Read Khumi Chin SAM 45 Bible Online

SAM 45 - Khumi Chin bible

SAM 45

¹[44] Samrang i vui hini khulym katajiu nai thym y, kai i paleung ly taham hawi nai leuchi kawi na bo. Kai i labeaung ly cha tajiu keung kahawi leaungrei i cha kaleaung hawi atawm.

²Nang ly khumi neangneangchi tleaung y mo-cha hawi nai ne. Vang teng nai leu katheu reng. Hunai deaungkho y Tameuh teng i amtheaung naira nga jojo nai ne.

³Sa thai naira len parai nai keung awi, haisau atai ba; samrang ly sa thai naira hawi phum-ang kawi angym nai ne.

⁴Ka-ym awm nai hawi adyh adawi naira my peang ai nai molam, sa thai naira haiho hawi vanrei atiu iy, eaung naira ngo ba! Samrang nang ly nangmy i haiho hawimy, eaung pawi puichi avum ai.

⁵Nang i thai meaungchi ly chiu nai deaungkho y, paleung ka-echi i paleung pakawi y pri na bo. Khumi cheng cheaungkhangchi ly nang i kheu keung y atlym u nai ne.

⁶Nang ai Tameuh my pei nai atehra bailang ly deungtasarei awm ai. Nang ly nangmy i pri ai leu meitang adyh adawi naimy peang bo.

⁷Nang ly leu meitang ai ngai iy, hawi y naira ai niu ngai y bo. Hunai deaungkho y nang i Tameuh napi nai Tameuh ly nang ai vawi takhra nai bo y, takhra samrang bawibawichi tleaung y tahm asang iy, amo theu naira napi nai asitui lei pi bo.

⁸Nang i ateaungchi ly mura, akjaw, sinamon mui katuichi mui amseaung na bo. Katyn kapau beu kawp naichi ly kasai nuh samrang yhmchira y, nang ai ang beu pi nai ne.

⁹Nang i samrangnu ai kry naichi theung y, pri tleirei i samrang chaniuchi abawi nai ne. Nang i samrang atehra bailang lamtang mang y, muku tangcheng hawi sa nai ateaungchi ai amthyp nai samrangnu angdo naimy awm bo.

¹⁰Samrang i aju awi, kai i thui nai leu tangai ba. Nang ly nangmy i chengchi hawi, amjychi ai tami veng ba.

¹¹Nang i hawi parai nai mo-cha ly samrang my nang ai khrei hai keh ai mang. Samrang ly nang i areng ne nai deaungkho y, nang ly ni i leu tangai ai nai tla.

¹²Turu pri khumichi ly nang teng y langseaungchi syn pi ai. Nang chawn nai khumichi ly nang teng i meimai nga ai nai atho sa u ai.

¹³Samrangnu ly samrang yhm y tym bo; ni ly mo-cha khri pa-rei hawi parai na ly! Ni i ateaung ly muku kalang hawi aneng nai ne.

¹⁴Ni ly mawi-en sadi nai ateaung amthyp iy, samrang teng y hawi u bo. Samrangnu nithun abang nai anglochi ai py, samrang teng y hawi u nai ne.

¹⁵Nichi ly amo theu naimy ang jeu u i, samrang i yhm y kun u bo.

¹⁶Kai i samrang awi, ngamsi pajochi i meingtym amtym ai nai molam y, samrang nang ly chapo neangneang nga ai; Nang ly nichi ai khaileaung pri meingtym tleirei y samrang sa hai ai.

¹⁷Kai i khulym ly nang ai deungtasarei amtheaung hai ai; khumi bawibawichi my py, nang ai ang palo u jojo ai.