Read Khumi Chin SAM 39 Bible Online

SAM 39 - Khumi Chin bible

SAM 39

¹[39] “Kaimy i sa nai sai molam y adawn patyp ai; labeaung hawi malawn py tamang y ai nai adawn patyp ai. Khumi hawi y nai sahawi y kaawm nai thym khala y, kai ly ati sai py katheu y naimy awm ai,” nanai kai ly thui bo.

²Kai ly leu sairei py katheu y naimy kaawm pypy bo; leu kahawi malawn py katheu y nai ne. Na i py kai i no patang nai ly ty tleaung tyra lawh.

³Kai ly paleung bi, paleung mawn naira tym bo; adawnra, paleung bira nai ne. “Aw ARENG, kai ly mana tanrei heng sau ai mo?

⁴Mana khala kadei ai mo? Kai ai dei naira satang pany hai ba,” nanai nang teng y deng y naimy awm pajau y bo.

⁵Nang ly kai ai khri pa-rei deung dawi hai lawh ly! Nang i mo y kai i heng nai sai ly ati sai py ny y nai kamta ne. Meitang khyp, heng nai amjy khumi angso nanai ly taho kathiu, kaho kalau nai ryrei khyh.

⁶Pa-pui kamta tanareichy heng khyh. Ni i sa nai leaungsaichi ly atyhtyh teu; ni ly yhmtheaung katui pateung achu teu i py, mani ai ly ami my amtym ai mo, nanai ni ly pany y leang.

⁷Hunai deaungkho y aw ARENG, kai ly mani ai athang khai pajau ai mo? Kai ly nang ai athang khai nai ne.

⁸Kai ai kamngo bawibawira i nai atleu kyh ba. Kai ai khumi ka-khumchi my panui hai moh sy.

⁹Nang ly kai i tlang tleaung y hina nai no patang hai nai deaungkho y, kai ly kaawm pypy ai; leu sairei py katheu y leang bo.

¹⁰Kai i tlang tleaung y kamngo pajeng bi moh kyh ba! Nangmy pei nai tamo kalemchi molam y, kai ly kadei vi na bo.

¹¹Nang ly khumi ai mymy i kamngo molam y parip iy pajeng bo. Ni i ngaiphi nai saichi ai mipo kamta, nangmy taphra pi pawn veng bo. Meitang khyp, khumi ly taho kathiu, taho kalau nai ryrei khyh lawh ly!

¹²Aw ARENG, kai i chiu sa nai tangai pi kyh ba. Kai i hnei takeng nai tangai pi kyh ba; kai vo nai khala sabawm ai nai jeu kyh ba. Amsi pajochi kamta kai ly nang i angvyn lawm i, tanareichy awm khyh nai ne.

¹³Kai dei iy tamo veng y rai khala, amo theu naira maidenreichy nga ai nai, kai teng i dengdairei meimai hi pi veng ba.