Read Khumi Chin SAM 52 Bible Online

SAM 52 - Khumi Chin bible

SAM 52

¹[51] Sathai naira haiho awm nai khumi awi, ati mana nai amy i hawi y nai amlyh lawh mo? Tameuh i ka-ym awm nai ly deungtasarei ne.

²Nang ly khumi takhra phra ai nai molam dawn tau reng; nang i palai ly sam vau acho kamta chiu parai. Nang ly teng y nai leuchi ai, avawrei phym atyhtyh nai ne.

³Nang ly kahawi tleaung y hawi y nai ai py, leu meitang tleaung y leu ka-chawi ai py nang keh bo.

⁴Tapawp nai khumi awi, nang ly nangmy i labeaung mang khumichi no-ei pa-rei thui ai nai ngai keh lawh ly!

⁵Hunai deaungkho y Tameuh ly nang ai deungrei, atlym hai jojo ai; mymy ly nang ai yhm i dengdairei ryh iy, ang patheu vui ai; nang ai ly heng nai khumichi awm nai khaileaung pri i dengdairei, ang patheu vui ai.

⁶Khumi kahawichi hini leusaichi niu baly jei u ai; nichi ly nang ai khen iy panui ai i,

⁷“Amy i chymme ai nai i vui y Tameuh ai ym ai nai tleaung y ly amy i nang chawn naira ai a-ym nai khumi ai khen u; ni ly my i hawi y naira molam y, amy i chymme naira hau nai khumi ne,” nanai thui u ai.

⁸Na i py kai ly Tameuh i yhm sahawi y prau nai olive keung hawi atawm nai ne; kai ly nang i khaw parai nai tamen naira ai deungtasarei ym bo.

⁹Aw Tameuh, nang i sa nai leaungsaichi molam y, kai ly kawn naimy palo jojo ai; nang i hawi nai satang, nang i khumichi mo y amthang hai ai.