Read Khumi Chin SAM 40 Bible Online

SAM 40 - Khumi Chin bible

SAM 40

¹[40] ARENG my sabawm ai nai kai ly kham tanga naimy ajeng nai khala y, mymy ly kano patheung iy, kai i aeu nai raawi thai bo.

²Mymy ly ka-jei awm parai nai angawm hawi aneaung kapan theung i nai, kai ai atheu kalau bo. Hunaibaly kai ai lengseaung salo y khai iy, chymme naira ang pei bo.

³Achi i Tameuh ai palo naira y khulym kangtha thui ai nai, mymy ly kai ai patiu pi bo. Huna nai sa nai ai niu u nai khumichi ly jei naimy tahm khai u iy, ARENG ai ym u ai.

⁴Tameuh takhrachi ai ahihawi y, teng y nai tameuhchi ai chiu y naimy, ARENG ai ym nai khumi ly taham hawi.

⁵Kai i ARENG Tameuh, nang ly kai i vui ati cheaungkhangchi sa pi. Nang hawi pata pajau nai khumi leaungrei py by y! Nangmy kaichi i vui dawn pi nai ka-dawnchi ly lyh ai hawi parai nai ne. Huni atitichi ly nawi parai nai deaungkho y, hunichi ai kati pajau y nai ne.

⁶Nang ly apathyp nai hawi katalamrachi aly ngai y bo. Maicham tleaung y bom verei leng patlum nai tawnbawichi ai py, kamngo pahen nai kapathyprachi ai py, nang ly hnei y leang. Na i py nang ly nang teng i leu thai ai nai kai ai kano pei nai ne.

⁷Huna nai deaungkho y, “Kai ly angveirym bo; kai i vui nangmy leu pei naichi ly reita cha-iu theung y awm;

⁸Kai i Tameuh, kai ly nang i kangai sa ai nai khri pa-rei ngai; nang i leu pei nai paleung theung y pateung me bo,” nanai kang takeng bi bo.

⁹Aw ARENG, kai ly nang i khumi bawibawichi achu naira y, kai ai nangmy atleu nai satang kahawi kathui pi bo. Huni satang ai kai ly avawrei thui pi ai, nanai nang pany nai ne.

¹⁰Kai ly atleu nai satang thui y ai nai am-yh pajau y; Nang i ka-ym awm nai satang hawi, sabawm nai satang ai avawrei kathui nai ne. Nang i khumi bawibawichi achu naira y, kai ly nang i ka-ym awm nai satang hawi, khaw parai nai tamen naira satangchi apha y ai.

¹¹Aw ARENG, nang ly kai ai pahen jojo ai nai kai kapany; Nang i tamen naira hawi ka-ym awm nai ly kai ai ang kry jojo ai.

¹²Kati pajau y na pa-rei nawi parai nai patang nairachi ly kai ai taki na ly! Kai i kamngochi my kai ai hui kai nai deaungkho y, kai ly niu pajau y bo. Huni kamngochi ly kai lura i sam tleaung y nawi parai i, kai ly paleung phra na bo.

¹³Aw ARENG, kai ai atleu kyh ba! vaimy sabawm ba!

¹⁴Kai ai padei ai nai atho sa nai khumichi ly sum angchi khyp iy, ahei u phro phra sy. Kai i patang nairachi molam y amo theu nai khumichi ly anaw iy kangji ngo u sy.

¹⁵Kai ai panui hai nai khumichi ly sum iy kaso theu u sy.

¹⁶Nang teng y ahihawi nai khumi bawibawichi ly amo theu u sy. Nang i atleu nai molam y kawn naimy palo u nai khumichi ly “ARENG ly khri pa-rei nang parai nai ne,” nanai palo u jojo sy.

¹⁷Aw ARENG, kai ly atho di iy, jeaungmang nai khumi ne i py, nang ly kai ai pany pi jo nai ne. Nang ly kai i atleu keung, kai i Tameuh ne; kai ai sabawm ai nai jeu kaliki ba!