawichi awi, ARENG ai tahm khai u; Mymy i leu tangai nai khumichi ly takang u ai ny y.

¹⁰Khrangsichi malawn py, teicha avaw iy kajeu alam u ai. Na i py ARENG i leu tangai nai khumichi ly hawi naira sai sairei py takang u ai ny y.

¹¹Deaungdi ahawichi awi, kai teng y jeu iy kai i leu tangai u; ARENG ai tahm khai thai ai nai, nangchi ai kaimy kang patiu pi ai.

¹²Nangchi ly amo theu naimy awm ai nai ngai u a? Tlang heng nai hawi vanrei amo theu naira ngai u a?

¹³Ngai u lawh baly chai y nai leu hawi, ka-chawi leu thui u moh.

¹⁴Hawi y nai ai en vui iy, hawi nai so u; tlamsa naira nga ai nai ham parai naimy atho so u.

¹⁵ARENG ly khumi kahawichi ai kry iy, nichi i aeu nai raawi pathang pi bo.

¹⁶Na i py hawi y sa nai khumichi ly dei nai khala, kra y naimy nichi ai tami pawn ai nai, mymy ly nichi ai ka-awi sa nai ne.

¹⁷Khumi kahawichi ly mymy ai palau u nai khala y, mymy ly pathang pi iy, ngari kamtangchira i nai atleu pi bo.

¹⁸ARENG ly paleung phra nai khumichi sahawi y awm. Athang khai naira pipi by y naichi ai atleu pi bo.

¹⁹Khumi kahawi ly ngari kamtang neangneang avum reng; na i py ARENG ly ni ai, huni ngari kamtangchira i nai atleu pi nai ne.

²⁰ARENG ly ni i hengra ai kry nai ne. Ni i hiu harei malawn py tleu y ai.

²¹Khumi hawi y naichi ly mychi i kamngo nai molam y dei u ai. Khumi kahawi ai niu ngai y nai khumichi ly kamngo pajengra avum u ai.

²²ARENG ly mymy i khumichi ai atleu ai; mymy teng y abyh ai nai ahihawi nai khumichi ly kamngo pajeng naira lawi u ai.