Read Khumi Chin SAM 37 Bible Online

SAM 37 - Khumi Chin bible

SAM 37

¹[37] Khumi hawi y naichi i molam y paleung mawn u moh. Sa tamang nai khumichi molam y paleung angai y nai awm moh.

²Nichi ly jeirawm veng nai achachi kamta, kra y naimy tama u pawn ai. Jei nawm nai keungchychi kamta, dei veng ai.

³ARENG ai ym naimy kahawi so ly pri y chymme naimy awm ba.

⁴ARENG teng y amo theu naira hau; hunaibaly mymy ly nang i ngai nai angym hai ai.

⁵Nang ly nangmy ai ARENG teng y a-au; hunaibaly mymy ly nang ai ang sabawm ai.

⁶Nang i hawi naira ai kanithun kani kangvang kamta, angvang phang hai ai.

⁷Mymy i sa pi nai ai kham tanga naimy ajeng; nang chawn nai khumichi molam py, khumi hawi y naichi i katau eaung nai molam py, paleung bi moh.

⁸Paleung mawn moh, kado theu moh; paleung mawn nai hawi kado theu nai ly nang ai patangra naini pei ai.

⁹ARENG ai ym nai khumichi ly pri peang u ai. Na i py khumi hawi y naichi ly pri pala nai avum u ai.

¹⁰Neng kra y nai sala y khumi hawi y naichi ly tama pawn ai. Nang ly nichi ai hau i py avum ai ny y.

¹¹Na i py paleung apanem nai khumichi ly pri peang ai i, tlamsa naira hawi chawn pa naira amtym u ai.

¹²Khumi hawi y nai ly khumi kahawi ai, hawi y nai ka-dawn ly niu ngai y nai paleung hawi khen aliki reng nai ne.

¹³Na i py huni khumi ly kra y naimy phra ai bo, nanai Areng my pany nai deaungkho y, ni ai khen iy panui hai bo.

¹⁴Khumi hawi y naichi ly ngari patang naichi ai padei ai nai py, kateng sa nai khumichi ai tleh ai nai py, haisauchi aphiu iy, thailihochi a-eaung u bo.

¹⁵Na i py nichi ly mychi i haisauchi hawi naimy tleh nai avum ai. Nichi i thailiho py tleu pawn ai.

¹⁶Khumi kahawi leaungrei i vawnsai ateaung maidenrei ly khumi hawi y naichi i nang chawn nai tleaung y vang teng keh.

¹⁷Ati mana nai mo nabaly ARENG ly khumi hawi y naichi i atho la pi veng iy, khumi kahawichi ai ama hai ai nai deaungkho y ne.

¹⁸ARENG ly mymy i leu tangai naichi ai kry. Nichi ly pri ai deungtasarei peang u ai.

¹⁹Rai parai nai neng khala y nichi ly patang u ai ny y. Cha nei takang nai neng khala y teicha teinei bym pa-rei nga u ai.

²⁰Khumi hawi y naichi ly dei u ai; ARENG ai paleung ka-e sa nai khumichi ly daichi kaseaung pauchi kamta tama u ai. Maikhyh kamta tama u ai.

²¹Khumi hawi y nai ly kalai la iy py, pe teang vai y. Na i py khumi kahawi ly paawp y naimy pei reng.

²²ARENG my amtheaung naira pei nai khumi ly pri amtym u ai. Na i py mymy i amsawi lawi nai khumichi ly pri pala nai avum u ai.

²³ARENG ly khumichi tako ai avo nai lam patei pi; Mymy khrei nai khumichi ai ama hai bo.

²⁴ARENG ly nichi ai sabawm pi ai i, nichi ly atlym i py, ang thau y naimy awm ai ny y.

²⁵Vai i neng khala y kai ly miteaung acheang veng bo; kai ly saneng kakra kaheng bo. Na i py khumi kahawi ai ARENG my khai su nai py, ni i cho chanauchi cheaung cha nai py, tlenrei py kaniu vai y leang.

²⁶Ni ly khumi takhrachi ai paawp y naimy, avawrei pei reng. Ni i cho chanauchi py amtheaung naira nga u nai ne.

²⁷Hawi y nai ai en vui iy kahawi phai so; hunaibaly nang i katu chanauchi ly pri y awm ai nai nga u jojo ai.

²⁸Ati mana nai mo nabaly ARENG ly kahawi sa nai ai kawn iy, mymy ai ka-ym awm nai khumichi ai khai su y nai deaungkho y ne. Mymy ly nichi ai avawrei ama hai bo. Na i py khumi hawi y naichi i kangpreangchi ly pri pala nai avum ai.

²⁹Khumi kahawichi ly pri amtym ai i, hu y awm jo ai nai nga u ai.

³⁰Khumi kahawi ly tau cheng nai leu katheu reng; ni ly adyh adawi jojo nai ne.

³¹Ni ly my i Tameuh my leu pei nai ai paleung theung y pateung me bo. Mana khala py huni leu pei naira i, angphri vui y leang.

³²Khumi hawi y nai ly khumi kahawi ai oh iy, padei ai nai atho sa reng.

³³Na i py ARENG ly khumi kahawi ai, paleung ka-e i kiu y khai su ai ny y. Ni ly tara jeung y tym iy, tara chih nai avum lawh baly, ni ai pajeng nai tym hai ai ny y.

³⁴ARENG ai athang khai naimy reita leu pei naichi ai atyp ba. Mymy ly nang ai pri amtym ai nai pei iy, tahm pasang ai. Nang ly khumi hawi y naichi ai pri pala nai niu ai.

³⁵Kai ly kamjau kamteang sa reng nai khumi hawi y nai leaungrei ai niu vai bo. Ni ly Lebanon daichi i saitleang keung kamta, khumi bawibawichi salo y khiu nai ne.

³⁶Na i py tlen pa-nyh katako prei nai khala ly ni ly huni meingtym y by y leang bo. Ni ai hau i py niu pajau y leang bo.

³⁷Khumi kahawi ai khen cham; leu meitang teaung nai khumi ai khen paryp cham; tlamsa naira nga nai khumi ly katu chanau deung akai nai ne.

³⁸Na i py kamngo sa nai khumichi ly tama bebe bo. Ni i katu chanau kangpreangchi py, myh kang naira avum u ai.

³⁹ARENG ly khumi meitangchi ai atleu bo. Patang nairachi avum nai khala, nichi ai ama nai ne.

⁴⁰Mymy ly nichi ai sabawm iy atleu bo. Nichi ly mymy teng y abyh u nai ne i, mymy ly nichi ai khumi hawi y naichi kiu i nai atleu bo.