Read Khumi Chin SAM 44 Bible Online

SAM 44 - Khumi Chin bible

SAM 44

¹[43] Aw Tameuh, jangni amsi pajochi deung y, nangmy sa pi nai leaungsaichi satang ai nichi my thui pi nai deaungkho y, kaimychi thai khyp bo.

²Nangmy naimy cheng takhra khumichi ai patheu vui iy, nang i khumichi ai hini pri y meingtym pala pi nai py, cheng takhra khumichi ai kamngo pajeng iy, nangmy i khumichi ai lo pa, nang chawn hai nai satang py thui pi bo.

³Nang i khumichi ly huni pri y haisauchi hawi peang u nai ny y leang; mychi atho hawi py peang vui nai ny y leang; nang i sa thai naira haiho hawi, nang ly nichi ai tamen nai deaungkho y nichi hawi vanrei nangmy awm pi nai molam py, nichi ly huni pri y peang vui pajau nai ne.

⁴Nang ly kai i samrang, kai i Tameuh ne; nang i khumichi ai eaung naira pei pi bo.

⁵Kaichi ly nang i sa thai naira molam y, paleung ka-echi ai pajau nai ne.

⁶Kai ly kaimy i thailiho ai a-ym y leang; kai i haisau py, kai ai atleu pajau y leang.

⁷Na i py nang ly kaichi ai paleung ka-echi kiu i nai atleu iy, kaichi ai niu ngai y nai khumichi ai pasum bo.

⁸Kaichi ly nang ai palo jojo iy, kawn naimy deungtasarei palo ai.

⁹Na i py vai ly nangmy kaichi ai khai su iy sum hai bo. kaichi i tavaimi kamkawmchi hawi vanrei, tavai thau hai y bo.

¹⁰Nang ly kaichi ai paleung ka-echi teng i nai angpreng hai bo; nichi ly kaichi i vawnsaichi la pi pawn veng nai ne.

¹¹Nang ly kaichi ai beramchi kamta tleh hai iy, pri takhra mang y ahei hai bo.

¹²Nang ly nangmy i khumichi ai vang kadi hawi jo vui bo; ati kamran py ngo y nai ne.

¹³Kaichi i tlang tleaung y nang i sa naichi ai yhm deaungpachi ly niu i, kaichi ai preaung iy panui hai u bo.

¹⁴Nang ly kaichi ai khumi cheng cheaungkhangchi my, mei aniu y ai nai lawm hai bo; nichi ly kaichi ai tahm khai y nai lu thiu hai u bo.

¹⁵Paleung ka-echi hawi vawitheung tha nai khumichi i,

¹⁶tahm khai y naimy mei aniu y nai katheu nai leuchi molam y, kai ly tahm anem iy kangji nga jojo nai ne.

¹⁷Kaichi ly nang i sa pi nai leu maikawm ai kataphra u y nai ne. Nang ai py katami u y leang. Na i py hini ngari kamtangchi ai kaichi avum u bo.

¹⁸Kaichi ly nang i tlang tleaung y vaineng taphra u y leang; kaichi ly nang i leu pei naichi tangai y nai by y leang.

¹⁹Na i py nang ly kaichi ai daichi mawi kasichi awm nai meingtym y kajeaung kamang khai su bo. Veng keh nai meingtym y aphi su iy, khai nai ne.

²⁰Kaichi ly kaimychi i Tameuh ai chiu y naimy, pri takhrachi i tameuh teng y chiu sa hnei takeng u lawh baly,

²¹meitang khyp, nangmy pany ai nai ne. Ati mana nai mo nabaly, nang ly khumichi i dawn paviu nai katauchi pany nai deaungkho y ne.

²²Na i py nang ai ka-ym awm nai molam y, kaichi ly avawrei deira hawi ka-vum u nai ne. Tleh ai khai yb nai beramchi kamta, khumi takhrachi my athang khai naira avum u bo.

²³Aw Areng, anglaw ly ang thau ba! Nang ly ati mana nai y i pi vui lawh mo? Angthau ba! Kaichi ai deungtasarei khai su moh kyh ba!

²⁴Nang ly ati mana nai y kaichi teng i nai meimai hi pi lawh mo? Kaichi i no patang nai hawi, ngari kamtangchi ai tami pi veng moh kyh ba!

²⁵Kaichi ly khaileaung y tym pa-rei tamyh naira avum u bo. Sum nai deaungkho y spryhra y atlym u bo.

²⁶Angthau iy kaichi ai sabawm ba! Nang i khaw parai nai tamen nai saho y atleu kyh ba!