Read Khumi Chin SAM 35 Bible Online

SAM 35 - Khumi Chin bible

SAM 35

¹[35] Aw ARENG, kai ai ka-awi sa nai khumichi ai ka-awi so teang ly kaichi ai tiu nai khumichi ai tiu teang ba!

²Nang i khupui hawi tavai ateaung syn iy, kai ai sabawm ai nai jeu kyh ba.

³Kai ai patiu ai hau nai khumichi ai, tivi hawi atiu pheu iy paka pi kyh ba. Nang ly atleu pi ai, nanai kai teng y leu adeu pi bo.

⁴Kai ai padei ai nai atho sa nai khumichi ly sum naimy kangji ngo u sy! Kai ai ka-jeira tym hai ai nai tau nai khumichi ly anaw u iy ahei u phro sy!

⁵ARENG i kani pri amtaw thau naimy ly nichi ai patiu ai nai hui nai deaungkho y, nichi ly ali my hm naira y ahei phro reng nai, choh ali kamta lawm u sy!

⁶ARENG i kani pri amtaw thai naimy ly nichi ai patiu ai nai preang nai thym khala, nichi i angpreng nai lam ly vengpam nai y athei u sy!

⁷Nichi ly atyhtyh naimy kai i vui deaung pateung iy, kai ai patiu ai nai angawm kathiu tai u bo.

⁸Na i py nichi ly athang khai y naimy tama u pawn ai. Mychi pateung yb nai deaungra y man u ali teang ai i, mychi tai nai angawm theung y tla iy phra u ai!

⁹Huna nai khala kai ly ARENG ai ka-ym iy amo theu ai. Mymy ly kai ai atleu nai deaungkho y, kai ly amo theu ai.

¹⁰“Nang hawi ami atawm mo? Ami nai ly nang kamta, atho di nai khumi ai atho awm nai khumi my patang hai naira i nai py, ngari kamtang avum nai khumi ai ana nai khumi teng i nai py, ami my ama hai mo,” nanai ARENG teng y kaimy i avum nai ka-dawn hawimy amti pi ai.

¹¹Khumi hawi y naichi ly kai tamang vai y nai kamngochi hawi kai ai ang neng hai bo.

¹²Nichi ly kai ai kahawi palawn u y bo. Hunai deaungkho y kai ly khri pa-rei paleung phra nai ne.

¹³Kaimy ly nichi no patang u nai khala, paleung si nai ka-dawn hawimy, paleung apanem nai tarawi y chiu sa i, paisiu amchiu iy, biu hai naimy kaawm bo.

¹⁴Kai ly kaimy i ahawi, ti y baly amjo amnau i vui y chiu kasa nai kamta, paleung apei parai naimy nichi i vui py, chiu kasa pi nai bo. Kai ly kaimy i amhm i vui paleung mawn nai kamta, chiu kasa pi nai ne.

¹⁵Na i py kai patang nai neng khala y, nichi bawibawi ly amo theu u i, kai ai panui hai ai nai jeu u achu bo. Kai pany y nai khumichi ly kai ai ang pakhau u; anawn y naimy pakhau u bo.

¹⁶Kai ai no-ei pa-rei panui hai u; niu ngai y i, kai ai khen u ripati na bo.

¹⁷Aw ARENG, nang ly mana tanrei khen veangveang ai mo? Nichi my tiu naira i nai, kai ai atleu kyh ba. Hini khrangsichi teng i nai, kai i tlang ai atleu kyh ba.

¹⁸Huna nai khala kai ly nang i khumichi achu naira y, ngai kawn naimy palo ai. humi mipuichi mo y nang ai kang palo ai.

¹⁹Kai i paleung ka-e, khumi katapawpchi i sum nai molam y, paleung ateng hai ai nai pei pi moh. Ati sai py ny y naimy kai ai niu ngai y nai khumichi ai ly kai i paleung si nai molam y panui hai ai nai pei pi moh.

²⁰Nichi ly adyh adawi hai ai nai leu katheu y naimy, adyh adawi ai ngai nai khumichi satang ai, tengtang y naimy phym iy thui u bo.

²¹Nichi my, “Ha ha, nang i sa nai kaichi niu,” nanai aeu iy, neng hai nai leu katheu u bo.

²²Na i py aw ARENG, nang ly hini leaungsai pany nai ne. Na i py aw ARENG, awm pypy veng moh ba. Kai hawi kamlo parai naira y awm pi veng moh kyh ba!

²³Aw ARENG, kai i Tameuh, ang thau iy kai i hawi nai satang chih pi kyh ba.

²⁴Aw ARENG, nang ly adyh adawi nai keung ne nai deaungkho y, kai teng y kamngo by y nai satang ahei hai kyh ba. Kai i paleung ka-echi ai kai i satang molam y, paleung amo theu ai nai pei moh kyh ba.

²⁵“Achi i kangai angym bo, ni ai achi my pajau bo!,” nanai nichi thui pajau ai nai pei moh ba.

²⁶Kai i patang nai molam y paleung amo theu nai khumichi ly khri pa-rei sum iy, ahei u phro na sy. Mymychi ai kai tleaung y hawi keh, nanai thui nai khumichi ly kangji nga iy meimai phra u na sy.

²⁷Kai ai tlamsa naira nga hai ai nai ngai nai khumichi ly amo theu naimy, “ARENG ly nang parai nai ne! mymy i miseaung nang nai ly atho kanga bo,” nanai avawvawrei aeu u sy.

²⁸Huna nai khala y kai ly nang i adyh adawi hai nai sai amthang hai ai. Kani khengrei nang ai kang palo ai.