Read Khumi Chin SAM 55 Bible Online

SAM 55 - Khumi Chin bible

SAM 55

¹[54] Aw Tameuh, kai i chiu sa nai tangai pi kyh ba; kai i hnei takeng nai khala y, meimai hi vui moh kyh ba!

²Kai i hnei takeng nai tangai iy, pathang pi kyh ba; kai ly paleung bi, paleung mawn naichi hawimy, atho khei na bo.

³Paleung ka-echi i pajei nai molam y, kai ly jei hyn nai ne; khumi hawi y naichi i ana nai molam y, kai ly paleung phra atho di bo. Nichi ly kai ai ngari kamtang avum hai; nichi ly kai i tlang tleaung y kado theu iy, niu ngai u y bo.

⁴Kai i paleung ly jei hyn naimy awm; deira ai khri pa-rei jei na bo.

⁵Jei hyn nai hawi khri pa-rei kaso theu nai awm bo.

⁶Buhu kamta kai teng y pakhichi awm lawh teu i khyly, kai ly kamlora akheang ai i, chymra meingtym hau ai.

⁷Kai ly khri pa-rei palo nai meingtym mang y angkheang iy, daichi ka-vymra y kaawm ai.

⁸Kai ly chei kaliki iy, ali kamchai hawi ali pui khu puichira i nai abyhra kahau ai.

⁹Aw ARENG, kai i paleung ka-echi ai athli piupa hai kyh ba! Mary theung y khrukhra naira hawi, lawm naichi ai kai ly kaniu.

¹⁰Huni khumichi ly mary ai vum kanithun katan u meuh bo; mary theung y hawi y sa nai, khrukhra hai naichi hawi kawi na bo.

¹¹Meingtym tleirei y phra nairachi awm; lamchira y ana pumpi naira, li-tapawp nairachi hawi kawi na bo.

¹²Panui hai nai khumi ly kai i paleung ka-e ne lawh teu baly, kakham pajau nai ne; kai i molam y amlyh nai paleung ka-e ne lawh baly, kai ly ni ai en vui pajau.

¹³Na i py huna nai sa nai khumi ly kai i ahawi kamrawi, kalop sa ahawi nai amrawi keh nai ahawi ne lawh ly!

¹⁴Nang hawi kai ly adyh parai naimy, arum apang hawi bo; Achura yhm y py, vanrei chiu sa ahawi nai ne.

¹⁵Kai i paleung ka-echi ly dei kani tym y naimy dei u sy; kangheng tang naimy tavau kho y chei u sy! Nichi i yhmchi ly hawi y naira kawi nai meingtymchi ne; nichi i paleung ly hawi y naira kawi na bo.

¹⁶Kai ly ARENG Tameuh teng y, kasabawmra nga ai nai chiu kasa bo; mymy ly kai ai atleu ai.

¹⁷Kai i tangam nai raawichi ly khawn, kanithun, vum, huni nengchi khala mymy teng y tym i, mymy ly ang tangai pi ai.

¹⁸Hina tanrei nawi parai nai paleung ka-echi hawi atiu nai tavai keung i dengdairei, kai ai chymme naimy vawi hai ali teang ai.

¹⁹Jangni jangkhawn i dengdairei, khumi angso bawibawichi ai peang nai keung Tameuh ly kai i chiu sa nai thai iy, paleung ka-echi ai sum hai ai. Ati mana nai mo nabaly nichi ly paleung amtlau u y; mymy ai py jei u y nai deaungkho y ne.

²⁰Kai i ahawi kangngym ly my i ahawichi ai tiu iy, my i adeu nai py taphra bo.

²¹Ni i leuchi ly thobai tleaung y panai iy, ni i paleung theung y ly niu ngai y reng nai ka-dawnchi awm; ni i leuchi ly asitui kamta panai i py, chiu parai nai haisau kamta, tamokalem nga hai reng nai ne.

²²Nang i myn kaji ai ly ARENG teng y au; mymy ly nang ai ama hai iy ang kry ai; khumi kahawichi ai mana khala py, sum hai ai ny y.

²³Na i py aw Tameuh, nang ly khumi ai padei nai keungchi hawi, tapawp nai keungchi ai, nichi i deung ka-hyhrei tym y rai khala my tapreaung angawm theung y ang vum hai ai; kai naini ly nang ai kang-ym ai.