Read Khumi Chin SAM 36 Bible Online

SAM 36 - Khumi Chin bible

SAM 36

¹[36] Khumi hawi y nai i paleung theung y kamngo my ly kamsyh y dawn pasym pi bo. Huni khumi ly Tameuh ai khai su reng; mymy ai py jei vai y,

²Amymy ai tahm apasang nai deaungkho y, ni ly my i kamngo ai Tameuh my niu ai ny y; mymy ai kamngo vang py pajeng ai ny y, nanai athang khai reng.

³Ni i katheu nai leu ly chai y i, ka-chawi cheichei ne. Ni ly kahawi so y leang, tau kacheng py by y leang bo.

⁴Ni ly ira tleaung y aseaung nai thym khala, hawi y naichi dawn tau reng; ni i sa nai ngierei ly hawi y nai cheichei ne. Ni ly hawi y nai ai mana khala py khai su y.

⁵Aw ARENG, nang i khaw parai nai tamen naira ly kani mang khrairei py, ka-ym awm nai ly tamai salo y khrairei py, tym na bo.

⁶Nang i adyh adawi nai ly asang parai nai mawi aheung hawi atawm na bo. Nang chih pi nai saichi ly pangli i thiu parai nairachi hawi atawm; nang ly khumi hawi amso tawnbawichi ai kry nai ne.

⁷Aw Tameuh, nang i khaw parai nai tamen naira ly khri pa-rei khrei ai nai hawi! Kaichi ly nang i pakhi ka-khui anui y chymme naimy kaawm u bo.

⁸Kaichi ly nangmy lem phraiphreaung nai pa-rei pala pi nai teicha teinei cha ai nai kanga u bo. Nang ly kaichi ai nang i hawi naira, napi nai tavora i tui nei ai nai pei ba.

⁹Nang teng i dengdairei heng nai ngiereichi ly hengra nga u bo. Nang i kangvang saho y kaichi ly kangvang nga u nai ne.

¹⁰Nang ai pany nai khumichi ai tamen jojo kyh ba. Khumi kahawichi ai pahen pi jojo kyh ba.

¹¹Paleung len nai khumichi ly kai ai tiu ai nai hawi, khumi hawi y naichi ly kai ai paryh ai nai ngo u moh sy.

¹²Khumi kahawichi atlym nai meingtym khen u; nichi ly ang thau pajau y i, huni meingtym y atlym naimy awm u jo ai.