Read Khumi Chin SAM 5 Bible Online

SAM 5 - Khumi Chin bible

SAM 5

¹[4] Aw ARENG, kai i leu tangai ba; kai i tangam nai raawichi kano patheung pi kyh ba.

²Kai i samrang, kai i Tameuh! sabawm pi ai nai kai i aeu naimy hnei takeng nai tangai pi kyh ba. Aw ARENG, kai ly nang teng y chiu kang sa.

³Nang ly khawn mang i neng y kai i chiu sa nai raawi thai bo. Kani si nai neng khala y kai chiu kasa i, nang i pathang pi nai ajeng nai ne.

⁴Nang ly kamngo sa nai ai khrei nai Tameuh ny y; nang i mo y hawi y sa ai nai pei y.

⁵Paleung len naichi ly nang i mo y kun ai nai ngo y; nang ly khumi hawi y nai bawibawichi ai niu ngai y bo.

⁶Nang ly tapawp nai khumi bawibawichi ai taphra iy, khrukhra naichi, paleung ka-kawi awm naichi ai paso nai ne.

⁷Kaimy i vui nabaly, nang i tamen naira len parai nai kanga nai deaungkho y, nang i yhm theung y kun pajau; nang i Achura yhm kachai theung y chiu sa naimy nang ai tahm khai nai lu meung pajau.

⁸Aw ARENG, kai i paleung ka-echi ly khri pa-rei nawi parai! Nang i kangai sa ai nai kai ai lam patei pi kyh ba. Nangmy kai ai tako hai ai ngai nai lam ly thleaungthlang hai kyh ba.

⁹Kai i paleung ka-echi i leu ai ly mana khala py ym ai nai ngo y. Nichi teng y taphra ai ngai nai paleung naini awm khyh. Nichi i labeaung ly am-eaung yb nai tavau pa-kho hawi atawm; nichi i palai py jypjyp naimy tapawp paryp reng nai ne.

¹⁰Aw Tameuh, nichi ai tahm panem ly pajeng kyh ba; mychi i hawi y nai katauchi my ly mychi ai naini phra naira tym hai ba. Mychi i kamngo nawi nai sai molam y hawi, nang ai tiu u nai molam y py, nichi ai nang i mo i dengdairei patheu pi pawn ba.

¹¹Na i py nang teng y chymme naimy abyh nai khumi bawibawichi ly amo theu u ai. Nichi ly amo theu u nai deaungkho y, avawrei khulym thui u ai. Nang ly nangmy ai tamen nai khumichi ai kry nai ne. Nang i saho y nichi ly meitang khyp amo theu u ai.

¹²Aw ARENG, nang ly nangmy i leu tangai nai khumichi ai amtheaungra pei nai ne. Nang i tamen naira ly khupui kamta, nichi ai ama hai bo.