Read Khumi Chin SAM 56 Bible Online

SAM 56 - Khumi Chin bible

SAM 56

¹[55] Aw Tameuh, kai ly atiu naira avum nai deaungkho y, kai ai pahen kyh ba; paleung ka-echi ly kai ai kani tleirei ana pumpi nai ne.

²Kai ai ka-jo hau naichi ly kani khengrei kai ai tiu u bo; kai ai tiu nai khumichi ly nawi parai.

³Aw ati cheaungkhang sa thai nai ARENG, kai ly jei hyn nai khala y, nang ai kang-ym nai ne.

⁴Kai ly Tameuh ai ym nai deaungkho y, ami ai py jei ai ny y; mymy i adeu nai molam y mymy ai kapalo ai. Khumi ly kai ai ati sa pajau ai mo?

⁵Kai i paleung ka-echi ly kai i tlang tleaung y kani khengrei, mei aniu y nai leu katheu u bo; kai ai no patang hai ai nai lam avawrei hau u nai ne.

⁶Nichi ly abyh nai meingtymchira y akachu iy, kai ai padei ai nai, kai i sa nai ngiereichi ai o iy, khen u bo.

⁷Aw Tameuh, nichi i sa tamang nai molam y, kamngo pajeng ba; kado theu iy tiu vui ba.

⁸Kai i patang naira avum ai nai, nang ly pany nai ne; nang ly kai i meikatui beu naichi ai cha-iu theung y tajiu iy, khai pi typ bo. Nang i cha-iu theung y tajiu iy khai pi typ nai ny y a?

⁹Nang teng y kai i hnei takeng nai kani y, paleung ka-echi ly anaw u pawn ai. Tameuh ly kai mang y awm, nanai kapany bo.

¹⁰Kai ly ARENG i adeu nai leuchi ai kapalo nai ne.

¹¹Kai ly mymy ai ym nai deaungkho y, ami ai py jei ai ny y; khumi ly kai ai ati sa pajau ai mo?

¹²Aw Tameuh, kai ly nang teng y leu adeu nai kamta, adeu nai leu khaw hai ai; nang teng y palo nai kapathypra kang talam ai.

¹³Ati mana nai mo nabaly nang ly kai ai deira i nai atleu iy, sum hai y nai deaungkho y ne. Hunai deaungkho y kai ly heng nai khumichi i kangvang theung y Tameuh i mo y tako ai.